THE BIBLE SAYS SO!

Kan thupui chu SIMNA a ni ang a, Lal Isua thupek atangin kan tan ang a, Bible bung leh chang tlawhchhanin hma kan la ang. A hmansa berin Lal Isua thuchah hmasa ber chu SIMNA a ni (Mark 01:15). Thlarau Thianghlim hnathawh hmasak ber pawh khawvel an sualna hmuh tira simtir a ni (John 16:8-11). Simna hi chhandanma chang tura step hmasa ber a ni. Miin simna a neih loh chuan rinna a nei thei lo! Rinna a neih loh chuan Pathian khawngaihna a chang thei bawk lo (Ephesi 02:8,9).

Lal Isua khan ringtu zawng zawngte zawm tur Chanchin Tha puah darhna thupek A pe a. Chuta A thu laimu pek chu “SIMNA leh Sual ngaihdamna” thu a ni. Sual simna leh sim avanga ngaihdamna thu a ni (Luka 24:47). Sual simna hril peih lo thuhriltu chu thuhriltua chhiar tlak a ni lo, Lal Isua thu a zawm lo. Hetah tak hian Mizoram thuhriltute hian inbihchian a hun ta. Mi tam tak hnenah chhandamna huang thlen zo lo thuchah hi kan puang palh ang e.

Sual simna kan sawi dawn chuan suak awmze dik tak hriat a ngai. Sual awmze dik tak leh Pathian hnen ata hnawhchhuah kan nihna chhan hi kan hmu fuh lo a nih chuan kan tan chhandamna kawng a inhawng dawn reng reng lo. A nih leh sual chu enge ni? Sual chu Pathian thu hnuaia awm duh lohna thinlung hi a ni! Evi leh Adamate khan sual nei lova awm hun lai an nei a, a rei zawng erawh kan hre lo. Setana a lo lana a veh thlemna thu pawh kha Pathian thu hnuaia awm kha an pawm thlap a ni tih a lang. Setanan a’n beih zui zel khan, Pathian thu hnuaia awm kha an tana thil tha lo niin an ngai ta tlat mai a, Pathian thuhnuaia awm duh lohna an lo nei ta a, an chhungril nun chu thiltihin an tilang ta a. Setana thuhnuaia awma Pathian thuhnuai ata chhuah an lo duh ta. Pathian thu hnuaia awm duh lohna tak kha SUAL chu a ni ta.

He nun hi Setana atanga an dawn a ni a, Setana nun a nih avangin Pathianin A hnena awm atan A duh ta lova, A hnawt chhuak ta (Mathaia 23:33; Johana 08:44). Pathian thu thua awm tawh tura i inpek loh chuan Setana nun kha i pai reng ang a, hun tawp a thlen hunah meidilah i tla ang!! Zawhna pakhat i zawh duh a awm ngei ang. Pathian thu thua awm chu chhandamna em ni? Thiltiha chhandam nih a va ang ve! Ni miah lo, kan la sawi zawm dawn nia.

- F. Lal Thanzuala, 9436141242