CSS REGULARIZATION SCHEME 2024

Tunlai social media leh news luahtu CSS employee-te nawrh chungchang kan hmu a, AMCECC hruaitute thusawi te, sawrkar hotute thusawite kan hmu nual tawh bawk a. Tiam chin awm lova nawrh an lo titawp hi a lawmawm phawt a. Khati taka kan buaina kha eng chiah nge ni, tiin ka thiam ang tawkin ka zir chiang ve a, mithiam zawkte leh service matter lama thil hriate pawh ka zawt bawk a. DPAR website-ah CSS Regularization hi hmuh tur a lo awm hlauh bawk. CSS Regularization-in a sawi tlangpui hi ka thiam ang tawkin Mizo ṭawngin han dah dawn ta ila.

1. CSS Regularization Scheme 2024 hi CSS employee-te proper procedure-a competent authority-in a lakte’n an hmang thei ang (Para 2, CSS Regularization Scheme 2024).

2. CSS Regularization Scheme 2024-ah hian state contract leh state PE regularization scheme angin percent hran dah a ni tawh lo va, a hnuaia mite hi CSS employee nei department-ten CSS employee-te an regularize dawnah ngaihtuah tur a ni–(Para 3) (i) Direct open competition atana post ruak awm zat, chu an regularize-na tur post-ah chuan state PE leh state contract-a thawk engzat nge awm. (ii) State sorkar sum leh pai dinhmun ngaihtuah chungin. (iii) Centrally sponsored scheme-in state tana nghawng a neih dan. (iv) CSS Regularization Scheme hi Core of the Core Scheme-ah chauh hman theih a ni. Chumi awmzia chu CSS awm lo pawh ni se emaw, Central sorkarin CSS chu hnuk kir pawh ni se, loh theih lohva state sorkarin ama sum senga tih ngei ngei ngai ang service-ah chauh a ni. Kum hnih/khat lek atana CSS awm ang chi, project awm zawk ang chi atan hman theih a ni lo tih a chiang viau. Department hrang hranga CSS Scheme khawihtute pawhin hei hi an hriat chian a ṭul hle ang. Heng a chunga point palite ngaihtuah chung hian sorkar department-ten an hnuaia CSS employee-te tihngheh theih tur zat an ngaihtuah ang tih a ni. Tin, CSS employee hnuaia thawkte chuan heng a hnuaia mite hi an fulfill a ngai bawk a: (i) Chu CSS hnuaiah chuan post ngaiah kum 10 tal a thawh a ngai. (ii) CSS employee chuan state sorkar hnuaia a nghehna tur post, post inang (corresponding post) recruitment rules-in a sawi ang qualification a nei tur a ni. (iii) Performance Evaluation Committee-in CSS employee-te chu an seniority dan indawtin kum hmasa lam kum 5 an hnathawh dan uluk taka en dikin, chuta tling chauh te, thawk tlak chauhte chu regularize turin Departmental Promotion Committee (DPC)-in a ngaihtuah leh ang tih a ni bawk. Tichuan, a chunga point ngaihtuah ngaite an tifel a nih chuan sorkar hnathawk nghet ni turin lak luh theih an ni tihna chu a ni mai a. CSS employee-te’n an sawi lar tak chu Advertisement copy kum 20 chuanga mite kan nei tawh lo tih te, DPC awm hma a ni tithe pawh a awm bawk a. An sawina zawn aṭang chuan thil tih awm tak pawh a ni ngei ang. Amaherawhchu, heng copy-te hi chu an chhuah ngei a nih chuan department-te’n an phawrh thei ngei tur a ni ang. Tin, tunlaiah chanchinbu tam takin archive an nei tawh a, chungahte pawh chuan zawn hmuh theih a nih a rinawm.

Advertisement copy leh DPC Minutes te hi anmahni CSS employee-te’n an phawrh tur ni awm taka ngaih theihin thu leng vel a awm bawk a. Hei hi chu hriat chian loh vang a nih a rinawm. Thil kalphung pangngaiah chuan a thawktute’n an kawl tur ni loin, an thawhna department-te’n regularization proposal-ah an thil tel zawk tur a ni.

