Sorkar lehkha pawimawh vawn ṭhat kawnga library leh archive pawimawhna, CSS buaina aṭangin

Tun hnaia CSS hnathawkte lungawi lohna chungchang media hrang hrangah kan hmu ṭheuh tawh awm e. Sorkar department hrang hrangte pawh he buaina chinfel nana document hlui ṭangkai turte hai letin an buai ṭhin hle pawhin a rinawm. Heng sorkar lehkha pawimawhte vawnhim kawnga library leh archive ṭha neih pawimawhzia tlemte han thai lang ila.

The Mizoram Public Library Act, 1993, Regd.No. NE 907, Vol XXII Aizawl, Wednesday 10.3.1993 Phalguna 19. S.E.1914 Issue No.42-ina a tihchhuaha public library siam theihna leh enkawl zuina tur phalna Mizoram sorkarin a siam tawh a. Mizoram Public Record Act 2011 leh Mizoram Public Record Rules 2014 pawh kan lo nei tawh bawk. Kan CSS (Centrally Sponsored Scheme) buaina ang chi awlsam zawka chinfel kawngah heng kan Rules leh Act hian nasa taka department ṭhenkhatte a puih theih dan a awm a, chu chu document pawimawh lo vawn ṭhat kawngah a ni.

Library hi lehkahbu leh digital resource chi hrang hrang dahna leh hawh chhuah theihna hmun a ni a; heng lehkhabu, digital resource leh lehkha pawimawh enkawl zui leh dahṭhat hi a tih tur pawimawh tak a ni. Chutiang bawkin archive pawh hi lehkha pawimawh leh la tlangzarh loh document chi hrang hrang dahna leh vawn ṭhatna hmun pawimawh tak a ni bawk. Sorkar lehkha pawimawh thlengin library leh archive hian enkawl zui leh vawn ṭhat hna an thawk ṭhin a ni. Chanchinbu chi hrang hrangte library hian subscribe ve ṭhinin, chung chanchinbute chu a back volume te a dahṭha a, a lo enkawl zui ṭhin nghe nghe.

Tin, a physical form an dahṭhat piah lamah, digitize leh ṭhinin, a digital form-in an dahṭha leh ṭhin a ni. Librarian emaw archivist khan an hmanraw neih ṭhat dan azirin digital libray hmangin document hrang hrang kha a bo mai loh nan a dah leh ṭhin bawk. Hei hi document en let tur a awm châng pawhin thil ṭangkai leh pawimawh tak a tling nghe nghe a ni.

LPS Chibai Mizoram September 26, 2025-a kan hmuh angin Art and Culture Department hnuaia Mizoram State Archive chuan record management workhop September ni 25 khan a buatsaih a. He workhop-ah hian Mizoram State Archive-a record vawn ṭhat tam ber chu British-in a min awp hun laia mi a nih tawh thute kan lo hmu a. UT leh state kan nih tawh hnua record an neih ṭhat loh tial tial thu kan lo hre tawh bawk a ni. Hemi a nih avang hian document vawn ṭhat leh enkawl zui kawngah sorkar pawh ṭan a lak thar hle a ngaiin ka hria a ni.

Tun kan CSS buaina inṭan hma kum kal ta dt. 21st October, 2024 khan Mizoram sorkar hnuaia Department of Personnel & Administrative Reform Letter No.B.12018/1/2020-P&AR(ARW)-in CSS hnuaia hna thawk mek department ṭhenkhat dil angin document hrang hrang hai let ngai a awm nual niin kan lo hmu tawh a. Document hlui tawh lam phei chu enkawl zui a nih loh chuan a bo emaw, hmuh loh palh te thil awm thei a ni a. Service regularisation lam kaihhnawih a nih ngat phei chuan thawktu ṭhenkhat tan thil pawi tak thleng thei pawh a ni nghe nghe. Hemi awm palh thei avang hian sorkar hian department tinah library emaw archive mumal tak dah dan ngaihtuah se la, a enkawltu tur atan heng lam kawnga thiamna nei bik te chhawr ni ṭhin se.

Tin, sorkar lehkha pawimawh reng reng confidential thilte a nih lem loh chuan State Library, Mizoram State Archive, District Library emaw Sub-Divisional Library-ah te a copy pe ve ṭhin se. Chung document chu hawh chhuah theih lohin awm ta thung se. Heng Library leh archive hrang hrangte hi heng atana mumal zawka kalpui dan awm se la, hna a tihzângkhai piah lamah, dik lo taka document tihdanglam emaw, bothlau awm thei lakah library leh archive hian sorkar nasa takin a pui thei dawn a ni.

- Dr R Laltlanzova, Vengthar, Kolasib