Sorkarin CBI a hlau em ni?

Nilaini Vanglaini chhuakah khan HSRP chhui tura Central Bureau of Inves­tigation (CBI) ngenna Mizoram sorkarin a hnawl thu ka lo hmu a, ka rilru a na hle. An hnawl chhan hriat a chakawm hle.

Congress sorkara minister-te hi an fihlim hmel viauin ka lo hre ṭhin a, eirukna lam nen an inkungkaihna pawh chanchinbu lamah chhiar tur a awm meuh lo. Congress sorkar duhkhawp lohna leh sawiselna hrang hrang hmuh tur chu a awm ngei mai, mahse hengte hi eirukna lam hawi chu a ni ngai lem lo.

HSRP vuah tura thutlukna siam a nih khan mipui lam aṭang­in sawi neuh neuh a tam hle a, sawi­sel­tu pawh an tam. HSRP hi a thir a chhe em em a, keini ang duang pawhin kan ulh kawi thei ang chu. Security thila a ṭang­kaina sawi a awm lem loa, pawhthlak lah registration plate dang aiin a awlin a rinawm.

Registration plate dang nena a dang­lamna ka hmuh ve chu, registration plate dang aiin a rangva a chhiat bakah, HSRP ah chuan hollogram a chuang tih chauh hi a ni.

Security lama a ṭangkaina hriat tur tak awm lem lo leh rangva chhe tak vuah manah hian two wheeler-ah 700 dawn leh four wheeler-ah 900 vel sen a ngai a ni. Chutiang buaipuitu chu hnamdang company an ni leh nghal. Hlawk dawn chuan hre lo se keini ang state kilkhawrah hian an rawn kal peihin a rinawm lo.

CBI hian engemaw hriat an nei ngei a nih a rinawm a, hriat nei miah lose Mizoram sorkar hnenah HSRP hi chhui an rawn dil a rinawm hauh lo. CBI chu kawtkaia koh luih mai theiin an awm reng tia sawite kan lo hre ṭhin a, tunah chuan koh luh ngai loin anmahniin lo luh an duh a, mahse an dilna pawm a ni lo.

Mi tam takin HSRP vuah man hi to an ti a, tute emaw a hlawkna lo chang vete pawh an awm ring an awm nualin ka ring. Hetiang a nih laia CBI ho dilna hnawl a ni hian mipuiah rinhlehna a siam lehzual ngeiin a rinawm.

CBI hian han chhui chiang se, thil dik lo inphumru leh man ṭang eite an lo awm lo a nih chuan sorkar tan chuan hmingṭhatna a va ni dawn em. CBI dilna an pawm loh chhan hi sorkar hian sawifiah ngei se ka va ti em. An sawifiah lo a nih chuan kan rinhleh hi a dik taah ngaih loh a har khawp ang.

Ka duh ber chu CBI hi chhui tir ngei se tih hi a ni. CBI dilna hnawl anih tak siah chuan an hnawl chhan tal sawifiah hi chu khua leh tui ka nihna angin ka phut ve tlat a ni. An insawifiahnate mipuiin kan lo thlir anga, chuta ṭang chuan he sorkar kan ngaih­danah hian thutlukna kan siam thei ang.