RORELNA DIK KAN MAMAWH E

Kan naupan lai aṭang tawh, kan tlang­val lai thleng pawh khan Mizo­ramah hian Dumka, Bihar a miho kha PWD-ah Labour chhawr sen loh an awm. 

Kum 1980 bawr vel kha chuan Burma aṭangin kan unau Mizo pui leh Kawl-te thleng khan awmpui atan leh puan tahtu atan chhawr sen loh an awm bawk. Achhan chu an ram inrelbawlna chhiat vangin an rethei a, sum thawh chhuahna tur an nei fumfe lo a ni. 

Tichuan hun a kal zel a, state rethei tak nia kan hriat ṭhin Bihar State chuan hruaitu ṭha an han neih meuh chuan an ram economy a thang awk awk a. An ramah hna ṭau a ṭet ta, mi rama awm reng peih loin an ramah an haw zo ta duak mai; Mizoramah Bihari te pawh hmuh tur an tam tawh loh em hi. 

Burma mi kan tihte lah chuan ramdang dang Malaysia, China, USA leh Thailand lam an pan sung sung tawh a, Sunday-ah Vai leh Burma lam khawlaiah hmuh tur pawh an awm ta mang lo. Kan Aizawl khawpui pawh a ruak ta duak mai. 

Tunah erawh Mizote chu India ram State hrang hrang bakah, Singapore leh Malaysia leh ram dang dangah eng hna pawh thawh huamin kan vak darh ve ṭan ta. Ṭhalai lehkha thiamin hna an nei lo a, lehkha thiamin awmzia a nei lo. Chuvangin, a bik takin kan ṭhalaite an mangang a, hna awmna hmunah awmze neia thawh a, hlawh neih theihna hmun an pan ve ta sung sung mai. 

Hetiang din­hmuna kan din tak chhan ber chu, kan ram inrelbawlna ṭha lo leh, retheite retheihna khura tlakna, hausa-te hausak thur thurna ramah Mizoram a chan tak vang a ni. In ṭha a khir un hlawm a, a luahtute tã ni lovin, mihausa In, retheite luah hawh deuh vek a ni hlawm. 

Kan sawrkar hrawn tawh Cong­ress hun aṭang phei kha chuan awmpui tur takngial pawh MR hlawh aia tam pek phal a ngai ta. Sawrkar hna hniam MR, IV Grade level te tan phei chuan awmpui zawn hmuh tur an awm tawh lo.

Heng hi Sawr­karin retheite tan rua­hmanna an neih loh vang leh a ngaihna an hriat loh vang a ni lo kan ti ngam em le?