THE BIBLE SAYS SO!

Pathianin khawvel A hmangaih em em a, khawvel mite that nan enge A pek kha? A Fapa! (Johana 3:16). Khawvel thatna thlentu tur chu Pathian Fapa chu a lo ni ta. Chu A Fapa chuan khawvel thatna hna thawk turin Amah ngeia innghat Kohhran A din ta a (Mathaia 16;18). Pathianin khawvel A siam thatna hmanrua chu A Kohhran hi a ni ta. A Thlarau Thianghlimin A luah lum a, mipui te, Sorkar te, kawng dika hruaitu tur a ni.

Mite kawng dika hruaitu tur-a nih avangin amah ngei pawh a dik tur a ni. Amah ngei a dik si loh chuan midang a hruai thei lovang (cf. Rom 2:21,22). A hruai a nih vek pawhin khuarkhurumah an tla ngei ang. Kan kohhrante hian inenchian kan tul ta. Kohhran hi a thata a tangkai theih teh lul nen a kal dik loh erawh chuan a pawi thui thei em em a ni.

Kohhranten kan siam dik ngai pakhat awm reng chu kan ram Kohhran lian pahnihte hian din an nih kum hi an tihdik a ngai. Kohhran chu ringtu inpawl khawm tih a ni thin. Bible Dictionary leh Commentary hrang hrangte pawhin chutiangin an sawifiah thin. Mahse kan Kohhran lian pahnihte hi chuan ringtu pakhat mah awm lo chung chungin January ni11, kum1894 khan tuna an Kohhran hi dingin an sawi hi! Kum 1897 leh 1903 kha a dik teh lul nen! Hei hi kan Pathian duhzawng a ni hauh lo vang! Zoram khawvel siam thatna kawng a ni lo vang, thu dik lo hi thangtharten kan sawi zel dawn em ni?

Zawlnei Jeremia hun lai khan zawlneite leh puithiamte kha sual hmahruai an nih kha (Jeremia 5:30,31). Kohhran din kum dik lo hi min sawi tir zel lul suh se! Kohhran hi Pathian chhungkua a ni a, dikna kawnga inhruai zel tur kan ni zawk alawm! Kan hla pakhat chuan “Krista lova Kristian nih hi a dik thei lo” a ti a. Chutiang tak chuan “Ringtu awm lova kohhran din hi a dik thei lo” a ni! Lal Isua Thutaka innghat Kohhran i ni ang u.

Hetiang hi Lal Isua Dikna Lungpuia innghat Kohhran awm dan tur niin i ring em? Politician thalo te hi kan ram tichhetu niin kan sawi thin a, Kohhran ngei pawh hi kan ram sualnaah hian mawhpurtu kan ni ve thei asin! 1894 January ni 11 ni hian missionary hmasa pahnihte khan tu mizo hnenah mah chanchin tha hi an la hrilh lo. Lehkhabu hrang hrangah pawh chanchin tha hrilh ahnekin Sairang khawlumzia, thosi tamzia, et cetera leh thuamphur tur zawngin alawm an buai. Chanchin tha a la ri rih lo va, ringtu pawh an la awm lo. Hei hi chu tlang hriat a ni. Ringtu awm lovin Kohhran a din theih loh. Chuvangin 1897 August ni 31 hi Presbyterian Kohhran din kum a ni a, 1903 March ni 8 hi Baptist Kohhran din kum a ni.

- F. Lal Thanzuala, 9436141242