AR Ground aiah Aizawl Square

Hman ni lawk, July ni 24, 2025 khan zawhna phûrawm tak mai ka dawng hlawl a, chu chu hei hi a ni. Kumin thlasik chho December thla laihawl vel hian Bon Jovi ten Mumbai-ah concert an rawn neih tur thu leh Aizawlah concert rawn neih ve an hman tur thu a ni a. Mahse, AR Ground hi concert neih nan an duh aia a têt thu leh Rajiv Gandhi Stadium an dil a, mahse, concert neih nan stadium thuneitute’n rem an lo tih loh thute min hrilh pah chuan, hmun remchang dang chutiang concert neihna atana hmun zau leh khawpui chhung hnaih si kawhhmuh tur ka hriat leh hriat loh min zawt zui zel a. Amaherawhchu, chutiang an duh ang hmun dang a awm loh thu kan sawi ho hnu chuan, min zawttu Aizawla Bon Jovi concert neihtir hram tumtute’n an uizia hahîpa an sawi rual chuan, kei pawhin Bon Jovi concert Aizawl ngeia an rawn neih remchan ve laia kan lo dawngsawng ve thei lo tur chu ka ui ngawih ngawih a ni.

Aizawl khawpui hi sap min awptu hmasate’n mihring sing thum vel la tling thei tura an hmathlir kha tunah chuan a let sawm zetin, mihring nuaih thum chuang zet kan lo awm ve ta reng mai a. Tun aṭanga kum 100-ah phei chuan One Million City Capital la nih ve hun pawh a la awm turah ngai ila. Chutiang tur chuan tuna Assam Rifles ram chhuahsan ṭan mek hi hman ṭangkai dan tur rawtna eng eng emaw rilru a awmte mutbopui mai lovin, mawlmang takin ka han au chhuahpui ve dawn teh ang.

Master Plan ṭha tak

Assam Rifles ram Aizawl khawpui laili taka awm hi sipaiin an chhuahsan huna a chhunga hmun pawimawh leh luh chhuahna kawngte felfai taka lo duan lawk dîm diam ni se. Chumi atan chuan tun aṭangin Master Plan ṭha tak UD&PA / Sports Department ten lo duang mawlh mawlh nghal mai se la. Helai hmunah hian heng a hnuaia mite hi piantir hram ni se a duhawm hle.

Aizawl Square zau tak leh mawi em em

Tuna Sipai Lammual, AR Ground kan tih fo hi Aizawl Square tiin a hming thlak zahpuiawm loh khawpin a lêt thum/ li vel tala lian zawl zau tak kan mamawhna a sang hle a ni. Chhuah lama ram awih pang hi rinawm tak leh nghet taka dâwl niin, helai hmuna building sak tur atana lei laih ngai tur zawng zawng bakah Aizawl khaw chhunga in hmun lo ram laite’n leivung rawn paih nan kum hnih khat hmang ta se, a zâwl zau chak viau turah ngai ila. Aizawl Square hi Independence Day, Republic Day, Chapchar Kut, concert, VVIP rawn kal changa mipui punkhawmna tur, etc. duh thâla hman theih tur khawpa zau neih a ṭulin a duhawm tak zet a ni. Kan engineer leh architect thiam tak takte’n mawi tak leh zahpuiawm lo takin an plan thiam em em ngei dawn a ni. Tin, entrance leh exit gate pali tal duan nghal ni se.

Emergency & Trauma Centre

Rîkrum thilah, entir nan, accident lian leh lirnghing, leimin, etc. ah Civil Hospital Casualty hian min dâwl zo dawn lo tih chiang takin a lang sa reng a. Hetiang hun bik atan hian mangang leh nunna chhanhimna hmunpui tur lo in ruahman lawk sa dîm diam a va ṭul tak em. Entir nan, 07.07.1981-a Kawnpui dai bus accident ṭum khan Aizawl Civil Hospital hmunhmain emergency leh trauma case a dawnsawn zawh lohzia leh doctor leh nurse-te mangang an phîli buai nasatzia kha khatih hun laia a hmuna awmte’n mit ngeiin chiang takin kan hmu a ni.

Fire brigade hmunpui

AR Ground ram chhungah hian kângṭhelh hmunpui dah theih ni se. Helai hmun aṭang hian khawi vengah pawh kângmei chhuah nikhuaah rang taka tlan chhuak nghal mai thei turin a remchang lehzual turah ngai ang. Tuna Fire Brigade inbunna hmun Hunthar Veng aṭang hi chuan kângmei a chhuah palh changa fire motor tlan chhuah hi a rang mawh hle ṭhinin a rinawm.

