MIM KÛT vs MIZO KRISTIANNA
Kan rama Krista chanchin ṭha lo pawm hmasatute ṭhahnemngaih luat avangin kan hnam nunphung leh ṭawng kauchheh tam tak chu paihbo leh hnawlin a awm. Mahse, Pathian khawngaihna azarah thlaraumite’n kan ṭawng ral mai tûr tam tak chu Pathian fakna ṭawngkam atan min lo seng khawlsak hram hram a, chungte avang chuan Vanram ngaih hla sak nuam tak, Mizo ir-awm leh ṭawng kauchheh inrem takin kan lo neih theih phah a, a lawmawm tak meuh a ni.
Mizo pipute kha zai leh lâm ngaina tak an ni a, an zai remtu atan khuang leh tuiûm te, seki te, tumphit te an khâwngin an tum ṭhin. Kût ni vângthla leh zu hmun kha a huhova an zaina te chu a ni. Tichuan, sakhaw thar, Kristianna chuan kan hnam nun chu Vanram kalkawng dâltuah ngaiin min hnawlsak a. Kan zai leh lâm mai bakah, kan hmanrua leh tihphung zawng zawng chu thiam loh min chanter a. Mizo mizona ber hnam nun leh Krista chanchin ṭha chu ui leh kel angin a intauhtir ta bup bup mai a ni; a va pawi em.
Mahse, Lalpa Pathian chuan duh leh duat taka a siam Mizo hnam nun ze mawi leh hla rua mawi tak takte chu a boral hlen phal lovin, thlaraumite hmangin kan hnam nunah chuan min rawn chawi chhuahsak leh ta a. Chumi avang chuan khawharna chhûm hnuaiah pawh Vanram ngaih hla mawi tak tak hla tam tak kan neih theih phah ta a. Heng Mizo ir-awm chhuak hlâte hian kan lungngaih chu lawmnaah a chintir ṭhin a ni. Zu hmun sa hmuna kan hman ṭhin khuang (chawm khuang) pawh chu Pathian fak nan biak in tinah kan lo hmang ve leh ta bawk.
Hetih lai hian, kan hnam culture–kût leh lâm te erawh Pathian fak nan kan la chhawp chhuak thiam rih lo. Eng tikah emaw chuan cheraw kân leh khuallam te, kan lâm chi hrang hrangte hi Pathian chawimawina hmanraw pawimawh atan kan la seng lut thiam ngei ang.
Keini Presbyterian Kohhran hi chuan kum tawp December ni 31 zan hian veng chhunga kan kohhran mi mitthi kan neih zawng zawng pualin hriatrengna leh Pathian hminga inkhawm kan nei ziah ṭhin a. Hetiang hian kan pi leh pute khan Thiṭin Thla hian mitthi pualin kût an lo buatsaih ṭhin a, chu chu Mîm Kût an vuah. An lo va sakhua em.
Zu hmun sa hmuna an hman ṭhin khuangte biak in chhunga kan seng luh tawh hi chuan mitthi puala an lo hman ṭhin Mim Kut pawh hi kohhran ni pawimawhah seng lut ngam tawh ila. Chutiang zelin, nula tlangval ṭhalai puala an lo hman ṭhin Chapchar Kut pawh hi KṬP inkhawmpui hun tan seng luhsak mai ila. Naupang inkhawmpui kan tihte pawh Pâwl Kût nen hian ṭhuai khawm thiam ila chuan kan hnam nun leh kan sakhua hi zai khatah a lo luangza tawh ang a, Kristianna leh Mizo nun chu insual lovin an lo luangza tawh dawn a ni. Chutiang a nih chuan tlawmngaihna leh Lal Isua nun te chu pumkhatin kan lo hmu thiam thei tawh ang a, kan hnam hian Pathian anna kawngah hma kan sawn phah ngei a rinawm.
Hawh u, pi pu nun leh Kristianna hi i inremtir mawlh ang u.
- R Ramhmangaiha, President, Hnam Chhantu