DIKNA KAWNGAH MZU ṬANG FAN FAN RAWH SE
Vanglaini chanchinbu September 25, 2025 chhuakakah khan 'MZU-a finance officer lak a nih dan thawktute leh zirlaite'n an duh lo' tih thu kan lo hmu a; ngaihtuahna a tithui hle.
State university aia central university neih zawk a nih theih nana theih ang anga ngaihtuahna sengtu ka lo ni ve ṭhin, tunah sawi vek erawh chu ka tum lo. Mahni ta anga enin hma a sawn nan mahni phak tawkah kan lo ṭang ve reng a ni.
Kum 1996-ah khan Pu B. Lalṭanpuia te hovin Shillong-a seminar an buatsaihah khan (UPSC Civil Services Main exam lai laiin!) ka tel ve a, seminar ṭha leh ropui tak a ni. Kha workshop khan MZU, Centre ta a nih taknaah pawh kawng ro a su hle niin a lang (pui theitu CM Pu Hawla hmin thluk theih dan chungchangte pawh sawi ho a nih kha). Chumi hnuah Mizorama chanchinbu darh zau ber he Vanglaini chanchinbu ngeiah hian kum 1996-ah khan ka lo thai ve tawh bawk. Hei bak pawh hi ka phak tawkah theih ang angin hma ka lo la ve ṭhin a ni.
Kum 2001 aṭanga ding ta kan MZU hian result ṭha chhuahin, kum 2025 a lo inher chhiah meuh chuan Indian Institute of Ranking Framework (IIRF) survey angin, India rama varsity ṭha ber zinga rawn invawrh chho zelin 25-na a rawn ni phak a, kan lo lawm hle a ni. Chuvang chuan, a hna thawh chhoh zel hi kan lo chîk ve zel a. Hna lak kawng zawh hi tluang purh chu a ni lem lo; mahse, harsatnaa awm ang angte a su kiang thei zel nia a lang hi a hlawhtlinna leh varsity ṭha a nih theihna chu a ni.
Tuna an harsatna nia lang pawh hi ṭha tak rawn zi chhuak turah ngai ila. Tlem lai deuh khan hna lak chungchangah thawm a rawn nei zauh a, lak tawh han sûta han tih ṭhat leh tih angte pawh a awm niin a lang. Kan central university neih chhun hian hma lam a pan zelna kawngah theihthawp chhuah zelin, hna lak chungchangah pawh a fimkhur deuh deuh a ngai hle. State university kan neih hunah pawh kawng hrang hranga kan entawn tur a ni. Sûlhnu ṭha an hnutchhiah chuan State of Mizoram University-in u zâwk (a siam dan inang lo State Act leh Central Act mah ni se), chhun tur ṭha a nei dawn tihna a ni ang a, sûlhnu chhia a hnutchhiah vaih erawh chuan state university tan pawh a ṭha dawn lo a ni.
Chuvangin, institution ṭha entirna zinga pawimawh em em–hna lak reng rengah fimkhur lehzual turin ka'n ngenin ka'n chah ve a. Mizoram hmasawn nan, ṭhalai lehkha thiam, chanchin ṭha hril, ram leh hnam tana chhenfakawm tak takte chher chhuak zel a, hma lam pan zel turin laina induhsakin duhsakna kan hlan e.
– Dr J.T. Vanlalngheta, ECM, IIPA, Mzr Rgnl Branch c/o Deptt of Pub Admn, MZU