School ṭan hma leh a kaihhnawih
Zu vanga kan inhnialnain ziaawm lam a pan ṭan niin a lang a, a thlaktu atan school kai hun sawn chungchang sawi teh ang. Kan sorkar hian zirna siam ṭhat a tum nan hian duh aiin hma a la chak mah mah ṭhinin ka hria. School Calendar leh Text book thlak tih velah rang tak takin hma a la a, kan in siamrem ve ṭan dawn chauh tihah a chi dang min hlui leh a. CCE hmangin Mizoram pum zirna awlsam takin min rawn thlak sak leh a, kum hnih vel kan practise hnu hian a nihna tur ang taka kalpui thei school hi zaah sawm hnih (20%) kan awm ang em le?
Tunah school ṭan hma turin thingtlang leh khawpui angkhatin min hrut rual an tum leh ta chu a nia! He thil hian eng ang takin nge Mizoram mipui hi min nghawng ang tih sorkar hian a ngaihtuah kim em aw? Thil thar kan rawt hian a rawttute awmkhawmna hmun (Aizawl) chiah em ni an ngaihtuah ṭhin? A bik takin thingtlang mite hi he thil tharin a nghawng nasat tur kan nih avangin zaa sawmsarih (70%) vel chuan kan duh miah lo.
Thingtlangah chuan keimahni hna leh hlawhfa inrawih dan thlengin a nghawng dawn a ni. A chhan chu zing chaw (tukṭhuan) ei hma miau chuan hlo thlawh leh ram hna dang tinreng thawhnaah chawchhun kan ei hma a ngai dawn a. Chawhnu lamah hlawhfa/ lawmte haw hma pui leh in lama kan fate school bang hmaho ngaihven tur chuan kan haw hma leh thei roh si lo ang. Tichuan, kan fate naupang te te chuan dai hnai lui kal velna hun, kawngpui leh hmun danga ball pet, TV en leh inkhualtelemna hun chu an ngah tawh ngawt ang le.
Han han sawi tak tlemte chauh pawh hi Aizawl khawpuia awm (a tam zawk chu) qualified em em vang pawh ni bik loa sorkar hnathawk hausa tak tak, lirthei nena nitin office kal thei, tlai lama an fate school bang lo buaipuitu tur awmpui la thei, an tlan velna tura motor kawngpui lo thawl phah hret beisei ho hian an hrethiam ve hlek lo ang. School ban hnua thil dang zirtir lehna hun a tam deuh beiseiho pawh hi a tak taka kalpui thei chu Mizoram school naupang hmun lia ṭhena hmun khat vel bak an ni lo ang.
Hengte avang hian a tam zawk mil hian la kal mai ila a ṭha hrih ber ang. A zirchiangtu inti (MZP) lam te pawh khan an zirchianna bial hi an tizim lutuk a ni ve thei. Kan chaw leh kan chaw ei hun pawh insiamrem ve mai duhho pawh khan buh chauh chawa la ngai Mizote (a bikin thingtlang mite) insiamrem harsat turzia hi an ngaihtuah phak lo a ang hle. Thil ṭha tak nia lang hi zir chian ngai tam tak a awm a nia.