AMC hotute zin ṭhin kha

Mizorama kan MLA-te aiin Aizawl enkawltu bik Aizawl Municipal Corporation Coun­cillor te hi an zin chhuak nasa zawk an ti ṭhin a, India ram state hrang hrang khawpui an fang mai ni loin foreign khawpuite pawh an zin a ni a, hei bakah hian AMC enkawltu UD&PA hnathawkte pawh hi an zin nasa tawh a, UD&PA Minister hmasa pawh kha Europe velah a officer te nen an zin kual tawh tih hman deuhah khan an chai tawh a nih kha. Hei hi AMC kan inthlan leh hma hian sawi chhuah lova thamral atan a uihawm a, chuti chuan an zin avanga kan khawpuiin hlawkna a neih te pawh a hriaten an sawi zui atan khuh hawnna siam phawt ila mi pawi kan sawi em lovang chu maw? 

Heng hi AMC pawisa ti heka zin kual mai mai an ni lova, UD&PA officer te zin pawh hi pawisa khawh rala zin mai mai ni bik mai lovin a inziakah chuan chhan nei veka zin an ni ṭhin. A zinna tur senso sorkar laipui rawn tum sak te an awm an ti a, a bakah thil zir chiang tura zinte an ni ṭhin a, kum 2016 te khan AMC Councillor 12 leh official pathum te chu India ram khawpui hrang hranga bawlhhlawh sawngbawl dan enin an lo zin daih tawh a, footpath leh motor parking vel pawh an lo zir dim diam tawh bawk a ni. 

Kan khawpui enkawlna kawngah hian Europe leh USA thleng thlengin an lo zuk zir chiang tawh a, tichuan chu mite chuan Aizawl hi an enkawl fel sawt em? Aizawl khawpui bawlhhlawh paih dan a fel sawt em? tih te leh Aizawl khawpuiah parking hi an rawn siam fel ta thlap em? tihte pawh zir zel ila a ṭha ang. Zin chhuak kher lovin taima takin Aizawlah inzir ta se parking, footpath, bawlhhlawh sawngbawlna siam dan te hi an thiam thovang em le? Phaia zuk zinte leh Sap ram thleng thlenga zuk zinte khan midang aiin an ward an enkawl ṭha ta em? tih te pawh hriat chian a chakawm ta a ni. 

Heng thil sawi chhuah a ṭul chhan chu sorkarin hma­sawnna zir tura a zin tir (official expo­sure trip) leh zin khawthawn mai mai (leisure trip) hi a inang lo tih mipui lam chu kan chiang a, kan AMC hotute zin hma leh zin hnu ah Aizawl khawpui dinhmun a danglam tawh em? tih hi zir a ṭha ang. Zinna pawisa awm avanga zin hum hum ṭhin AMC hi Aizawl khawpui hmasawnna atan a ṭha kan ti nge kan ti lo le? 

- H Lalhmangaiha