High Court-in kum 2023 khan dah nghet turin order a siam tih thawm pawh hriat tur a awm nual a, Google atang tein kan han zawng a, kan hmuh chu hei hi a ni a: WPC 128/2019 a ni a, he judgment hi phek 43 lai a ni. He judgment hi Tripura SSA teacher-te’n Tripura sorkara ngheh an tumna, inkhinna judgment nen a inang khawp a, Tripura High court judgment nen hian a thu tam zawk hi a inang deuh chiah chiah vek a ni (Tripura High Court judgment WP© No.329/2015, Shri Sajal Deb vs State of Tripura). Judgment para 23-ah hetiang hian a inziak a: “Thus, upon due consideration of the case in its entirety, I find that the grievance expressed by the petitioner association to be legitimate and has merit. Accordingly, the State respondents are directed to consider regularizing the services of the members of the petitioner association against the existing vacant posts of Government Teachers in the appropriate grade keeping in mind the experiences and training undergone by the members of the petitioner association and the object and mandate of the RTE Act or in the alternative, to sanction new posts as SSA Teachers by creating such cadre. It would also be open for the State Government to frame a scheme providing for further terms and conditions on which such regularization shall be done. Such an exercise should be initiated and completed within a period of 6 (six) months from the date of receipt of a certified copy of this Order.” Tun hnaia DPAR Secretary-in a sawifiahna ka lo chhiar a. Court thu zawm hian state sorkar hian Regularization Scheme a lo siam ngei tih chu a chiangin a lang. Online source/news lamah Tripura SSA teacher-te hi dah ngheh an ni em tih pawh ka han chhui ngial a, ka hmuh theih chinah chuan Tripura sorkar pawh hian Regularization Scheme a lo siam ve a (WP© No.329/2015, Shri Sajal Deb vs State of Tripura judgment tlawhchhan thoin). Tripura-ah pawh hian unqualified leh tling zo lo an lo tam ve hle tho niin a lang bawk.

Tunah hian Supreme Court-ah ngaihtuah nawn leh mek a nih thu pawh a awm a. Tripura-ah pawh hian politics boruak nen an inchiahpiah ve hle a, “Nuar lo u la, Supreme Court-ah kan appeal lo ang,” tiin political leader-te’n an thlêm a, an inṭhaṭhen zet a, mahse, NCTE norms leh T-TET etc. te an paltlang loh avangin a tam zawk chu an regularize thei bik chuang lo niin a lang. Tin, state hrang hrangah a bikin SSA teacher-te hi an lo buaipui nasa ve hle tih a hriat theih bawk.

Social media lama comment tam takah, "Sorkar hian a duh phawt chuan relaxation a pe thei reng a, a duh lo tlat a," ti pawlte pawh an awm a. Tin, IAS officer retire tawh, pa ṭha leh lar tak pakhat thu post-ah pawh Article 309 hmangin siam rem theih niin a tarlang bawk a. Article 309 leh relaxation chungchangah pawh Supreme Court ruling hi a lo tam em em a. Article 309 bul inṭanna chu ‘Subject to the provisions of this Constitution’ tih a ni. Article 309 hi duh duh dan siamna leh thil dik lo siamremna thuneihna petu a ni lo tih a chiang hle. Sorkar secretary-in, "India Danpui kalhin sorkarin dan a siam thei lo," a tih hi a dik zawkin a lang.

Article 309 hnuaiah hian Recruitment Rules duh dan dana siam theih a ni hauh lo tihna zawk a ni a, India Constitution hi tute mahin an pawtsawi thiang lo zawk a ni.

Article 13(2) chuan Part III of the Constitution kalhin dân engmah a siam theih loh tih a sawi a. Chuvangin, Article 309 hnuaia dân siam hian Constitution vek a kalh thei lo tihna a ni. Chuvangin, Constitution provisions a kalh em tih en lo va, thil siam remna atana Article 309 lo hman tum hi thil tih theih a ni lo tih chiang takin a lang reng mai. Article 309 hnuaiah sorkar/cabinet meeting/official ten thuneihna tawp chin nei lo an nei ang maia ngaih hi thil hlauhawm tak a ni. Chutiang ni lo se sorkara thuneihna changtute’n an chhung leh khat, duhsak zawng sorkar hna pek theih nan dan an siam vak thei tih a kâwk thei hial awm e.

Ngaihtuah ngaite

1) CSS Regularization Scheme hi a duangtute’n fimkhur takin an duang tih a hriat a, CSS employee-te tan ngheh theihna ni si, dan kalh si lo an zawng nasa tih a hriat theih. Tunah he scheme hi pawm harsa ti mah se, Mizoramin kawng tam takin a chhanna hi kan la hre chhoin a rinawm.

2) Sorkar hna hi group ‘D’ tih lohah chuan a thlitfimna hmasa chu written examination a ni a, interview hmang ri ngawta hna lak an nih phei chuan induhsakna a tam hle ang tih a hriat theih. Heng CSS employee-te hi advertisement, interview, DPC kal tlanga lak tam tak an awm ngei ang a, lak ve deuh mai mai pawh an awm ṭhup thoin a rinawm. Hengho hi nghet ta ṭhup se ‘backdoor entry’ an tih fo nen hian danglamna a awm dawn chuang lo ang.

3) CSS hi central sorkarin state sorkarte a puihna a ni ber a, state lian leh hausa deuhte chuan CSS zawng zawng hi an la duh lem lo. Arvind Kejriwal leh Central BJP innghirnghona tam tak pawh hi CSS-te a lak duh loh ṭhin vang a ni. State-in sum leh pai a neih tam loh miau avangin CSS la lo thei lo dinhmunah a ding a, sum indaihzai se CSS hi lak lohin a awm theih reng. Chu sum indaih lo phuhrûk nana lak, chumi hnuaia mite’n state sorkarah ngheh an tum si chuan, state sorkar sum indaih lo sa chuan khawia sum nge a hman chuang ang? 4) Social media-a comment aṭang chuan CSS employee-te hi mi 10,000 chuang kan ni tihte a ri a. Heng hi nghet ta vek se state sorkar sum leh pai hian a zo kher dawn em mi? Tlemte chauh nghet se, a nghet ve lo nuarte tan a fair dawn chuang ang em?

