MIZO ṬAWNGHMANG PAHNIH KHAT LEK

Tur chein

Kan ṭawngṭaina thua pastor-te leh upate’n an ṭawnghmang hman ngun em em, mahse, Mizo ṭawnghmang dik bawhchhe deuh tlata ka hriat ṭhin chu, ‘tur chein’ tih hi a ni. 'Heng kan thilpekte hi min tihthianghlimsaka mal min sawmsak tur chein…,' ‘Kan inkhawm hi min hruaia mal min sawmsak tur chein...,' tih hi.

‘Tur chein’ tih hi a hmanna hmun tur dik zawk chu a awm ngei ang. Mahse, kan ṭawngṭaia kan hman dan tlangpuiah hi chuan, ‘turin’ tih maia dik fel êt si, ‘chein’ tih belh kher hian a ṭawngkam a tiveikhawr deuh tlat.

‘Tur chein’ tih hi a hmanna tur dik zawk nia lang chu: “Aw Lalpa, i mite i biakbuka kan lo kal hian, thinlung leh tih tak zeta chibai bûk ‘tur chein’ min ṭanpui ang che,” tih angah hi chuan ‘tur chein’ tih hi a dik lohna a awm lem lo. Hetiang ni lova tunlaia pastor leh upate an ṭawngṭai a, ‘tur chein’ tih kan hmanna tam ber hi chu Mizo ṭawnghmang dik chiah lo, dik emaw tih vang maia intihhmuh mai niin a lang.

Lawmthu kan hrilh a che

Kan ṭawngṭaia Pathian hnena lawm thu kan sawina ṭawngkam hman thiam ber pakhat, ‘Lawmthu kan hrilh a che’ tih pawh hi ngun taka ngaihtuah hian dik tâwk lo deuh tlata hriatna ka nei. ‘Lalpa, kan lawm e,' ‘Kan lawm em em a ni,’ ‘Kan va lawm em,’ ti mai lo va, ‘Lawmthu kan hrilh a che,’ tih kher hi Mizo ṭawng kalhmangah chuan a ulh deuhin a lang. Kan ṭawngṭai hian Pathian chu hmaichhana bia angah kan inngai ṭhin a ni si a.

Chuti a nih chuan, lawmthu kan hrilh pawhin, ‘Lalpa, ka/kan lawm e,’ emaw, ‘Ka/kan va'n lawm em’ emaw tih mai âwm tak a ni. Kan mihringpuite hnena lawmthu kan sawiin, ‘Ka lawm e,’ ‘Ka lawm lutuk e,’ kan ti mai ṭhin si a. “Pu Lal, motor min hmantir avangin lawmthu ka hrilh a che,” ti ta ila, a veikhawr deuh hû a, pawhlah rawng a kai thei lek lek ang. Nge, Pathian biakna leh kan mihringpuite biakna ṭawngkam chu a hrang tur alawm, kan ti dawn? Chuti ni se, thil dangah kan tidanglam leh chuang si lo.

Amaherawhchu, mi ṭhenkhatin, tute ṭawngṭai emaw, an ṭawnghmang thiam loh leh dik tawk loh vanga, ‘Ka amen thei lo,’ lo tih vel erawh ka haw têk a, a titute ka khak chawpchilh fo. Kan biak Pathian chuan a hnena kan thu sawi leh thlente chu kan ṭawnghmang dik leh dik loh emaw, kan chham thiam leh thiam loh lamah a buai hauh lo vang a, thinlung lam a en zawk ang, tih kan ring tlat tur a ni.

Vantlang hriata lawmthu sawitute’n lawmthu an sawi duhnate chunga lawm thu sawi mai lo va, an hnena lawm thu an lo sawi tawh report leh chauh ang maia 'Lawmthu kan sawi bawk a,' tih kan ching pawh hi a pawhlah mah mah deuhin a lang bawk. 'KṬP member te, thingpui buatsaihin an hah hle a, an chungah Kohhran Committee-in lawmthu a sawi a,’ ti mai lovin, ‘An chungah Kohhran Committee a lawm em em a ni,' tih mai hi Mizo ṭawng dik tluang pangngai zawk chu a ni.

Heng kan sawite hi ṭawnghmang dik ber emaw tia hman ṭhana kan neih vanga sawi a ni. Eng emaw changa tih palh zauh erawh thu dang daih a ni e.

- PC Hmangaihzauva