Tribute to Pu Laldenga

Khawvel ram leh hnam a lian a tein mi ropui leh danglam bik hruaitu Pathianin a ruat sak ṭhin. Heng mi ropui leh danglam bikte avang hian a ni hnamte an lo din­chhuah ṭhin ni.

Pu Laldenga hi chung mi ropui leh danglam bikte zinga mi chu a ni. A hming tawpa RIP tih ka dah duh ve loh chhan pawh ka thinlungah a la thi ve tlat lo a ni!

Pu Nehru-a'n, "Bur­maese ni lo, India mi pawh ni lo," a lo tih ṭhin kha a tak ngeia hretu, tuartu ka lo ni ve tawh a, chuvangin amah Pu Laldenga vanga Chi-a sawi tham loh, Mizo hnam a lo piang ta tluka ropui hi awm leh thei tak ang maw!

Chemtum nena India sawrkar ropui tak mi do tir theitu awmchhun a ni.

Ṭhangthar ṭhalaite rilruah hmathlir (vision) thui tak petu a ni. "Tuirial kama changel zozaite hi," a tih ngawt pawha, tile bang lang ṭhawt thei khawpa vision pe theitu zu nia! Aizawl khawpui chunga fighter jet rualin min beih chiam lai pawh khan "Khing te aia ṭha kan mamawh a ni," tiin min thlamuan thiam hle.

India Home Minister pawh khan tihngaihna a hre lo, "Laldenga talk very sweetly," a ti tawp mai a nih kha. Pa rorum zet India Prime Minister Moraji Desai meuh pawh a mangang ve a ni ang, "I will make Laldenga alright," tiin Bihar Jail-ah a khung hmiah mai!

Independence hi kan hmu thei rih lo a nih dawn rau rau chuan hahchawlh nan Kasmir-a thil thleng tawh, Sheik Abdullah Chief Minister ang tal khan a bo a bang awm loin India-ah kan lut leh mai a ni ang chu... tih a vision kha kum 1969 kumtir lam khan a lo thlir pha tawh a ni.

Mipui tam tak hma, AR Lammuala a thusawi ropui zet kha ka bengah a la cham reng. "Aron-a hoin sebawngno Lim in lo be mai ang tih ka hlau a ni," a tih pawh kha a thukin a ril reih rawih hle mai. Vai pawla kan intukluh thuk lutuk a hlauh vang a ni ngei ang. Amaherawhchu, khami ṭuma lawmthu sawina chang a hre lo kha chu 'Ṭawngkam ṭhain sial a man' tih kha a mangnghilh palh em ni ka ti ṭhin.

Pu Laldenga, Dan­mawia Pa thihcham­phaphak 25-na a lo thlen hian ka ngaih­sanna a zual a. Chi-a sawi tham loh, Mizo hnam puang darhtu atana Pathian belruat ngei a lo ni e.

Mizo hnam dam reng rawh se.