Mizote leh kan film industry
September 11-12 inkar khan Pachhunga University College, Mizo department chuan, ‘Tun hnai Mizo Thu leh Hla Dinhmun: Hawi lam leh Sukthlek’ (Two Day National Seminar on Understanding Contemporary Mizo Literature : Issues and Concerns) tih a buatsaih a, he hunah hian Mizo lemchan khawvela sulsutu zinga mi, Leitlang pictures neitu Mapuia Chongthu chuan Mizo film industry-in sorkarah chhiah Rs vbc 2 vel an chhung lut tawh tih a sawi.
Mapuia Chongthu thusawi aṭang hian Mizo film industry a ṭhang hle tih a lang a, Mizo film chauh zawrhchhuah smart phone application ringawt pawh, hriat theih mai chinah Lersia Play, Runmawi leh Vaki te a awm tawh a, hei hian Mizoin film kan siam nasatzia a tilang.
Media lamah pawh kan lo hmu ṭhin a, Mizo ṭhalai lemchan thiamten, tun hma ngawt ai chuan sum pawh an hlawh hnem tawhin, a film siamtute ngat phei chu hausakpui tak tak an awm nual tawh niin a lang. Ṭhalaite tan eizawnna kawng thar a inhawng tihna a ni a, a lawmawm em em a, heti lama tuimi, hlawkna em em awm loa rei tak lo vahvaihpui tawhte phei chu an lawmpuiawm hle.
Chutihrual chuan Mizotena film kan siamte hi Bollywood emaw, Hollywood emawte anga thlifimtu awm ve tawh lem lo, siam zawha a siamtu lamin an duh hun huna an chhuah tawp theih niin a lang a, chu chu a him ta lo a ni.
Bollywood bikah chuan Central Board of Film Certification (CBFC) lamin a lo thlifim ṭhin a, hetiang deuha lo thlifimtu hi Mizoram pawh hian kan mamawh ve ṭan tawh mai lo maw? Beng sika ngaihtuahna sen ngai niin ka hria.
Tun hnaia Mizo film pakhatah chuan, a changtute kha Hollywood movie sexy tak ang maiin an khawsa a, Mizorama thleng atan chuan kan society nena en remin, a hma mah mah deuh lo maw? tih loh theih a ni lo. Kha'ngte pawh kha a thlifimtu chu nei ila, mipui vantlang en theiha khati maia chhawp chhuah kha a nih ka ring lo.
Chutihrual chuan film siamtute pawhin, mipui rilru kaihruai a, an rilru hneh theitu an ni tih inhria se, a ṭha lo zawnga Mizo society pholang thei leh kaihruai thei thil hi chu a thlifimtu awm kher lo pawhin, mahnia thlitfim nachang hriat a ṭha hlein ka hria.
Hnam naupang tak, inven ngai tak kan la ni reng tih hi theihnghilh lo ila, "Hlauh kan ngah lutuk," ti ṭhin bawk mah ila, ven ngai tak, fimkhur ngai tak kan la ni tih i theihnghilh lo ang.
Mizo film siam ṭhintute tan Mizo film industry-ah ei hmuhna tlak a awm ve ta hi ka lawmpui em em a, chhungkuaa en tlak, ennawm ṭha tak min chhawpsak zel pawh ka beisei e.
- John Z