Vaichhia i ti maw

Mizote hi hnam induh tak leh chapo tak nihna chin kan nei a, kan ram chhehvela hnam dang awmte pawh hi keimahni aia hnam mawl leh fing loah ngaiin ṭawngkam mawi lo leh dengkhawng tak takin kan sawi ṭhin a ni. Entir nan, vaichhia tih te, kawlkerang tihte leh a dang pawh sawi tur a awm nual awm e.

Hetia kan chhehvela awm hnam dangte chungtlak taka kan sawi lai hian keimahni Mizote aia hnam fing hmasa leh changkang hmasa zawk daihte an lo ni thei tih kan ngaihtuah miah lo a. Pu Rokunga'n "Hnam dang hmusit mai lovin ṭhianah i siam ang u," a lo tih hi zawm a ṭha hle a ni.

Mizote hi hnam naupang tak mai kan ni a, ziak leh chhiar kan thiamna pawh rei lo te a la ni a. Kan ṭawnga A AW B kan neih hma daih khan khawvela thawnthu ngaihnawm leh ṭhaa an sawi William Shakespeare-a thawnthu ziahte hi Bengali-hote chuan an ṭawngin an lo chhiar thei daih tawh a. Tuna Mizorama vai awm tam bette hi Bengali an ni a, vaichhia tia kan lo koh nawmnah mai maite hi an ni nghe nghe awm e. Keimahni aia hnam fing hmasa leh changkang an lo ni daih tawh a nih chu. Mizote ai chuan hnamah pawh an lo chiang hle a ni ang, ralthuam leh tharum tel miah lo pawhin ram an la duai duai thei a, kan ram chhehvela kan tlangmipuite pawh an chimral deuh vek tawh a nih hi. Ram an lak theihna tur a nih phawt chuan an mipate’n hnam dang hmeichhiate nupuia neih mai pawh an hreh lo. Hetih lai hian, an hmeichhiate ve thung chuan hnam dang mipate pasalah an nei ngai meuh lo tih theih a ni. Mizo hmeichhiate nen chuan an danglam hle a nih hmel a ni.

Sumdawnna pawh hi ram leh hnam humhalhna ṭha tak leh hmanrua ṭha tak a ni tih hi an hre chiang hle a, chu chu a takin an hmang nghal zel bawk a. Khawi hmunah pawh awm se la, an hnampuite dawr a awm phawt chuan hnam dangte dawrah thil an lei ngai zen zen lo a, hla deuh mah se la an pan ṭâng ṭâng ṭhin a ni. Tuna Mizorama vaichhia tia kan auh nawmnah em em, thirchhe zawng leh chhangthawp kawtte pawh hian Mizo thingpui dawrah ai chuan anmahni hnampui vai thingpui dawr an pan hram hram zel asin. Vaichhia tia i lo hmuhsitte hian nang aiin ram leh hnam an humhalh thiam daih zawk a nih chu.

Tun hmain Mizo fate zinga hausa hmasate pawhin Silcharah dawr an lo zuk hawng ve tawh a ni awm e. Nimahsela, vaichhia i tihhote hian Mizo dawr chu tu ma’n an dawr ṭhat duh loh avangin an titawp leh ringawt mai, an ti. Keini lah chuan vai sumdawngte thil zawrh kan nêp thei si lo a, cheng hnih khat leka tlawma an thil zawrh kan lei luai luai hian, zawi zawiin min chimral hret hret zel tih kan hre si lo.

Sapho khan ILP hmangin Mizote hi kan in humhalhna tur lo siam lo phei se la chuan, hmusit taka vaichhia, vaichhia tia kan auh nawmnah leh kan sawite hian hman hmanah min chimral daih tawh ang chu. Tunah ILP hmanga kan inhumhalh chung pawh hian dan lova Mizorama hnam dang awm an tam turzia hi i ngaihtuah

ngai em?

Chuvangin, tuna kan sawrkarin dan loa Mizorama hnam dang awmte dap chhuah a, thawn haw a tumnaah pawh hian ṭanpuitu ṭha tak i ni dawn nge, dawn lo? Ka zawt a che.

Hetih lai hian, mi ṭhenkhat chuan, heng vaiho dan loa awmte hi hum an tum leh mai thei a ni. Nang chhiartu duh tak, kan ram leh hnam a lo dam theih nan, dan loa hnam dang awmte dap chhuah rûnpui neihah hian i theih ang angin a buaipuitute lo ṭanpui ve ta che.

- Hausanga Hauzel