KAN VUI LEH ṬHIN

Panlai nun hnutiang chhawnin, râwllai nite’n zamual min liansan zo ta. Kan vanglai nun leh ṭhat lai nite pawh hian min la her liampui ang a, chhung kimtea kan hlim lai nite pawh hian mual min la liamsan ang. Ṭhen hnu ngaiin mittui nên kan la thlir kir dawn asin. Kan sulhnu hi ṭhangtharte’n an la rawn chhui dawn a, kan tu leh fate zahna thlentu kan ni ang em? Dik lo tak leh hausak duh luata hian mite tan harsatna thlentu leh mite huat nan zawng, hringnun hi a tawi lulai em mai.

Kan ram politic zinkawng hi heti takin a lo ṭawphnawk ang tih ka lo ring phak lo. Ni e, politic school a awm âwm pawh ka hre lo va, politic zirin chawhma pawh ka kal hek lo. Kan politic khelh dan hi dâwt sawi huai huai leh zêldin thubâwl thiam a piang mai hi an tla nâ em ni, a tih theih ta. Dâwt sawi bânsanin, thu dik tak sawi zawk rawh se, tih ziak erawh kan tukhum chhah kan chhawn a, therhlo vawrh chak apiang dinchanna rama kan siam zo ta. Zoram hmangaihtu rilru a na ngawih ngawih a, hei vang hian mifingin ngawih an chuh a, mi felte’n kut kuangkuahin an thlir mek a ni hi. Dikna tawmimna ram, dâwtin hmun lûn lai ber a luah zawhna ramah kan chan zo dawn ta. Politician pachhe tak kan awm ta meuh lo. Kut hnathawkte ṭânghma ngai ni âwm takin vision ṭha tak tak kan duang a, an chunga lênga kan inngai a, lalna leh thuneihna pumhlum neitu ang ziazâng leh kut hnathawkte mamawh zui lo ni âwm taka kan awm lai hian, ngaihtuah ṭhelh kan nei a ni.

Ka tuh leh ka seng loh buhfai kan ei a, kan vulh leh kan châwm loh sa kan ei ṭhin. Kan sak leh kan rem pum ni lo inah kan chêng a. Aw, mihring nun hi inmamawh tawn vek chu kan lo ni chiang mang e. Ni tin kan mamawh, a lova kan awm theih loh, kan châwi leh kan thâl ni si lo tui kan in a, kan ṭhui thiam loh thuam inbelin kan lêng vel mek si a. A thiam ber pawhin a tlaw ber a mamawh a, inthlauhthla tur chuang hi kan va ni lo em. Mi hausate pawhin mi retheite tel lovin an khawsa thei hek lo. Sorkhar hna thawk chhungkua pawhin loneitute tel lovin eng thlai thar mah a ei thei bik hek lo. Hmusita endawng mai tur kan ni bik lo ve. Ni tin kan nunhonaah hian tu mah hi indah sang chuang tur bik kan awm lo ve.

Sorkhar hmasa kan hnâwl a, sorkhar mekte kan sawisel a. Heiham! Biakin khata lawiza, party hran aṭangin kan inbei a, Krista zuitu inti ṭheuh siin politic tui nu-ah kan chengza leh si a nih hi. Kan ram politic hi zawng, a lut thûk apiang kan vui nasa ting mai dawn a lo ni.

Kan party sorkharah kan lawm zo lo va, kan beisei ang diak diakin chan ṭha kan chang reng thei lo, tih lam reng ngaihtuah duh lovin, KAN VUI LEH ṬHIN.

- Zothansanga, Chhiahtlang Kawn Veng, 9612333536