Thingtlang mite chawikanna tura sorkar scheme ṭhate

Thlazing ni 29, 2025 khan Rural Development Department Conference Hall-ah Rural Development Department hmalaknain Govt. T Romana College 5th Semester Sociology zirlaite pualin ‘Awareness on Rural Development Schemes’programme hman a ni a. He huna kan zirte zokhaw lama khawtlang hruaitu leh mipuite’n an lo ṭangkaipui takin he article hi ka rawn ziak ve a ni. Programme in a tum ber chu, thingtlang mite hmasawnna tura sorkarin scheme a neih ṭha tak takte zirlaite hnena hriattir a ni. Hemi ni hian kan minister zahawm tak Prof. Lalnilawma, Rural Development & Administration Department chu khuallian niin, hun hlawkthlak tak kan hmang ho a. He awareness programme aṭanga kan zir, sorkar scheme hrang hrangte han tarlang ila.

1. MGNREGS (Mahatma Gandhi National Rural Employment Guarantee Scheme)

He scheme hian ni 100 chhunga inhlawhna tur thingtlang mite tan a duansak a, municipal council/corporate chin erawh a huam tel ve lo. Village Employment Council (VEC) ten grassroot level-ah enkawlin, chhungkaw khatah job card pakhat zel pek chhuah tura duan a ni. State hrang hrang azirin ni khat hlawh hi a danglam thei a, kan state-ah chuan tun dinhmunah ni khat hlawh Rs 281 a ni. He scheme hmang hian community assets (feh kawng, dil, community hall, etc.,) te tihchangtlun ṭhin a ni a. A thlawna pawisa semna ni lovin, hnathawh tur neih hi mipui dikna chanvo (right) ve reng a nihzia lantirna tura hmalakna a ni.

2. PMAY-G (Pradhan Mantri Awaas Yojana-Gramin)

He scheme hmang hian chenna tur in nei lo te, kutcha house-a cheng te, hlamchhiaha awm (destitute), manual scavengers, primitive tribal group te leh bonded labourer ho in sak ṭanpuina pek a ni a. Kum 2029 hma ngeia permanent pucca house an neih vek theihna tura hmalakna a ni. Central leh state aṭangin funding hmuh a ni a, north-east states-ah chuan central-in 90% tumin, state-in 10% a tum thung. In pakhat sak nan Rs 1.30 lakh (installment) zel sem niin, a lo berah sq.m. 25 aia te lo tur a ni. Ṭanpuina dawngtute hian 1st installment an dawn hnuah Awaas app (geo tagging) hmangin an hnathawhte update tur a ni a, finfiah an nih hnuah installment dangte an pe chhuak leh ṭhin.

3. WDC–PMKSY 2.0 (Water Development Component–Pradhan Mantri Krishi Sinchayee Yojana)

WDC–PMKSY 2.0-in a tum ber chu leilunga innghat hmasawnna a ni a; ram chhe tawh siamṭhat, ram ṭha lai vawn him, tuihna siam leh humhalh, leilung kal ral tur ven te a tel. He project-in a tuam chin khuaa mi chhumchhia leh hmeithai, eizawnna mumal nei lo te, mimal leh self help group anga eizawnna ruahmansakte a tel bawk.

4. MzSRLM (Mizoram State Rural Livelihood Mission)

MzSRLM hi National Rural Livelihood Missions (NRLM) hnuaiah kum 2013 khan din a ni a; a tum ber chu thingtlanga harsa zawkte SHG hmanga khaichhuah leh ṭanpui niin, Mizorama district 11 leh RD block 28-te a tuam chhuak vek tawh. He scheme hnuaiah hian Institution Building and Capacity Building (IBCB), Social Inclusion and Social Development (SISB), Financial Inclusion, Farm Livelihoods, Non-Farm Livelihoods leh Skill Intervention te a huam tel a. IBCB hmalaknain Cluster Level Organisation (CLO) hnuaiah Village Organisation (VO) chi hrang hrang an awm a; VO tin hnuaiah hian self help group (SHG) eng emaw zat a awm leh bawk.