5) State sorkar hnathawk nghet lo provisional employee leh contract employee sang chuang an awm mek bawk a. Kan nau pakhat peon chuan, PE-te hi kum 7 kan thawh chuan post ruak a awm chuan nghet ve thei kan ni a, mahse, nghet hman lova pension an tam a, tin kum 20 chuang thawk pawh an tam a, kan zavaiin mi 4,000 kan ni ang, post ruak a awm loh chuan ngheh theih ngawt a ni lo. Contract employee hi kum 5 hnuah post ruak a awm chuan an nghet thei bawk a, post ruak a awm loh chuan nghet loin an pension ve tho bawk a, mi 300 chuang an la awm tiin a sawi. Post ruakah awmah CSS employee zawkte hi heng state PE leh contract employee-te aiin dah nghet ngawt se, state PE leh contract employee-te hi engtin nge sorkarin a tih ang?

6) Nawrna avanga hian post tam takah dah nghet ngawt se, sorkar hna hi kum eng emaw zah chu lak tur awm loin a awm thei ngei dawn a, ṭhangthar lehkhathiam lo chhuak tharte’n Regularization Scheme hi an khing duh mai ang em? Khing ta se, sorkar hi a chak zo ang em?

7) CSS hnuaia thawkte’n sorkara ngheh an tum zel chuan state sorkar tan CSS lo dawnsawn hi a huphurhawm thei dawn a, sum leh pai mamawh khawp nei chuang si loin, rethei bakberh deuhin state hi kan awm thei ang em?

8) Mizote hi politician chauh pawh ni lo, official thleng hian appointment pek nuam ti em em, chhung leh khat, party invulh nuam ti tak vek kan ni a. Chung mite’n an vua leh vângte awlsam te tea an lo lakte hi an ngheh theihna turin mawng hiat an awm a ni mai ang em?

9) Regularization Scheme mai bakah Provincialization of School thleng hian dan a kalh zawk lo maw? Duhsak zawngte tihnghehna ‘backdoor entry’ siamna mai em ni a lo nih zawk? Khawi board emaw private school-in a lak han dah ngheh ngawt ṭhin maite kha duhsak zawng thunna ‘backdoor entry’ chu a lo ni mai lo maw? A dil thei zawng zawng leh duhte dil theih ni lem lo va, mi tam zawk hriat lohva interview pawh ni se, open competition tihah chhiar theih a ni dawn em ni? Provincialisation of Schools hi zirna tichhetu a ni zawk em? School provincialize a nih hian sikul leh naupangte aiin a thawkte ṭhatpuina a ni zawk mai em?

10) Sorkarin min ngaihsak lo tih fo hi a dik chiah em? CSS employee ni na nâ nâ a, state sorkara kawisuruta ngheh tum tlat kan ni zawk em? CSS hnuaiah thawk lo i la, sorkar hna pangngai exam-ah ka tling ang em? CSS hnuaiah thawk lo ila, ni tin kut hnathawh/eizawnna dang ka tlin ang em?

11) CSS Regularization Scheme hi chhiar chiang si loin, awmzia pawh hre fumfe loin kan nuar mai a ni zawk em? Heng a chunga sawi bakah hian ngaihtuahna tam tak a piang thei ang. Tun hnaia CSS employee nuarte kha state sorkar leh a mipuite pawhin harh nan hmang ila, thil tih theih loh pui tur innawr chiam leh intiamte hi bânsan ngam ila. A ṭul lova tha leh zung senna mai a ni.

Eng sorkar pawh piang se, CSS employee-te hi a huhova dah ngheh burh emaw, chinfel hi a theih loh tih a chiang. Political party-te pawhin politics khelh nan hmang lovin, a thawkate ngei pawhin politics ball-ah insiam loin, kan tih tur dik tih mai hi a finthlak zawk a ni. Inthlan hmaa party tin hnena va inzuar anga langte leh, pungkhawm hlek voter hmuha kan hmu zelte hian sorkar leh CSS employee-te hi an dik loh dan, thiam loh dan a inchen reng a ni. Tun boruakah pawh hian political party ngaihtuah thui lo apiangin CSS employee-te hi khawngaihna dik lo hmangin an lo khawngaih dawn a. Tuna sorkar kan hrawn mek hi sorkar thil ṭha duh a ni bawk a, ram siamṭhat nan Provincialisation of Schools leh CSS Regularization Scheme te hi sût ngam zawk hial se a ṭhain a rinawm.

- Lalmuanpuia