KAWNG LEH MIPUITE

Dawrpui Vengthar Presbyterian Koh­hranten Vaivakawn - Dawrpui Bungkawn kar kawng siamṭhat ngai si, siamṭhat hna Kohhran mipuiten Kohhran sum senga an han thawk mup mup mai hi a ropuiin a chhuanawm e.

Pente­cost thlen hnua ringtu hmasateho awm dan kha niawm tak a ni. Sawrkar leh Municipality-te tlakchhamna lai an han phuhru mai hi, an tih tur awm tak ti-ah te pawh a ngaih theih ve tho ang.

Hman lawk thleng khan Kohhran/ KṬP/ YMA-te hian Inkhawmpui leh eng emaw tihpui nikhuaa silpauline, buhfai, LPG, petrol leh thil danga ṭanpuina sawr­kar hnenah an dil kumtin ṭhin a nih ngai kha. Gospel campaign pui leh Centenary lawmnaahte pawh tui leh power-te chu sawrkar tum ve tura ngaih a nih fo ṭhin kha.

Missionary hming­thang leh Gospel spea­ker khawvel hriat thama larten min rawn tlawh chang pawhin, sawrkar Guest House-a thlentir leh din­ner pui tak CM hialin a lo buatsaih ve tura ngaihnate pawh a awm deuh roh ṭhin hi maw!

Plan/ Non-Plan fund lamin a daih miau loh takah chuan, kan Kohhran lianten a chhelai siamṭhat hna an han thawk ve ta hian social responsibility lam ngaih pawimawh nachang kan hre deuh deuh taah ngai ila; intihhmuh zel chite pawh a ni mahna. A sawrkar pawh hian budget hman zai dan leh inrenchem dante ngaihtuahna thar hmanga hma thar an lak phah dawn phei chuan, a khat tawka an mawhphurhna han peizawnpuite pawh hi a ṭha phian thei e.

Kumin May 20 khan Bombay High Court (2 Bench) chuan suomoto PIL case-ah ti hian directives zu siam mauh a - ‘Khawpui chhunga kawng mam leh ṭha (pothole-free road) neih leh public streets tihnawk thei thil senghawi hi khawpui enkawltute mawh a ni a; khua leh tuite fundamental rights (Article 21) Right to life hian chungte chu a huam tel a. Kawng chhiat vanga tuar emaw chânna (hlohna) emaw nei chuan zangnadawmna an phut thei ang.

Chuvangin, Mum­bai Metropolitan Regional Development Authority (MMRDA) te, Maharashtra State Road Development Corporation (MSRDC), Mumbai Port Trust (MbPT) te leh Thane District huam chhunga muni­cipalities pathumte hian an thuneihna huam chhunga kawng (public streets) leh foot paths zawng zawng hi an siam ṭha nghal tur a ni’ a ti. He inte­rim order hi, July 10, 2015 ah hearing an nei chhunzawm dawn a ni.

Tuna a lan dan chuan, he High Court thutlukna hi Maha­rashtra Sawr­karin emaw Supreme Court hnena appeal hnuah tihdanglam a nih loh chuan, States dangte pawh a kangkai lo ang tih a sawi theih loh. Mipuiten tual­chhung enkawlna leh inrelbawlna chhiah kan chawi ṭhin phu tawk ang zelin, khaw­pui enkawltute (State sawrkar pawh tiamin) kawng ṭha leh hmantlak min siam loh chuan, mipuiten Court-ah kan tawrh phu tawk ang tur, compensation kan phut thei dawn tihna a ni ang. Mipuite tan kawl a eng dawn ta pawh a ni mahna.