NRLM hnuaiah hian level tinah funding chi hrang hrang an dawng a. SHG tan Revolving Fund (RF) leh Community Investment Fund (CIF) te, VO tan Vulnerability Reduction Fund (VRF) te, CLO-te tan Viability Gap Fund te a awm. SISB hnuaiah Gender Resource Centre-te din a ni. Farm livelihoods hnuaia hmalakna langsar zual chu Ropuiliani Women Farmer Producer Company Limited hi a ni. Ram dang thil siam aia Mizoram SHG-te thil siam hlut a nih theih nan MzSRLM bultumin Sales of Rural Artisan Society (SARAS) Fair hi kum 2015 aṭang khan an lo buatsaih ṭhin a. SHG-te’n products an siam chhuah marketing a puih theih nan Selhel trademark siam a ni bawk. DDU – GKY hnuaiah hian kum 18-35 inkar BPL chhungkua SHG member ni bawk tan a thlawnin skill development training pek ṭhin a ni.

4. SASCI (Special Assistance to States for Capital Investment)

RD Department hian SASCI (2023-24), Clause 5, Part VII (Children and Adolescents’ Libraries and Digital Infrastructure) hnuaiah project- Establishment of New Libraries in Mizoram cheng 55.18 crore a hmu a, tunah hian 60% vel thawh a ni tawh. He project-ah hian library awm sa 44 chei ṭhat leh a thar 229 sak hna, a vaiin hmun/khua 273, RD block 28 huam chhungah an thawk mek a ni. Library hi naupang, ṭhalai leh upa zawkte pawhin an hman ṭangkai tura duan a ni a; lehkhabu chi hrang hrang mai bakak, information technology lama tunlai thiamna sang zel ngaihtuah telin computer set chikim, printer, scanner, etc., leh internet connection te nen thuam tur a ni. Power supply backup turin UPS (3kVA) ṭha tak chu he project-ah hian telh a ni bawk. Bookshelf, chair, table, etc., te pawh supply vek tur a ni bawk. A building hi ro tling ni turin semi-permanent, ft. 24x20-a zau inthiarna toilet mai bakah, tui supply leh electric connection te nena ruahman a ni. Library tinah lehkhabu cheng nuai 2.0 man zel dah tur a ni a, nuai 1 chu National Book Trust India-a mi lei tur niin, nuai 1 dang chuan open market-ah tualchhung lehkhabu lei tur a ni.

5. BADP (Border Area Development Programme)

BADP scheme hian border area-a khaw hrang hrang international borders (Indo- Myanmar/Indo-Bangladesh) aṭanga km 10 huam chhunga awmte hmasawnna tura duan a ni. BADP-in a tum ber chu thingtlang kilkhawr (border area)-a chengte infrastructure leh facility ṭha siamsak a, thingtlang aṭanga khawpuia pêm lut tam lutuk tihtlem nan te, trans-border crime tihziaawm nantea duan ni.

He scheme hnuaiah hian sector hrang hrang–road connectivity, sport, education, social, health, drinking water, village connectivity, internal village road, step, blacktop thlenga khawih a ni a. Playground, community hall, solar powered water supply, supply and installation of medical equipment (x-ray, endoscope, ultrasound, etc) te a huam tel bawk. Kum tin cheng nuai 3000-4000 vel hmuh ṭhin a ni a, financial year khat chhunga additional fund hmuh changte pawh a awm.

