Designation plate tar thu bawk kha
Inhnialna ṭul lem lo nia ka ngaihah kan inhnial chiam zel tho bawk a, ngaihdan thawh ve ka duh e. Kan ram pawh kan lo changkang ve ta hle a, mi state changkang zawkte hnungah kum 10-20 vela kan hlat a nih pawhin chak deuhin hma lam panin kan tlan ve zel a.
Mi fel leh thil hre tak tak an tam a, sawi mawi loh tur zawk nia lang an han sawi mawi tak tak phei chuan 'a ni ve thei tho awm mang e' tih mai theih khawpin an hriain an sawi thiam a ni.
Vawiin thlenga mipui ngaihdan la phir tlat chu school ṭan hma chungchang, MLPC Act 2014, MPSC Chairman leh Member ruat dan, Zokhaw lam Sumo stand, Kelkang harhna, officer te designation plate tar leh adt. Kohhran motor thlengin sawi a ni. A sawiseltu lam hian an uar deuh em aw ka ti.
Kan khuaah Synod Moderator, Sr. Executive Secretary leh Executive Secretary dang te, SMB Secretary te pawh tun hnai kum reilote chhung hian an lokal a, a lo dawngsawngtu kan ni zel a, an motor-ah Kohhrana an designation intar ka hmu ngai lo.
Kohhran leh sorkara nihna pawimawh neiten an motor-a an nihna an tar hi eng vanga ngaimawh em em nge kan nih aw! Khawii hmunah pawh officer, sorkar motor kawlte an motora an chuang a nih chuan BDO Lungsen chu Lungsen BDO a ni mai a, CDPO Khawbung pawh chuti tho. Kha officer kha a indah pawimawh leh a chapo vang ni loin a nihna dik tak nen a motor-ah a chuang a ni mai.
Sorkar hnathawk motor kawl thei chinten an motor-ah designation plate an tar a nih pawhin an nihnain a tlin a, an tar a ni mai. Duthusamah phei chuan an motor-ah hian tar vek zawk se. An vahvelnaah dik lo taka motor an hmang a nih pawhin designation plate an tar chuan hriat chhuah a awlsam zawk mah dawn a ni. La nei lote leh kawl lote pawhin nei thar vek zawl se, a tarna tur motor dik takah tar vek rawh se.
Plate tar a ṭhatnate han sawi ila; hengte hi kan hre thei ang.
1. Officer ten eng tihnan nge sorkar motor an hman? 2. Eng department mi nge a nih, office a kal tlai em? 3. Anmahni lo dawngsawngtu turten an hriat mai theih nan zin chhuak tur phei chuan tar ngei se.
1. Plate vang hian traffic jam leh zin velnaah pawh motor dang nen in siamrem a ṭul changin VIP bik lem lo se. 2. Traffic duty-te hi plate hian engti zawng mahin tibuai lo se. 3. Designation plate aiin an hna an tlin tawk em tih hi ngai pawimawh se, a ṭha awm e.
VIP/ VVIP tak tak chuan engmah tar lo mah se mi hriat an hlawh tho. Chuvangin, designation plate tar thei chinte hi chu sorkar hian tartir vek rawh se.