Aizawl Mega Parking Centre

Aizawl khawpui chhunga bazar tura lirthei nena kalte’n (Aizawla cheng mekte leh thingtlang aṭanga rawn zinte) motor dahna tur parking zau tak mamawhna hi a sang hle a ni tih vawiin ngeiah hian kan chiang ṭheuh awm e. A hranpaa parking tur hmunin a daih dawn lo tih chiang sa chu ni bawk mah se, Assam Rifles hmun chhunga building piang tur zawng zawng hnuaiah hian parking duhâm takin ruahman lâwk vek ni ta se la. A nih loh vêk pawhin, Lammual zauhna tur hnuai hi parking atan eng emaw zah ruahman lâwk ni ta se la. Helai hmun aṭang hi chuan Aizawl bazar khawi hmunah pawh kal duh tur tan ke pawhin hmun hla em em awm lovin, bazar turte tan motor dahna a remchangin a awlsam em em dawn a ni.

Pedestrian walkway

Bazar Bungkawn Traffic Point aṭanga Vanapa Hall thleng hian tuna Assam Rifles ram lamah hian kawngkam sirah kea kalna pedestrian walkway (footpath) siam ni bawk se a duhawm hle. Hei hi kea kalte tan a himin a ṭangkai em em dawn mai bakah, khawpui chhung cheina a tling hial turah ngai ang. Tuna lehlam chauha kea kalna awm pawh hi a chêp em em a nih hi. Tin, kea kalna hi zau hek hawk, a lo berah ft 6-a zau ni thei ngei bawk se la (nihliap khum chunga kalte pawh harsa lova an inkal pelh theih nan). Tuna tlak lama kea kalna hi ft 2 talin zauh nghal ni bawk se la, kawng a ei hekna chu sipai ram lam hi nêk zau ni mai ta se. Tin, ke a kalna sirah thing buk mawi chi, zung ṭâi darh zau lo chi phun chhuah vek ni bawk se. Hei ringawt pawh hian Aizawl khawpui kawng dung hmel hmai a timawi sawt ta ve ang.

Curve cutting

Bazar Bungkawn leh Vanapa Hall inkara Assam Rifles ram chhung mual kual kawi zualte hi lak mar deuh ni nghal se la a lawmawm ngawt ang.

Entrance to Aizawl Square

Kan kawngpui aṭanga Assam Rifles ram luhna reng reng hi bung vut lo se la, vei lam leh ding lamah luh chhuahna angle zau tak duan nghal ni se. Hei hian motor lut leh chhuakin lamlian kawngpuia lirthei kalte a tihbuai loh nan.

Recreation Park & City Tower

Remchang a awm theih chuan car parking chungah recreation park lian em em lo, a hming lek pawhin awm ve hram thei se. City tower, Aizawl chhuah lam leh tlak lam vengte lang thei vek tur khawpa sang, ni chhuak leh ni tla mawi tak hmuh theihna tur hmun buatsaih ni nghal bawk se. Hei hi Aizawl a cheng mek mipui mai bakah, ram pawn aṭanga khualzinte tan Aizawl mawina tibelhchhahtu a nih ngei a rinawm a ni.

Ring road & link road

a) Bara Bazar aṭanga Zion Street chhohna kawngpui hi mihring kea kal nan chauh hman ni tawh se.

b) Bara Bazar aṭangin motor kawngpui hi Modern English School-aṭangin Assam Rifles ram chhungah tlang phei zelin chhuah lamah Dak Inpui bulah chhuak phei se.

c) Armed Veng leh Chhinga Veng aṭanga rawn chhote pawh Bazar Bungkawn kawng chhuk chho ing-euh lutuka chhuak chho lovin, Assam Rifles ram chhunga kalin Dak Inpuiah chhuak ve ta se.

d) Aizawl chhuah lam veng hrang hrang heng–College Veng, ITI Veng, Mualpui, Bethlehem Veng, Saron veng, Tuithiang, etc. etc. te tan helai ram paltlang hian tuna kawng awm sa aiah hian kawng zau zawk sial ni thei se.

Auditorium lian leh changtlung tak

Aizawl khawpui chhunga hall kan neih len ber chu Vanapa Hall, kum 1983 aṭanga kan hman hi a ni mai awm e. Hetah hian mi 700-1,000 bawr vel chêp takin kan inhnawh leng thei ṭâwk ṭâwk chauh a ni. Tun dinhmunah chuan a lo tê tain, a duhkhawpawm lo ta hle a ni tih kan hre vek awm e. Chuvangin Aizawl Auditorium/Hall changtlung tak, mihring 3,000 vel tal leng thei tur helai hmunah hian hûn ngei ni se. Tin, AC, exhaust fan leh inthiarna (wash room) ṭhahnem tak mai bakah, rîkrum thila luh chhuahna tur kawngkapui ṭhahnem tak awm nghal ngei bawk se. Tuna Vanapa Hall-ah hi chuan thil pui tham deuh huaihawt chang ni te hian, a bik takin political party-te’n assembly hman nana an hman nikhua hian a bul kawngpui block a ngai ṭhin hi mipuiin kan tuar em em ṭhin a ni tih a taka hmutute kan ni vek awm e.

AR ram hi sipaiin an chhuahsan hunah chuan sorkar building leh pawimawhte chauh atana hmang lovin, a hmunhma tam zawk hi chu mipui tan zuah leh ruahman a nih hram i lo beisei ang u khai.

- Lalnunkunga Sailo, Chaltlang, Aizawl