Rel kawngin a thlen tur thil pahnih
Mizoram chuan kuminah tuilet hnua a vawikhatna turin bung thar kan kai a tih theih awm e, a chhan chu Mizoramah hian rélin Bairabi thleng chu a lut tawh ngei a, mahse, Aizawl tana pan awlsam leh hnaivai a ni lo thung. Chuvang chuan Aizawl hnaiha rel chawlh hmun thar kan nei thei hi bung thar kaina pakhat chu a tih theih awm e. Rel rawn lut hian chiang takin kawng hnihah danglamna a rawn thlen dawn tih pawh mipui lam hian kan hriatsa a ṭul hle ang.
Khawii ramah pawh rel kawng a tlangnaah hian hmasawnna a keng tel tih theih a nih rualin, ṭhenkhatah chuan a ṭha lo zawngin nghawng a nei ve bawk. Kan hriat ṭheuh tawh angin Native American 'Red Indian' kan tihte pawh mingo hovin rel kawng an siam duh vangin nasa takin an suat tih pawh kan hre ṭheuh tawh ngei ang, chuvang chuan hmasawnna thleng tur hian nghawng chhia leh ṭha a nei ngei ngei dawn tih hi Zoram mipuite hian kan rin lawk a ṭul hle.
Rel rawn lut hian ṭhalai tam tak tan hnathawh tur leh eizawnna tur bakah, eizawnna tiawlsam thei tur thil tam tak a rawn keng tel dawn a, chu thil ṭha a rawn ken tel tur chu duham taka kan inchuh vang pawhin hnam leh hnam kan intual vuak phah ve thei bawk. Chu'ng thil thleng theite pawh chu ngaihtuah lawk ila, a thlentir lo tur zawnga inzirtirna emaw kaihhruaina mumal emaw ṭha tak lo ngaihtuah chu a ṭul hle awm e, thil ṭha lo awmna zingah hian ṭha lo pawh hi a tel ve ṭhin si tih hi hre nawn ta ila.
Mizoram luh leh chhuah a awlsam dawn avangin 'Vai' leh hnam dang an pung dawn, hei vang hian a khuahkhirhna Mizoramin kan neihsa inner line permit (ILP) kan tih hi uluk zawk leh khauh zawka kan kenkawh ngei a ṭul ang. Chumi atan chuan veng, khua, leh district-tina pawl leh thuneitute'n kan um zui a, kan ram tana ṭha a ni tih hriain chhangban vil taktea kan vil chu a ngai dawn a ni. Hahthlakah la lovin kan tihmakmawhah dah zawk ila, kan ram humhim kan ni thei ang. State dang pawhin neih ve hial atana an it ILP kan neih hi khauh taka kan kengkawh a nih phawt chuan, hnam dang chim ral kan hlauhna lak aṭangin rilru hahdam takin kan awm theih phah dawn a ni.
Rel rawn lutin a ken tel thil chhia leh ṭha lo thleng tur atan hian mi tin inpuahchah ila, a chhe lam tur ringawt thlir lovin, a nghawng ṭha tur awm hmanga a nghawng chhe tur zawk tana inpuahchah dan lo ngaihven thuai chu khawthlang ṭawng takin a va 'sustainable' dawn zawk em. Kan rel chawlh hmun neihte pawh kristian ram kan nihna tilang thei ngei turin vawn fai kawngah ṭan la tlang bawk ang u, kan hmel mawina tur a ni si a.
- BIG Mike