Designation Plate = Hriat hlawh duh vang!

Mihringin a tum ber leh chak ber chu mi dangte hriat nih leh lar nih hi a ni awm e. Mi dangte aia chungnung bik, hmel ṭha bik leh pian nalh bik, hausa zawk leh motor nei ṭha zawk nih te hi alawm kan chak em em a ni. Kan ṭhenawm pa, ṭhenawm nu, kawmthlang pa leh kawmchhak nu nen thil engkimah kan iner a, kan inel ṭhin chu a nih hi. Chutiang chu ni lo se tumah hi kan elin, kan er peih tawp lo ang.

Eng vangin nge mi tam tak zai thiam hlei lo te pawh hian sum tam tak senga Music video te an siam a, demand channel-ah te hial an dah ve ṭhin kan tih chuan mite hriat nih an duh vang leh lar an duh vang chauh a ni. Eizawn nana hman tum erawh an awm ve tho bawk. Mahse tun dinhmunah chuan Mizoram bikah zai hi eizawnna tlak tak tak erawh a la tling meuh lo niin alang. Mizoram ram zim te, a mi chengte pawh mi nuai sawm chuang awrh state-ah hian hetiang em ema zaithiam (zai thei an ni zawk mah ang chu) hi an tam em em a, eng dang vang mah a ni lo, sawi tak ang khan mite ngaihsan nih leh hriat nih kan duh vang mai mai a ni.

LPS lamin Youth Icon an thlan hi ṭawmpui ve mai awm an nih laia Zonet lamin eng vanga Mizo Idol hi thlang veleh kher nge an nih tihte pawh hi han ngaihtuah chet chet chuan eng dang vang a ni chuangin alang lo, mipuite lakah Zonet cable leh LPS cable hian a ṭha zawk leh a lar zawk nih an duh vang mai mai niin alang. Khawvela kan awm chhung hi chuan kan inelin, kan intlansiak tur a ni na meuh mai, mite aia chungnung zawk leh ṭha zawk nih pawh kan tum tlat tur a ni a, lar pawh kan tum tur a ni. Mahse mi dangte aia chungnung zawk nih kan duhna kawngah erawh midang chan ai lak sak zawng leh midang tichhe zawng ni loa kal thiam a ngai. Engkim hi a lutuk chin chu a ṭha lo a ni.

Tar thei tur chin leh tar pha chin (a bikin sawrkarah hian) pawh ni hauh si lotena eng vanga designation plate hi an lirtheiah leh an kawngka biangahte hian tar vah ṭhin nge an nih kan tih chuan mite hriat nih leh ngaihsan nih an duh vang mai mai niin alang. A tar pha tur chin leh a tar thei tur chintena an tar hi kan thik lem lo.

A tar thei chin leh a tar pha tur chin ni ve miah lotena Designation plate kan tar ve ringawt chhan hi mahni kan indahhniamna rilru aṭanga rawn chhuak niin a lang lem lo. A tar pha chin ni ve miah lotena kan tar chhan ber nia ka ngaih chu chapona vangah ka ngai a, chopana hi mahni indahhniamna aṭanga rawn chhuak a ni lo.

Tlawmngai pawl leh kohhran pakhata an hruaitu tena designation plate an kawngka chungah leh an motor (a bikin kohhran) hmaah an tar ṭhin hi chu tih makmawh niin alang ve leh thung.

Veng tam takah tlawmngai pawl leh kohhrante pawhin Branch/ Unit etc an nei hrang thluah a, chunga hruaitute chu an inhriat pawh a ngai a, member-ten an veng tlawmngai pawla an hruaitute kha awlsam taka an hriat theih nan, hmun dang khaw dang aṭanga rawn kalte pawn chumi venga thlawmngai pawl hruaitute chu an hriat theih nan a pawimawh tlat. Pawl hruaitu ni lem lo, member satliah khan an kawngkhar lu chungah designation plate lo tar ve vuah ringawt ta se eng tin nge miten an ngaih ang? Chuan kha member satliah khan eng vangin nge a tar ve ringawt kan tih chuan mahni indahhniamna aṭanga mahni indah pawimawh duhna thinlung a neih avanga tar ve ringawt bak a ni lo ang.

Mite hriat nih kan duh luatna hi dah bo ila, a tar pha tur chin leh a tar thei chin ni ve miah lote hi chuan designation plate te hi kan motor hmaah te hian i tar lo ngam ang u. Kan inrawlh ve na tur thil ni miah loa inhnamhnawih ve phet kan tumna hian zahna min thlen thei a, mite nuihzat kan hlawh phah thei bawk. Mahni kuang lo nawr chu sawisel leh dem hlawhna bak a ni lo tih hretute vek kan ni si a.

Mite hriat hlawh kan duh luatna avang hian keimahni leh keimahni hi zahna tur i insiam lo hram ang u. A tar pha chin kan nih loh chuan designation plate te hi tar lo ngam mai ila, mite ngaihsan kan hlawh zawk ang.