SUICIDE SOLUTION?!

(Thuhriltu 7:17 :- Suaksual lutuk suh la, a hek suh; i hun lo takah engah nge i thih ang?)

North East Today leh The Statesman, Dt: 5, July chhuakin a tralan danin Mizoramah hian chawhrualin thla tin mahni inthat 9 zel awm ang a ni. Hei hi NGO (NELICS) Chairman Dr. Zawm­sanga Sailo sawina eng aṭanga an hriat niin alang. Dr. Zawmsanga hian thla 6 lek chhungin Mizoramah mi 52 inthat an awm a ti. Mi ṭhenkhat chuan thu uar lutuk anga ngai an awm ang, Mizoram ṭhalai zingah mahni inthah a hluar e.

Mizoramah hian mi nuai 10 awrh kan awm a, heti taka mahni inthat percentage a sang ta mai hi Kristian ram inti tan chuan zah ngawih ngawihna tur niin a lang. Hnamdang leh ring lo mi kan tihte pawhin social media kaltlangin min nuihsawh mek bawk. Eng vang nge?

A ṭobul aṭanga zirchian a, a dan dan kawng zawk hi Sorkar leh Kohhrante tih makmawh a ni. Tun hma chuan nu leh pa te hian an fate hnenah Pathian thu hrilhin mahni nunna lak pawizia te an hrilh ṭhin a, mahni nunna la chuan tual a that a ni tih leh Vanram an kai dawn lo tih te hi kan in zirtir ṭhin dan a ni. Tunah erawh fate thu ṭha hrilh hman pawh kan awm ta meuh lo. Nun beidawng ṭhenkhatin "Hreawm awm tawh lohna hmun” ah kal tur anga an inngai phei hi chu a pawi hle.

Infuih leh thu ṭha in hrilh hian nasa takin min pui thei, mah se inthah tum tam ber, inthat leh ta lo hi zawt ila an thil tum an ṭhulh chhan ber chu “Hremhmun” a kal an hlauh vang a ni tlangpui. Nunna chu Pathian pek a ni a, Pathian chauhin a laksak leh tur a ni. Nu leh Pa leh Kohhran te hian kan fate leh kan beram te hi mahni inthat Pathianin a demzia kan in hrilh fo a ngai ta.

Kohhran leh khawtlangin zu kan do ang hian tuna min suat mektu suicide (mahni inthah) te, corruption te, mahni anpui kawp (homosexual) te hi kan do a va hun tawh em. NGO, Kohhran leh Sorkar ṭangruala kan do a ngai ta.