THIM THUAH SARIH

Uar takin thim thuah hnih chungcháng te, Mizoramah chhiatna nasa tak a lo thlen tùr thü te, lirnghing thü te, khawchhak lungpui lum thü te an sawi ṭhin. Zàwlnei nia inchhálte pawhin hrilhlâwkna dangdai tak tak leh rál khèl dár te thlengin min hriattír tawh bawk.

Zàwlnei ni hauh lo hian thu ken ka nei ve a, Zawlnei ni hauh lo hian hriatna tlém ka pai vè bawk. ‘Thim thuah hnih’ aiah ‘thuah sarih’ thü ka puang ve mai dáwn e! Mizoram hian engtik níah emaw chuan chhiatna râp­thlâk tak a la hma­chhawn ngei ang.

Pathian khawngaih­na hnuaiah kan awm avàngin chhiatna tam tak kan pumpelh tawh a, kan pumpelh reng thei bîk hauh lo vang; khawvêl hi hlun tùr ni hek lo. Lìrte a nghïng ang a, hrîte a léng bawk ang. Kan siamchawp chhiatnaah te phei hi chuan kan Pathian hian pumpelh kawng min siamsak dáwn lo. Pathian hi mihringte tán chauh Pathian a ni lo va, ransa leh ramsa te, thing leh mau te, nunna nei ve hauh lo leilung leh boruak te tán ngei pawh Pathian a ni ve bawk tih hi kan inhrilh nawn a ngai ta!

Kan in leh lo din dànin a zir loh vànga kum tina chhiatna lo thleng tùrte hi zàwlnei ni lëm lo tán pawh hrilhlâwk theih a ni. Kawr leh ruam kan hnawhkhat zo tawh a, khàm leh awih-pang kan sawi tawh hek lo. Ṭhenawmte nèn bang khat kan inṭawm titihna hmunah hian thlamuang takin kan mu thei lo ṭan ta a nih hi! Zilh hau leh talhfiak pawh kan la cho chhuak dáwn chauh niin a lang. Muhil thawh harh a hun ta!

Hei hi erawh a pawimawh lai tak chu a ni: insawiṭhaih leh hlauh avànga miin Pathian a zawng a nih chuan a ṭha aläwm, a zawng hmu mahnâ. Mahsé zu ngawlvei pawhin a dam loh avàng chauhva zú a nghei chuan a dam hunah a rui leh tho ṭhin asin!

Thil mak leh dang­lam ringawt te zawng lovin, mumang hrilh­fiah leh insawi hlauh­awmsiak te bànsanin, thutak hmangin kan thinlung hi i chhüng­khat zâwk ang u. Vawiin tlaiah khawvêl hi tâwp dáwn mah sé, zin tùrin motor nghâka a lo inpeih anga inpeih a ṭül lo a, vànah chhawm luh tùr thil dang i mamawh lo.

Mahni hnà ṭheuh rinawm taka thawkin, phílí ruai loin, i awm ang khán Lalpa chu hmuak mai rawh. Ringtu tán hlauh tùr a awm lo. He thü hian entírna dang, thil mak leh dangdai a mamawh lo e.