Aizawl Municipal Council (AMC)

Aizawl Municipal Council (AMC) hi a lo din phat aṭang khan a chanchin leh a hnathawh hian chan­chinbu leh TV lam chanchin tharah hmun a luah tam ta malh malh hle mai. Aizawl mipui tan bika siam leh din a nih rualin ram pum mipuite tan pawh ni tel ve se ka duh a, ka ngen nghal bawk e.

Aizawl hi state khawpui a nih avangin a chhunga chengte ta bik chauh ni loin, ram pum mipuite ta, thingtlang miten mamawh chi hrang hrang kan thlenna leh kan lakna hmun a ni. Damloh harsat tawkin doctor leh damdawiin ṭha zawk beiseiin Aizawlah kan kal a. Kan kutkawih hnathawh rah hralh dawn ila Aizawlah bawk kan kal a, sorkar thil pawimawh zawng zawng dawr dawn ila Aizawlah bawk a ni. Chhungkaw mamawh chakkhai thlengin Aizawl tih vek a ni a, chuvangin Aizawl hi Mizote khawpui, kan zavaia kan ta a ni.

Aizawl Traffic jam tih ziaawm nana hmalaknaah tha a awm chuan ka thlawp, mah se thiangtlang Sumo zing dar 6 hmaa chhuakten traffic an ti jam miah lo chunga hnawh chhuah luih an ni hi a ṭhatna ka hre lo. Thingtlang mite kan buai phah vak a, ṭul loah sum kan sen belh ṭeuh a, khawpui mi tan lah hlawkna a awm chuang der si lo. Chhun lama Sumo lut leh chhuak erawh ka sawi lo.

Thingtlang mite pawh hi mihring/ Mizo ve tho kan ni a, Sumo stand sawn chhuah hi ram mipui tan a ṭha zawk a nih pawhin zing ruahsur laka kan him ve nan Stand-ah hulhiap, inthiarna leh ṭhutna te min siamsak vek hnuah chauh ni thei se. Ui leh ar, vawk leh ran ang leka thingtlang mipui min enkawl a, min thamlo lutuk hi AMC hmingchhiatna tur niin ka hria.

Thingtlang mipui mawl zawk, rethei zawk­te chanvo ṭha pe ve hram turin AMC ka ngen e.