Hringnun hi – 9

Ṭum khat chu Durtlang Damdawiinah khian kan nau dam lo ka riahpui a, kan piah lawk khumah chuan tlangval, ke dinglam hék huam hi a nu hian a riahpui bawk a, chu tlangval ke chu a chawnpuar vel zawng zawng hi a hek huam mai a, an dressing laia hmuh phei chuan khawngaihthlak tak a ni. Damlo dang zawng zawng ai pawh chuan ani chu na ber hialin ka ring a, amah pawh chuan na a ti hle bawk a, tuar zuau deuh tan phei chuan a rapawm thei hial ta ve ang. Tisa pangngai nei leh tur chuan hun rei tak a duh ngei pawhin a rinawm hial a.

Nimahsela, a nu erawh chuan chu damlo awmna room zawng zawng chu boruak nuam takah a siam thei tlat thung si a, a hmel hmuh a nuamin a ṭawngkam a zangkhai em em a, a nui reng peih bawk a, a kianga awm a hahdam em em bawk a ni. A tir lamah chuan ngawi rengin ka thlir ṭhin tak na a, damlo dang awm vete a biak kual peih bawk avang leh keini pawh min rawn biak tak fo avang chuan kan ngaina ta thuai a, a fapa damlo dinhmun aṭanga ka ngaihtuah phei chuan mak ka ti hial zawk a: harsa ve tak chhungkua aṭanga damna duh vanga helai hmuna rawn awm ve bawk an ni a, chhung leh khat pur tur an neih pawh ka hre chuang lo.

Khawvel hi ‘kan khualzinna ram a ni’ an ti mathlawn lo a, nang leh kei pawh chu khualzinna ramah chuan kan awmin ni tinin hun kan hmang chu a ni a, nimin thil thleng avangin vawiin ka lawmin ka hlim a, naktukah eng nge thleng leh dawn kan hre chuang hauh lo a, a ṭhente chu mittui nen hun an hmang a, a ṭhenin beng thleng thlengin bawp an khai bawk a. Nimahsela chutiang thil chu a ngai rengin a thleng bik hauh lo a, nimina hlimte kha vawiinah chuan an lungngai a, nimina ṭapte kha vawiinah chuan an nui leh bawk thung a, hlim reng tum mah ila a theih chuang loh a, lungngaih reng pawh tum ila a theih chuang hek loh. Hetiang hi khawvel dan chu a ni.

Chutiang ah chuan engtin nge nang leh kei hian hun leh nun hi kan hman zel ang a, kan inbuatsaih dawn tak le? Harsatna hrang hrang bakah thihna hial pawh kan hmaah hian a awm tih hre rengin dawngsawng reng thei tura kan inbuatsaih a ngai a, a lo thlen hunah pawh chiai mai loa kan awm theihna turin kan inpeih reng a ngai a ni. Durtlang Hospitala damlo na tak tuar tlangval kha na hle mah se la a kianga awm reng, amah enkawltu a nu thinlung erawh entawntlakin a awm tlat thung a, hmeichhe awm nem té mah ni se la a thinlung chu a hausain a ropui tlat a, patling tam tak tluk loh a nih avang chuan damlo khuma awm reng turte chuan thei leh thei loin an pan a, a kiangah hlim takin hun an hmang fo thung si a ni.

Lehkhabu pakhat ka chhiarah chuan ‘Ropuina Dik Tak’ tih thupuia hmanga hmeichhe naupang ziak hi ka chhiar a, chu chu hei hi a ni; Ropuina dik tak chu neih tum avanga neih mai theih a ni lo. I zawn loh hunah chiah i nei thei a ni. Thawmhnaw ṭha tak takte hi a ṭha khawp mai. Thawmhnaw ṭha tak tak han inbel hi chuan tuihnai tak anga lan hi a awl hle mai a. Mahse ropuina tak tak i hmuh duh chuan thawmhnaw chhe tak inbel chung pawha thawmhnaw ṭha inbel ang maia khawsa thei hi en mai rawh. Vawi khat chu ka nu naupai laiin an inah chuan sava pakhat, Bill an tih chu an khawi a, Bill chuan a ke a titliak a, a thih maite pawh an ring a, a nih loh leh tihhlum mai pawh ṭha zawkah an ngai a ni. Nimahsela, a tuk khua a lo var chuan a ke ṭha lam hmang chuan áwn ang ṭei ṭawi hian a lo ding hram hram a, a lo zai vet vet mai a, chu chu ‘Ropuina Dik Tak’ chu a ni.

- Mahmuaka Chhakchhuak