Dan bawhchhiain harhna City Bus-in a chhim lo

Dt 7.7.’15 Vanglaini-a thuchhuah City Bus lem chuang kalh chunga City Bus/ Town Bus-in Dan bawhchhiain harhna an chhim tih Lallianzuala Fanai ziak chu ka lo chhiar ve a, a ziaktu hian thil a hre fiah tawk lo hlein ka hria. Hetianga chanchinbu meuha thuchhuah tur chuan in zirchian deuh ṭhin ni se a va duhawm em! Thu belh chian dawl lo chhuah hian mi a hruai sual thei a, ngaihdan dik lo tak min neihtir thei hial ṭhin a ni.

Thil awm dan chu hetiang zawk hi a ni. “City Bus/ Town Bus-te hi an hming putna ang khawpui chhungah chauh tlan phalna pek an ni” i tih hi i hre sual hle a ni.

Dt. 30th September 2014 a City Bus / Town Bus permit pekchhuah kha en chiang la, hetiang hian permit-ah a inziak. “State Transport Authority Meeting chuan a hnuaia tarlan ang hian City Bus/ Town Bus permit a pe a” tiin, a hnuaiah tlanna tur hmun (Route) :- Aizawl City tih a ni leh mai a, “Aizawl City Area-ah chauh a tlan tur a ni” tih a inziak lo. Tin, Terms & Condition-ah pawh engmah a inziak lo bawk.

“Mamawhna avang leh hriat lohna avangin khawpui dangah te kalin Dan bawhchhiain Bus kan hmang tihna a lo ni” i tih phei hi chu Dan bawhchhiatna reng reng a awm lo. Aizawl City a service tur chu an ni ngei a, mah se Danin a phal angin leh mipui mamawhna avangin Motor Vehicles Act 1988 Section 87, Sub No-1 leh Section 88, Sub No-8 in a phal angin Bus neituin Special Permit a lak chuan Mizoram chauh pawh ni loin India ram chhung a duhna hmun hmunah ni tiam chin awmin a zin kual thei a, Dan a bawhchhe lo a ni. Accident an tawh pawhin Special Permit nei chuan Dan ang thlapin insure a claim thei a, mi engemawzatin an lo claim tawh bawk a ni. City Bus te hi City Area-ah chauh ni lo, khawthlang lamah Lengpui, Reiek, hmar lamah Sihphir, chhim lamah Muallungthu, chhak lamah Tuirial thleng hian permit lak ngai loin Sawrkar phalnain kan kal thei a ni.

Heng Pik-up leh Tipper etc te hi chu Goods Carrier an ni a, passenger an la ve thiang lo a, accident an tawh pawhin an claim ve thei lo. Heng hman hi chu Dan lo a ni reng a, chuvangin mipuite pawhin hman loh hi a ṭha khawp mai. India ram news kan en ṭhin chuan sakhaw thil avang leh inneih mo lawm avanga Truck pakhata mi 40/50 thih thu hi hriat tur a tam em em laiin Mizoramah chuan hetiang thu hriat tur a awm miah lo te hi a enkawltu Tranport Department te hi an fakawm hle a ni.

Tin, Aizawl veng hrang hrangah hian STA chuan Line Bus engemawzat a tlantir a, heng Line Bus te hi an zin chuan an aiawha tlan tur City Bus angin an nei ve lo a, mipui (a veng neitu) ten nasa takin an tuar a ni. City Bus te chu nitin 40 chuang an ding a, zin an tam lai chuan ding awm loin City-ah an tlantir mai ṭhin a ni. Hei hian mipuite harsatna tur nasa takin a sukiang a ni. Chuvangin, Sawrkar hian Line Bus te hi chu zin phalsak tawh lo se a ṭha hle ang.

Mi ṭhenkhat chuan Institution tlawh­chhanin Bus an lei a, chhiah pawh Sawrkarah tlem zawk chhungin School etc atan te an tlan a, hengho permit laa an zin ve vak vak pawh hi a dik lo hle a ni.

Hetiang hi thil awmdan a nih avangin miin Pathian Thlarau Thianghlim beisei leh Pathianah lawmna zawnga Kelkang an kal avanga Aizawla Bus Stand-ah minute tlemte Bus nghah a ngaih avanga phun mai loin kan Missionary-naah ngai thei ila a va ṭha em! Hengte avanga i phunnawi mai a nih chuan i Kristianna a pan hlein i YMA lo bawk kan ti thei ang.

A tawp berah chuan kan Sawrkar hian Aizawl Taxi te All Mizoram Taxi a tih ang hian permit lak buai ngai loin a duh tan City Bus te hi All Mizoram Bus permit hi pe ve mai se a ṭha ngawt ang. City Bus te hi khawpui pawn lamah zin phal loh ni ta se kan khawmpui hrang hrang neih ṭhinte hi a hlawhchham thei hial ang. Hei vang hian City Bus te hi City area pawn lama an chhuah theih avang hian mipuite harsatna hi City Bus te hian kan la sukiang mek zel zawk a ni.