Ka rilruah a va awm lian tak em!

"Mahni intihlum tur khawpa mi dawihzep ka ni lo" - Phoolan Devi

Tun hnaiah kan ramah mahni nunna meuh pawh hlut zo lo khawpa mi beidawng tam tak an awm a, kan State mihring cheng chhut phei chuan mahni intihlum hi an tam khawp mai. Chhan hrang hrang vang a ni ang a, anmahni anga beidawnna leh harsatna neia nun hmang mek tam tak pawh an awm ka ring a, chung mite tan chuan he fuihna thu tawite hi ka hlan e.

Tunlai zaithiam lar em em mai Demi Lovato hi i hriat ngei ka ring. Depression vanga hun rei tak buai ṭhin a ni asin, mah se ani chuanin hruihrual a chuh ve lo a, huaisen takin a nun a hmang a, khawvelin Demi Lovato hi a hriat reng phah ta a nih hi maw!

Khawvel hla ropui berte zinga mi Haleluiah Chorus hla phuahtu GF Handle hi mi vanduai tawp a ni. Lung natna a vei a, a zeng zui bawk a, natna avanga a hreawmna te chu huaisen takin a paltlang a. Khawvelin Haleluiah Chorus hla ropui em em a hriat phah ta a ni. Natna avanga i rum a, i beidawn ngawih ngawih chuan a ni hi hre reng ang che aw.

Inngaihzawnna avanga rilru nat em em avanga nun chak lo em ema hun i hmang a nih pawhin nangmah ang thoa hun hmang ve tawh Abraham Lincoln kha hre reng ang che aw. A hmangaih Ann Rultedge-in a boral san khan chaw a ei duh lo a, vawi tam tak mahni intihhlum a tum a, nun buai takin a awm a. Chu natna chu a hneh thei a, nang leh kei hian Abraham Lincoln kan hre zui ta a ni. Hmangaihna avanga i nat em em hun chuan a ni hi i Idol-ah hmang ang che aw.

Ruihhlo vanga nun bei­dawng em em leh intihhlum hial duha hun i hman hun a awm a nih chuan Tennis star ropui Jenifer Capriati kha entawn ang che. Ani kha 1992 Barcelona Olympic-ah a champion a, mah se ruihhloah nasa takin a buai zui a, beidawng em emin a awm ve a ni. Mahse, intihhlum tum mai loin huaisen takin nun a hmang a, ropui takin a rawn let leh thei a ni.

Chhungkaw khawsak harsat vangte dinhmun chhiat em avanga nun thlahlel lo em ema hun i hmang a nih chuan boxer ropui Pacman hi Idol-ah hmang la ka duh. Rethei takin a rawn seilian a, huaisen takin hringnun a hmang a, street fighter ve mai ṭhin kha khawvel boxer ropui berte zinga mi a rawn ni thei asin. An retheihna kha a hneh a, an retheih luat avang khan intihlum se nang leh kei hian a ni hi kan hriat ka ring miah lo!

Phoolan Devi, India misual hmingthang kha i hriat ngei ka ring. Bandit Queen tih hial a ni a, hringnun kha vanduai reng rengin a hmang emaw tih mai tur a ni. Pawngsual a tawk a, rethei taka nun hmang ṭhin a ni. Amah vek khan "Mahni intihlum tur khawpa mi dawihzep ka ni lo" a ti a sin. Nang pawn he nu thu sawi hi vawng reng ang che aw.

Pathian thu hriltu ropui berte zinga mi Sadhu Sundar Singh meuh pawh kha nun beidawn luat avangin intihhlum a tum ve tawh tho asin. Zan khat chu beidawng em emin relah a chuang a, Pathian a au a "Pathian i awm takzet a nih chuan zaninah hian hmuh che ka duh" tiin a ṭawngṭai a. Lal Isua chuan amah zawngtu tak tak chu a kalsan lo a, a hnenah chawp leh chilhin a rawn inlar zui ta a ni.

Khawvel hriata thuhriltu ropui berte zinga mi Billy Graham pawh hi hmangaihna avangin beidawng em emin a hun a hmang ve tawh a, mah se intihhlum a tum lo a, khawvelin a hre reng a, Pathianin a chawimawi zui ta a nih ber hi.

Pastor pakhat nena kan inkawm ṭuma a thusawi mawlh hi khatihlai khan beidawng em emin hun ka hmang a, chumi ṭuma a thusawi chu "He natna leh i beidawnna avang hian Psychiatrist i pan chuan taksa damna chu a pe thei ngei ang che mah se thlarau damna chu a pe thei lo ang che, Lal Isua i pan chuan taksa chauh ni lo thlarau damna pawh pek i ni ang" tih thu kha vawiin thleng hian ka vawng reng a, ka hre chhuak nawn fo ṭhin asin.

Engtik hunah emaw chuan mahni nunna meuh pawh hlut zo lo khawpa hun i hman ka ring. Chu tih hun chuan khing mihrangte hi hre reng la, inawhhlumna hruihrual chuh lo la, huaisen takin awm la puih i ngaih chuan ka inpeih reng e.

Mahni intihlum tur khawpa mi dawihzep i nih lohzia kha hre reng ang che aw.