PWD Minister thusawi kha

September ni 17, 2025 Vanglainia PWD Minister thusawi, "Ṭhâlah Aizawl kawng siam a ni ang," tih kha a hun dikah kan ngai ṭheuh awm e. Ruahtui tlak tawha kawng siam hna han thawh mauh mai hi chu a fuh lem lo tih kan hre theuh mai.

Kan rama khaw awm dan, ruahtui tlak hun, fûr leh ṭhâl te hi naupang tê pawhin kan hre vek mai awm e. Chutih laiin, tun mai ni lo, kum dangahte pawh ruahtui tlak loh hun hi a rei viau va, thlasik, November aṭanga a chhiarin a kum leh March thla thleng hi a ni; April thla bul lam pawh a la ni zel e. Hetiang a nih lai hian kan hotute hian ruahtui tlak dawn hnaih tawh hnu hian kawng siam that hna hi an ṭan fo mai. Keini hriatna nei lo, layman mai mai te pawh hian kan lo sawi ve fo ṭhin a ni.

Kan Minister duh takin, "Ṭhalah Aizawl kawng siam a ni ang," a ti hi a ṭha a. Aizawl kawng chauh ni lovin, Thenzawl-Lunglei leh kawng dang dang siam ṭhat hnate pawh hi ruahtui hul ṭan November–December thla aṭangte hian thawk ṭan ṭhin se la a ṭha hle ang.

Kawng ṭha hi mi zawng zawng, political party hrang hranga mite pawhin inang tlanga kan mamawh vek a nih avangin, eng emaw chen hi chu a changtu PWD Minister mai ni lovin, Chief Minister hial pawhin ngaih pawimawh bera a neih a ṭul hle mai.

Mak ang reng tak chu, kan hriat ṭheuh, ministry kan lo hrawn tawh party pahnihahte khan PWD hi CM portfolio a ni zel a, mahse, kawng ṭha erawh kan nei ngai meuh lo a nih kha. Tun sawrkarah chuan, hlêprûk tih an tum loh vang ni-ah ngai ila, Chief Minister-in PWD a enkawl ta lo va, chuti chungin Finance changtu a nih avang leh hotu ber a nih avangin thil dang pawimawh tho vek karah kawng siamna tur pawisa hi chu a huna hna thawh a nih theih nan a ngaih pawimawh bik a ṭha hle ang.

Eng kawngah pawh inhmakhua hma hi Mizote’n ṭan kan lakna tur pawimawh tak a ni awm e. Pastor ka ni a, a rei tawh hle mai. Pastor bial pakhata ka awm lain October thla bul lam ni tain ka hria, ni khat chu daipâwn hla deuh hlekah fianrial ṭawngṭai turin ka kal a, kawng aṭangin ka han pêng a, zu bilhna hmun ka han thleng ta mai a, mak ka ti hle. Chuta ka rilrua lo awm chu, kohhranhote’n Krismas programme kan la siam hmain zu siamtute chuan Krismas huna tlangval ṭhenkhatte ruihna tur zu an lo bilh dêr tawh tih hi a ni.

Thlarau lam changtu kohhrante pawh hi kan inngaihtuah harh a ṭha khawp mai. Setana hian min dai khalh deuh zel a, keini kan ngaihtuah hma hian a hmanruate hi chuan an lo peih diam ṭhin tawh ni awm tak a ni.

Kohhran lamte kan han hmer tel ta hial a. Kan sawi tum ber chu, hma deuh hleka inruahman hi a ṭha zel a ni tih hi a ni e.

-Rev. Lalbiaksanga Chinzah