ISUA LEH WARREN BUFFET-A TE INMILNA ('AIH' hi hlawhtlinna bul a ni)

Sapho chuan kum a lo thar hian, kum thara an tihhlawhtlin tur, new year's resolution an siam ṭhin an ti. Chu chu keini Mizote pawhin la chhawngin, kum thara kan kawng zawh tur, hma tiam kan duang lawk ṭhin a. Hei hi chin dan ṭha tak pawh a ni awm e. Amaherawhchu, kum thar hma tiam kan duan lawk hi engzat nge hlawhtling ang tih chhut ila, mi tam zawk chuan kan tihlawhtling lo mai awm mang e. Kan hma tiam kan zawh tluan loh fo chhan hi kan thiltihtheihna thuh rûk kan hman loh ṭhin vang a ni a; chu thiltihtheihna chu 'aih' tih hi a ni. 

Warren Buffet-a hi tunlai khawvela mi hausa ber pawl, a thiltuma hlawhtling ber pawl a ni a. A nun dan leh Isua nun dan inmil chiah lo mah se, hlawhtling tura thil pawimawh an sawi pakhat inang a awm. Warren Buffet-a thukhawchang an sawi pakhat chu a hnuaia mi hi a ni. 

Buffet-an a thlawhtheihna khalh tura hun rei tak chhung a lo rawih tawh, a pilot pakhat a zilh fiam a, "Tun thleng thlenga ka hnuaia i la thawk hi, kei hian ka tih tur ka ti lo a ni ang" a ti a. A pilot hnenah chuan, "I ngaih pawimawh, tihhlawhtlin i duh thil 25 lehkha phekah han ziak chhuak teh," a ti a; pilot chuan a ziak chhuak a. "Heng 25 aṭang hian i ngaih pawimawh zual 5 thlang chhuak leh rawh" a ti a; pilot chuan 5 a thlang chhuak leh a. "Tunah 5 i thlang chhuak a; i thlan chhuah zinga tel lo va, thil dang 20 la awmte hi engtin nge i tih dawn?" tiin a zawt leh a; pilot chuan, "Heng thil dang 20 te pawh hi kan ngaih pawimawh zawngte an ni vek a; ka hun awl remchangah tihhlawhtlin dan tur ka zawng tho ang chu," tiin a chang a. 

Warren Buffet-a chuan, "I chhang dik lo. Pawimawh zual 5 i thlan chhuahte chauh hi i ngaihtuah ang a, a dang 20 hi chu i hêl ngar ngar tawh zawk ang. Heng 'tih tur list' 5 te i tihhlawhtlin hma loh chuan a dang 20 hi chu i 'tih loh tur list' a ni tawh" tiin a hrilh. 

"Mi hlawhtling naran leh mi hlawhtling tak takte danglamna chu, hlawhtling tak takte chuan engkim deuhthaw hi 'aih' tiin an hnar ṭhin" tiin Buffet-a hian a sawi. 

Isuan uirena chungchang a sawi a, "Tin, i mit ding lamin a tihtlûk che chuan, kher chhuak la, paih daih rawh; i taksa a puma Gehenna-a paih ai chuan, i taksa pêng pakhat boral chu i tân a ṭha zâwk a ni. Tin, i kut ding lamin a tihtlûk che chuan, tan la, paih daih rawh; i taksa a puma Gehenna-a kal ai chuan, i taksa pêng pakhat boral chu i tân a ṭha zâwk a ni" a ti a (Mt 5:29-30). Suala min tluktirtu kan taksa peng chu hman theih lohvin awm sela, kan tan a ṭha zawk ang tih a sawina a ni awm e. Mahni taksa tihchhiat tak tak tur tihna ni lovin, entirna a ni awm e. 

Tunlai khawvelah kan mit chakna te, kan beng chakna te tihtlaina tur thil chi hrang hrangin min hual vel a, heng karah hian nilengin eng mah tak tak ti lova then kual mai mai a awl viau. "Ka dam chhungin tihhlawhtlin tum ka nei lem lo" kan ti a nih chuan, thli thawtna lam lamah thle kawi pawh ni ila a pawi awm lo ve. Chuti ni lova awmze neia kan dam chhung hun hman kan duh a, eng emaw kawng tala hlawhtlin kan tum a nih chuan, kan taksa peng hrang hrang, hun min khawh raltirtute hi thunun dan kan zawn a ngai ngei ang. 

Kan tunlai khawvelah hian thil chi tin mai awlsam takin a hmeh chhuah theih tawh a. Boruaka thu leng vel karah hian kan tana thil ṭangkai leh ṭangkai lo a inpawlh nuai mai a. Fimkhur loh chuan, thu nawi te te, inpersan deuh deuh nilengin kan ngaithlain kan thlir palh thei. 

Hetiang hual vel karah hian, Isua thu hi kan tan a pawimawh lehzual awm e. Kan nih tur min nihtir thei lotu kan taksa peng chu kan thunun ngei a pawimawh. Kan tisa duh zawng tam zawk hi chu 'aih' tia kan hnar ngam a ṭul. Warren Buffet-a chuan thil 5 chauh thlang chhuak turin a pilot a hrilh a; keini chuan panga pawh ni lovin a aia tlem la thlang chhuak hial ila, a dang zawng chu sirah hnawl rih ila. Tichuan, 'aih' thiltihtheihna hi kan hre thei awm e.