KUMHLUI LIAM TA KHA

Kum 2020 chu hunin a her liam pui ta vawng vawng mai, kan thlahliam tak kum 2020 kha kum dang zawng aiin liam thuai thuai tura duhtu khawvela cheng mek hringnun kan hmanpui tam tak te duhthusam a ni ngei ang. Kum dangah chuan keini Zofate ngei pawhin fam Pi Lalsangzuali Sailo'in mawi taka a sak kumhlui thlahna hla chi hrang hrang hmangin kumhlui liam mai tur, chelh thei lo mah ila, nunhlui khuarei chang mai tur ngaiin kumhlui hla in kumhlui kan thlah ṭhin a ni a, kumin erawh a dan a dang narawh e, kumhlui ngai lo viau mah ila, kum aiin nunhlui kan ngai vawng vawng mai a ni. 

Hrileng avangin Vau thla aṭangin kan Zoramah ngei pawh harsatna hrang hrang kan tawk a, hringnun hman dan pangngai angin nun kan hmang thei lo a. Ni e, hrileng ṭihbaiawm takin min run a, nunphung a khaihlak a, chhungkua leh ṭhiante ngei pawh kan inhnaih ngam lo a nih kha. Kumtir aṭanga kan thil tum hrang hrang pawh hlen thei loin, zirna in mai ni lo Pathian Biak Ina inkhawm ngei pawh khap a ngai ta hial. Kum 2020 kum ngaihawm loh tak nimahse, kan beisei loh deuha hrileng kara hringnun zinkawng kan zawh dan te kha ngaihawm loh hle mahse, khuarei ah a ngaihawm mahna. 

Kum chhiat kum a ni tawh nak alaiin, kum 2020 chhunga vanduai thlak taka lusun tawk chhungkua te, hrileng avanga nun chan ta chhungkuate tan hian a va ngaihawm loh zual dawn tak em. Kum khawharthlak tak a ni ngei ang. Ṭhenkhat tan erawh Inkharkhip kha thil thar thiamnan te, hunawl hman ṭhat dan te leh khawvel changkanna hmanga thu leh hla hmanga thil zir thar nan te hmangin ṭangkai taka hmang an awm ngei ang. Kum 2020 kha hrileng avangin buai in, a huhova punkhawm te theih loh mahse ṭhianho zînga hlim taka inkawm khâwm te, zaiho te, duh duh huna lên theih te, a bîk takin, in chibai te a hlut zia kan hriat thar phah a, Pathian Biak In ah inkhawm thei ta lo chu, inkhawm hlutzia te, kan hriatchhuah thar phah a ni. Kan ngaih pawimawh êm êm ṭhin, incheina kan lo mamawh tam lohzia te, thawmhnaw leh incheinaa sum kan lo hman nasatziate kan hriat chhuah phah a, eng nge kan mihrinna a kan ngaih hlut tûr zâwk tih te, khawvêla kan chên chhûnga thiamzâwng neih tumna pawimawhziate kan hriat phah a, a hlutna kan hre chhuak mawlh mawlh mai a ni. 

Kum kal taah khan kum dang zawng aiin Chhung Inkhawm te, Chhungkuaa Pathian fak ho te, Pathian biaka inpâwlhona, kan rinna intâwm hlutziate kan hriat phah a. Pathian biak inkhâwm a hmâ anga kan tih theih loh avângin ‘mal tlat Kristianna nun’ kan neih ngai loh te neih a ngai ta. Mi dangte ring lova mahni ngeia Pathian biak te, he inkhârkhip hian mal tlat kristian nun, mahnia Pathian pawl, thlamuanna nei tûra taima taka Pathian biakte kan neih theih leh kan zir thar tûrin nghawng ṭha tak a nei a ni. 

Dân anga ngâia chhûng inkhâwm kan neih ṭhinte chuan awmze thûk leh ril zâwk neiin chhûngkuaa Pathian maicham din a ṭhatzia leh ringtu kan nihna anga kan tih tûr a nihzia te min hriat fiahtîr a ni. Pathian hi hmun tina a awmzia te, kan bulah a awm reng a ni tih hripui lên avâng hian mi eng emaw zâtin an hriat chhuah phah a, khawvêl pumpuiah he hripui hian bû a khuar avângin tlânchhiatna tûr khawvêlah a awm lo, kan in humhimna dik tak chu Krista a nihziate kan hmuh chhuah phah nasa hle a ni. 

Kumhlui liam taa kan thil tih zawngte hunin a liam pui rual khan hrileng mek hi liam pui ve se tiin duhthu kan sam vek awm e. Hla thu pawhin :-

Nun hlui ngaih a sawt lo, 

Kan hma lam i thlir ang;

a tih ang khan, kan hmaa kum 2021 kan hman turah hian Thufing pakhatin a lo sawi tawh angin 'A bul ṭan ṭhat chu a chanve zo ang kan ni' a tih ang khan kum bul ṭha taka ṭan i tum ang u. Kumhlui liam ta chu chelh din rual lohin a her liam ta a, kan nun ṭheuha kan thil tih dik loh, kan ze ṭha lo put te, bansan tura kan duh ngawih ngawih te liam tir zel i tum ang u. 

Kum tharah hian rilru thar, ngaihtuahna thar, kum hmasa aia hmasawnna kan hringnun ṭheuhah kan neih theih nan duhsakna hlan chungin Kum Thar Chibai ule. 

- Vidpuia Hrahsel