Tourism Calendar

Tun hnai khan Tourism Minister Pu Lalnghinglova Hmar chuan ZPM sorkar hnuaiah project thar cheng nuai 35,798.22 man an neih thu a sawi a. Nakkum aṭang chuan Tourism calendar mumal tak siam a ni tawh dawn niin a sawi bawk a, hei hi a taka tihhlawhtlin hlan a nghahhlelhawm hle.

Tourism Minister leh a thawhpuite’n ngaihtuahna zau tak an hmang a, khualzinte'n Mizorama lo zin hun tur an hriat lawk theihna atan tourism calendar mumal tak siam ṭula an hria hi a fuh dawnin a hriat a. Kût leh festival hman ṭhin hrang hrangte a hun tur kan bituk lawk vek nia a sawi te kha a tak a nih dawn chuan a ṭha khawp ang.

Tun hnaiah 'lo zawh rûnpui' a lar a, minister hrang hrang bakah Chief Minister thlengin loah an feh kan hmu a. Tun hnaia an hmanna langsar tak kha chu sawrkar pisa chawlh niah a ni a, a hun tur pawh an thlang thiam viau mai.

Social media lamah lo zawh runpui sawisel tawk ka hmu nual mai, a sawisel tur hriat lohthlak hi ka tia! A chhan chu, khualzin hi chi hrang hrang an awm, ram dang aṭanga rawn zin lut leh Mizoram chhunga chengte hmun hran, khaw hrana kan zin hian khualzin kan ni vek. Lo zawh pawh hi tourism kaihhnawih lian tak a ni a, khawpui mite sum chu thingtlanga chengte tana a luan chhuahna hmanraw pakhat a ni.

Hei chauh hi a ni lo, sum leh pai leng vel mai bakah hian pi leh pu aṭanga kan chin dan ṭhan, thlawhhma neih leh a kalphung kan hriatna, zirlaibua mi chhiar aia chiangin a taka kan en theihna leh tawn theihna a ni a, ṭangthar tan chuan thil ṭha leh ṭangkai tak a ni tih hi a chiang.

Kût leh festival kan hman hrang hrangte hi kan hman chhan leh hman ṭan hun a inang lo fur a, ṭhenkhat kan hmanna a rei deuh tawh laiin ṭhenkhat erawh hun rei vak lo aṭanga kan hman te a ni hlawm. A hman ṭan hunah chuan buaina a awm lo turah ngai ila.

Tunlai mil deuha hman a nih avanga ho ta riaua ngaih te, mahni hun laia tih chhuah a nih loh avanga hlu lo riaua ngaihte hi a fuh lo. Mizo tana thil ṭha leh hmasawnna a nih chuan inngaihhlutsak tawn a, tualchhung mite’n engtin nge hlawh taka an hman theih ang tih ngaihtuah hi a pawimawh lai zawk chu a ni.

Thuneitu lamin ngaihtuahna an sen lai a ni bawk a, kût leh festival hrang hrang kan hman turte hi tualchhung mite tana ṭangkai leh hlâwk thei ang ber tura duan ni thei se, a hman dan nei hrang ve thliah tliah bawk ila a duhawm hle.

Punkawm apianga maia zai leh lâm ringawt lo deuh hian, kût leh festival hming azir khan kan tih leh chin ṭhin dante danglam ve deuh se la. Chutianga kan ti thei a nih chuan mipui a huap zau ang a, tun aiin a hlu lehzual hlawm ngeiin a rinawm.

- Ramtawna, Aizawl