MIN PUI R'U, MIN PUI R'U

Hmanlai kan pi leh pute hunah chuan Mizoramah hian ramsa hlauhawm tak tak an tam em em a, Sakeite hian mihring an seh fo ṭhin a ni awm e. Chu chang a ni lo a, khua leh khua an indo ṭhin avangin ral an hlauhawm hle bawk a, Hengte avang hian Mizo mipate chu ramsa lakah emaw ral lakah emaw pawh ni se, ṭanpui ngai an awm chuan mahni nunna thap pawha ṭanpui ngaite chu ṭanpui ngei tura beisei an ni ṭhin a ni. Chuvang chuan a lawm, tunlai thleng pawha Mizo mipa fa chuan, "Ṭhian chhan thih ngam," ti a, an la inchhal ni.

Tum khat chu ṭhian zaho ram chhuak hi, an ṭhianpa pakhat Sakeiin a seh hlauh mai a, "Min pui r'u, min pui r'u, chhan thlak ka la awm e," tiin a au vak vak mai a, a ṭhiante chuan an chhan ngam si lo va, sakei chuan a seh hlum ta a ni awm e. Chumi thu chu Mizote zingah a hria apiangte an thinrim em em a. Nuhote pawhin an pawnfen pawtthlain an ṭhianpa chhan ngam lote chu, vawm nan an hmang a, "Pawnfen feng rawh u", an ti hial e, an ti a ni. Mizo mipa tan chuan ṭanpui ngaite ṭanpui ngam loh hi mualphona leh tlawmna tawpa ngaih a ni ṭhin. Chhungkaw pa tan lek phei chuan an nupui fanaute ral lo lian lakah chhan ngam ngei ngei tura beisei an ni leh zual a ni.

Tunlai hunah hian, hman lai angin Sakei a hlauhawm tawh lova, kan pi leh pute ral ang pawh kha a hlauhawm tawh hek lo, Nimahsela, hman laia sakei leh ral ang thoa hlauhawm ruihhlo chuan Mizo ṭhalai tam tak a seh hlum tawh a ni hi, tunah hian mi tam tak a hliam mek an awm bawk a, Heng ruihhloin a hliamte hi mahni pawha tal chhuak thei lovin, ṭanpuitu ngai em em, hmun tinah hmuh tur an awm a, "Min pui r'u, min pui r'u", tiin an au mek a, ṭhenkhatte phei chuan ṭanpuitu pawh an beisei ngam tawh lo hial a ni. Engtin nge kan tih dawn le? Ṭanpui ngaite ṭanpui ṭhintu Mizo mipate hian, ṭanpui loa ngawi mai tur chu kan ni si lo a. He ral hlauawm tak mai lo lian hian chhungkaw tinte min rawn luh khung mek zel a ni si a, Mizo chhungkuaa patling dik takte chuan an nupui fanaute chu ral lo lian mek laka humhim leh venhim tumin ṭan an la nasa em em a, an fate zingah ruihhloin a hliam an lo awm hlau pawhin a theihna zawng zawngin an ṭanpuiin an dam leh nan an bei mai a. Hetih lai vek hian Chhungkaw pa inti ve si, ral laka nupui fanaute pawh venhim leh chhanhim tum miah lo an tam em em a, Hengho hi sum bawiha tangte an ni tlangpui a, sum buaiin an buai a, an fate ruihhloin hliam mahsela, mi dangte enkawl turin an dah ringawt zel mai a ni. Chuvangin Nang chhiartu duh tak, Mizo mipa i nih ve chuan, i chhungkua humhim turin ṭan i la ve em?

Tunah hian kan sawrkar a awm mai mai thei tawh lo a, Kohhran hruaitute an ṭhu mai mai thei tawh hek lo, YMA hruaitute pawh mawng vawm ba ang maiin an phe sek tawh a. Kan rama ruihhlo lo pung zel do tur hian, Nang, Mizo mipa inti ve siin, ruihhlo kan hmelma do tum loin sum hmuhna ringawt i la lungkham em ni le? In thiam lohna pawh i nei miah nange, i nupui fanaute chhanhim an ngai a, sum ringawt i eng to avanga kan ramah hian ruihhlo hi lo hluar a ni a sin, Pathianin ro chan fanau a kawl tir che i enkawl ṭha lo a, sum ngainatna bawiah i tan san a, Mizoram hi dinhmun thim takah min hruai lut a nih hi. Tunah hian kan ramah mipa kan thi zawih zawih mai si a, kan mang thei mai dawn a lawm, Chuvangin, nang leh kei hi kan awm mai maia kan ram hmelma ruihhlo hi kan do lo a nih chuan kan hnam hi kan boral ngei dawn e, tunah hian chhan tlak kan la awm e, "Min pui r'u, min pui r'u," tia auin Mizoramin an au a che.

- Hausanga Hauzel