Pu Duha hian Pu Zorama a ang ṭan
'Pu Duha' hi tuna kan Chief Minister Pu Lalduhoma hi a ni a, 'Pu Zorama' tih hi kan CM hmasa, MNF sawrkar laia CM Pu Zoramthanga a ni. Pu Duha'n engtin nge, eng thilah nge Pu Zorama a an ṭan dan chu ni le? A thusawi danah maw le.
Zêp lovah chuan Pu Zorama kha hun eng emaw chen CM a nih tawh hnuah kha chuan a thusawi kha mi tam takin nuih chânin an châng tlai mai a. A zialo khawp mai. Chutiang bawk chuan tuna kan CM Pu Duha thusawi hi mi tam takin nuih chânin an châng ta deuh tlat hian ka hmu nia!
Pu Zorama'n a CM hmasak laia 'Constable aṭanga DGP thlenga kaisan theih' tih a sawi khan (a sawi ngei em tih kei chuan ka hre lo) mi tam tak nuih a tizâ a. Aizawl khawpuia kawng chhâwng siam, leiverh, Aizawl traffic jam awm lohna khawpuia siam, cheng nuai 3 sem, tihte pawh hi miin an nuihzat zualte niin ka hria. A thusawi hrang hrang avangin 'mumang ram' lamah chêng a, a mumang ram chu sawi chhuak ta mai ṭhina ngaihna a awm a ni.
Tuna kan CM Pu Duha pawh hi a duhthusam, a mumang ram thilte mipui vantlanga sawi chhuak mai ṭhina ngaihna a awm lian sawt viauvin ka hmu pek a. Ngur/Vapar Project a tih, Vapar rama Rihdil aia lian zawk dil siam a, a chhehvel khaw pasarih (Champhai telin) kum 2 chhung ruahsur miah lo mah se a châwm theih dawn thu a sawi te, tun hnaia Tualpui lo zawh rûnpuia an neih ṭuma Tualpui khaw tihhmasawnna tur a sawite kha a 'mumang ram' thil deuh chu a ni. Hetia ka tih avang hian thil tih theih loh hulhual a sawi ka tihna erawh a ni chuang lo.
CM Pu Duha'n mihring nuai 10 chuang chenna tur Thenzawl Peace City din a sawite hi ngaihtuah chian chuan a nuihzatthlak riau asin! A sawi ang taka (mi nuai 10 vel chenna khawpui din) tihlawhtling tur chuan huphurhawm tiu teu tak mai a nia. 'Thil tih theih loh tawp a ni' chu ka ti ngam bik lo a, mahse, kei chuan kum 500 chhung pawhin a hlawhtlin ka ring lo; khawvel awm chhung pawhin a hlawhtling ka ring chiah lo! Thenzawl hi tuna Lunglei khawpui tiat (population-ah) ni tur pawhin kum 100 vel a ngai ang em aw, ka ti rilru a nih chu! Hma lam hun thui tak thlir chunga Thenzawl ṭhang zel tur hisâpa tun aṭanga ruahmanna mumal tak neih lâwk erawh a ṭha em em a, a ṭul bawk.
Hengte leh a thusawi dang dangte avangin kan CM Pu Duha hian kan CM kal ta Pu Zorama kha a ang ṭan riauin ka hre tlat pek zu nia!
Chuvangin, ka thurâwn ka'n sawi ve ang a: Kan CM duh tak Pu Duha hi thusawiah fimkhur se la, insûm rawh se, tih hi a ni. Tun ang renga a kal a, a rilrua awm ang ang mipui hmaa a sawi mai zel chuan Mizoram mipui hian an la nuihzat thuai dawn; chutiang a nih chuan an party hian an chhiat phah ngei bawk ang.
- Zodinsanga