Tun dinhmunah BADP scheme hi tihtawp a ni tawh a, Central aṭangin hnathawh laklawh la zawh lohte zawhna tur fund chauh hmu rih a ni. August 25-26, 2025 khan kum tir lama Union Cabinet-in a lo introduce tawh BADP thlaktu tur Vibrant Village Programme (VVP-II) chu Delhi-ah launch a ni a, hman ṭangkai thuai theih beisei a ni. VVP-II guidelines zir chian mek a ni a, BADP thil tum aia huam zau zawk tura ngaih a ni. VVP- hmangin Indo-China border a state-te’n hma an lo la tawh a, tichuan VVP-II hian Indo-China border-a mi lo zawng international border-a state-te a huam ang. Mizoram tan chuan Indo- Myanmar leh Indo-Bangla border-a RD block 16 a huam tura ngaih a ni.

6. RMIS (Rural Monitoring Information System)

Rural Development Department hian Central leh State funded scheme eng emaw zat a khawih ṭhin a, heng implement-na tur hian Mizoram chhunga RD block 28-te nen an ṭang ho ṭhin. Heng kaihhnawiha data pawimawh zawng zawng leh work status te awlsam zawka in share theih nante leh administrative department lam establishment kaihhnawihte pawn sâwt taka hma an lak theih nan RMIS hi duan a ni. He project hi RD Secretariat, Directorate, SIRD, RD block 28 leh DRDO 11-te leh RD subordinate’s department zawng zawngte thlun zawmtu tur a ni a, main server chu RD Directorate-ah install a ni.

7. Social Audit

Sorkarin mipuite hmasawnna atana sum a hman dan chipchiar taka tarlanna a ni a, sawrkar hnathawh hrang hrangte enfiah a, mipuite'n an thlir let theih nan hmanraw ṭangkai tak a ni. A thil tumte chu sawrkar dan, programme leh policy te rintlak leh langtlang taka kalpui a ni ngei em tih fiah a, mipuite hnena an hamṭhatna chungchang hriat chiantir hi a ni. Mipuite'n an vuivainate an au chhuahpui theihna tur remchang a siamsak bawk. A hnathawh tlangpuiah chuan, mipuite chanvo leh hmasawnna hna kalphung hriattir a, cross verification hmanga mipui sum bothlau lak let a ni.

Tlipna

Rural Development Department-a thawktu (Secretariat leh Directorate)-te inpekna a ropui hle mai a, officer-te’n an chan scheme-te an hre belin a bengvarthlak tak zet zet. Mizorama scheme hriat hlawh tak MGNREGS, ni 100 inhlawhna kan tih mai chungah hian tuna kan kalpui mek aia hlawk zawk leh lukhâwng nei deuh zawka kalpui dan hi awmin a lang. He scheme hnuaiah hian a remchang châng thawk mai lovin, khaw tinin an khaw tana project ṭha tur ruahman ni ta se, chu project chu district level-ah lo thlir zui ta se. Hetianga hnathawh a nih chuan he scheme hnuaia hnathawhte hi hei ai hian nasa takin zokhaw lam hian kan chhawrin hmasawnna atan kan hmang ngeiin a rinawm.

Tin, ni 100 inhlawhna scheme hi a ṭangkai viau lai hian, thawk loa pawisa hlawhna tur kawng zau tak a inhawngin a lang a, hei hian kan rilru (moral) a tichhe thei viau dawnin a lang; ruahmanna ṭha zawk a lo chhuak ngei turah beisei ila. Heng hmalaknate hi mipui vantlangin awlsam taka an hriatthiam theihna tura chhawp chhuah hi scheme hlawhtlinna tura thil tihmakmawh a ni.

Central-in scheme a duante hi a hamṭhatna dawngtu tur ngeiin an dawn theih nan state sorkar inrelbawlna langtlang leh mipuite’n mahni dikna chanvo hriat chian a pawimawh. Hetiang hun hlu buatsaihsak kan ni hi kan lawm tak zet a, kan zirlaia mi ngei mai, a field-a thawktute’n min zirtir hi kan vannei em em a ni. He department-a thawktu zawng zawngte chungah lawmthu kan sawi mawlh mawlh e.

- Gaby Zobiakhlui Sailo, 5th Semester, Dept. of Sociology Govt. T Romana College