ADVERTISEMENT TIH DAN PHUNG SIAMṬHAT
Comptroller & Auditor General of India (CAG) Report hnuhnungah khan AMC sum felhlel, cheng vaibelchhe 3 leh nuai 16-ah a mawhphurtu zawng chhuak turin Mizoram sorkar a hriattir thu ka lo chhiar ve a. Ka rilrua lo lang chu, sawrkarin advertisement a kalpui dan hi ennawn a, siamṭhat vat a ngai niin ka hria.
CAG Audit report-a a lan danin, AMC hian lirthei, truck 45 an tihral danah thil fel lo tak a awm niin a lang a. Heng lirthei an lilâmna pawh hi media lamah zau taka puangzar lovin, Chhawrpial chanchinbuah chauh kum 2019 March ni 8 leh ni 13 khan chhuah a nih thu an pha lo a nih hmel a.
Mizoram sawrkar hian advertisement tih dan phung mumal tak, dan zawm tur a nei lo nge ni a, sawrkar leh department lamte hian anmahni duh duh danin mipui hriat tur thu pawimawh hi an puangzar mai zawk tih a ngaihtuah theih. Chhawrpial chanchinbu khi ka hre ngai lo va, a len leh len loh chu thuhran, eng vanga chanchinbu pakhat chauha chhuah nge a nih tih hi zawhna lian tak a ni.
Hetiang teh niaih hi kan nih tak si-ah chuan, sawrkar hian dan kan neih laite a ṭha tawk tawh lo a nih chuan siamṭha ngei se. Chanchinbu, mipui hriat hlawh lo leh a copy pawh chhuak tawh mang lote chu advertisement pawh pe tawh lo mai bawk se. Chanchinbu pakhat chauha chhuahte khi a fel lo tak zet bawk. Mipuiin an hriat ngei tur thil, mi tlemtein an hrait theih tura hmalakna ang pawhin a ngaih theih rum rum tlat a ni.
CAG Report kan hmuh aṭanga AMC advertisement tih dan en hian, thuneihna hmansual theihna kawng a inhawng zau hle niin a lang a. Chu chuan dik lo taka sum hman theihna leh eirukna kawng zau takin a hawng niin a lang bawk. Sum fel tawk lo tam tak a awm thu hriat a ni nghal zat mai bawk si a. Hetiang thil hi mipui zah lohna niin a lang a ni.
CAG-in a phût ang ngei hian AMC lama lirthei hralhna chungchang hi chhui chhuah ni se. He thil aṭanga lo lang, advertisement tih dan phung pawh hi mumal tak leh felfai zawka kalpui a nih theihnan Sawrkar hian hma laiin, siamṭhat ngai lai te a awm a nih chuan siamṭhat thuai ni thei se a duhawm hle mai.
- Madawnga Khiangte, Rulchawm