Suangtuahna vâk vel!
Kum eng emaw zat kal ta, SSA hun lai khan SSA hotu (officer) leh Minister tute emaw chuan an mi duhsak zawng, an chhungkhat laina hnaite leh an hmelhriat ṭhate fate chu SSA-ah, ‘A thawk ve duh lawm ni,’ an ti a. Tichuan, induhsakna avang liau liau chuan an inthun ta a. Hotute'n an duhsakna vang liau liaua SSA-a an thunte hian ‘Kan thawk rei tawh’ tih vangin dah ngheh phût ta se, a dik kan ti em?
Mi pakhat chuan SSA-a thawk turin zaithiam an lut thei riau tih hriain pa pakhat chuan a tunu zaithiam, mi hriat hlawh ve takt ho chu an thawhtir ve mai duh ringin SSA hotu pakhat hnenah a sawipui a. A sawi fo takah chuan SSA hotute pawh chuan an thawhtir ve ta nge nge a. Kum 10 chuang fe kal ta khan SSA-ah khan zaithiam an lut thei riau mai a, khangte kha advertisement an hmuh aṭanga hna dil a, interview paltlanga lak ni tak maw?
Pa pakhat chuan a fanu nula, graduate chu CSS programme pakhata hotu, a ṭhian ṭha tak hnenah lenpuiin, a fanu chu thawhtir ve turin a ngen a. Officer pawh chuan duhsak takin a thawhtir ve ta a. He nula hi kum 10 chuang lai a lo thawk ve ta reng mai a. A thawh rei ve tawh chu dah ngheh phût nan hmang ta se, a dik kan ti em?
Thingtlang nu pakhat chuan CSS programme pakhatah hotute’n an duh duh an thun mai ṭhin nia hriain a fapa tlangval, kum 5 vel graduate ve tawh, hna mumal nei lo chu CSS programme pakhat hotu pakhat hnenah lenpuiin, hnaah thun ve turin a ngen ve tawp mai a. Officer tihlawm nan a ti ni maw, an arpui tui lai ngei mai chu a pawm iak lut ve ṭâ ṭâ nghe nghe a. Mahse, inhmelhriatna pawh nei em em lo an nih vang nge, thuneitupa chuan a thawhtir ve ta chuang hlei lo va!
Pawl pakhat chuan an pawlin an buaipui thil eng eng emawah doctor an indaih loh thu Minister hnenah an thlen a, doctor dah belh turin an ngen a. Minister chuan Health Department hnuaia CSS programme-a thawk duh tur doctor lo zawng ve tur leh thawk duh an hmuh chuan appointment an pek nghal theih thuin a chhang a. Chu pawl chuan Health lama CSS hnuaia thawk duh doctor an hmu ta a, NHM lam pawhin harsatna awm loin appointment an pe nghal mai a ni. He doctor hian hun eng emaw chen a thawh hnuah sawrkara dah ngheh phût ta se, a dik kan ti em?
Heng a chunga ka sawi tâkte hi kan suangtuahna vâk vel mai mai a ni a. Hetiang hian thil a thleng tak tak e, tihna pawh a ni chiah lo. Mahse, "A nih duh hmel mang e aw," tih erawh rilruah a awm!
Advertisement chhuah lo, interview takngial pawh paltlang lova CSS hnuaia thawhtirte hian dah ngheh phût ta tlat se, a dik kan ti em? Lehkhathiam tam tak an awm a, chung mite'n an dil ve theih hauh loh leh, mi dang hriat miah lova induhsakna vang liau liauva lakte hi dah ngheh mai turah kan ngai em?
Han dâwn ve teh!
- Zoramchhana