I MAMAWH CHAUH LEI LA

Awhna te, duhna te, mamawhna te hi thil inmil ngai lo a ni a. Mi tam tak chuan kan ngaihtuahnaah kan kalkawp tir ṭhin avangin mihring nun a tibuai zo ṭhin. Awhna ngah phei hi chuan hringnun a tibuai nasa a, kan mamawh pawh ni lo miten an neih avanga neih ve duhna thinlung min put tir fo. Kan awh zawng a nih chuan neih zawng zawng senga lei mai kan ching a, a tawpah chuan chhungkaw khawsakna a tih buai phah ṭhin a ni. 

Awhna hi sual a nih avangin kan neih phak bak chu mi ta awt kher lo turin kan rilru chhungrilah kan intiam tlat a ṭul. Mahni neih phak tawk a lungawilohna chuan rukrukna te, tualthahna hial pawh a thlen thei. Duhna leh ma­mawhna ngat phei hi chu kan ngaihtuahna ah kan kalkawp tir nasa lutuk a, nitin a kan hringnun tibuaitu lian ber a tling ta a nih hi. Tunlai khawvelah chuan chhungkaw nu leh pate hriatpui kher lohvin kan faten nupui pasal an nei a. Kan faten, ‘ka duh em a ni’ an tih avanga rawn hruai lut chu an ni ngei mai. Mahse chhungkua in a mamawh an tling zo lo fo ṭhin. Chumi a nih avang chuan broken family (chhungkaw kehchhia) an lo chhuah hnem phah ta a ni. Chhungkaw mamawhna aiin an duh em emna an dah lian zawk ṭhin vang a ni. 

Chhungkaw nu leh pa chuan chhungkua in a mamawh mi ṭha chu an hre ngei mai.  Nu leh pa te duh pui an faten an nei thei a nih chuan chu chhungkua chu a lo hlimin a lo ropui a, Pathian malsawmna changin a lo ding chhuak thuai ṭhin. Nupui pasal inzawnna kawngah pawh hian mahni duhna aiin chhungkuain a mamawhna zawn chawisang thei ila a va ropui dawn em! Chuta ṭang chuan chhungkaw nunphung a lo kal dik tawh ang a, khua reiah phei chuan khawtlang nun a lo mawi zawk ang a, ram hmel a timawi dawn a lo ni reng mai.

Bazar lamah chhungkaw ma­mawh chauh lei tura chhuak te pawh hian kalkawngah an mit la deuh thawmhnaw an hmuh chuan mamawh ta riau in an inhre chawp a. Chhungkaw mamawhah an ngai tel tlat ta ṭhin a, an lei leh nge nge ṭhin.Mamawh te kan lei hma chuan kan thil duh riau te kha kan kalsan zel a ṭul dawn a ni. Mamawh chauh kan lei theih chuan chu chu sum khawlna ṭha ber a ni. Miin a mamawh chauh a lei ṭhin chuan chumi chuan mi rin ai daihin sum a lo nei tawh ṭhin. Mamawh pawh ni lo kan duh zawng leh kan awh zawng lei nan sum hi zofate hian kan hmang ral nasa a, kan chhungkaw khawsakin a tuar ta ṭhin a ni. Hemi kawngah hian mitin kan in en let a, kan insiam ṭhat a ṭul khawp mai. 

- H.Neihchungnunga, Durtlang North