THE BIBLE SAYS SO!

Kan Lal Isua khan Nikodema kha Pathian lalrama luh theih dan A hrilh a, chu chu piantharna a ni A ti (Johana 3:3,5). Chu piantharna chu Lal Isua LAL ATANA NEIHNA a ni A ti bawk, lalram (kingdom)a luh a nih avangin. Isua lalna hmun a ni piantharna chu! Lal Isua chu kan LAL A ni ta. Lal Isua LAL atana kan neih hi kan piantharna lai tak leh kan nun tihdanglama a awmna lai tak a ni a, Isua LAL atana nei lovin, A thu thua awm tawh tura A kuta in “surrender” – na tel lovin a pianthar theih loh!

Pathianin Lal Isua chu kan Lal leh Chhandamtu atan A ruat a ni (Tirh 5:31). I nunah A lal em? I lal A nih chuan i thiltih tur zawng zawng leh tih loh tur zawng zawngte pawh Ama thu vek tur a ni ta a, i in leh lo pawh Ama thuhnuaia awm tur a ni a. I sum leh pai pawh Ama kutah i pe vek tur a ni ta! “Tupawh a neih zawng zawng kalsan lo apiang chu ka zirtir a ni thei loving” A ti a ni (Luka 14:33). Zirtir tih chu ringtu tihna a ni. Khawvel Sorkar hnuaiah chuan “Right to property” sum leh pai leh kan duhzawng thil te neih theih a ni. Mahse mi tupawh a lo pianthar chuan a sum leh pai leh a thil lo neih sa zawng zawngte chu Lal Isua kutah a pe vek tur a ni a, ‘Right to property” a awm thei tawh lo. Lal Isua ta vek a ni tawh ang! Pianthar hi tih namen a ni lova, kan ‘rights’ zawng zawng Lal Isua kuta ‘surrender’-na a nih avangin simna tak taka tang lo chuan thil theih a ni lo.

Luka Chanchin Tha ziakah khan fapa tlan bo khan hmabak tha a nei tawh lo tih a hria a, a pa hnena kir leh loh kha chu thihna a ni tih a hria a, riltama thih chu hlauvin a pa a pan lo thei ta lova; Suangtuah la, fapa tlanbo hnenah khan va kal ta la, khawvel hlimna, sum leh pai leh ropuina zawng zawng pawh va hlui teh, chaw awmna a pa in lo chu pan duh hmel a put tawh miah loh kha! Pan tur dang a hre tawh lo! Thlem khawtlai mai mai theih a ni tawh lo.

Chatuan nunna hi thil tha tak a nih avang ringawta neih theih a ni lo, a lova awm theih tawh loh, ka thi dawn tih hlauva pantute chauh hian pianthar tak takna an chang thei chauh a ni. Kan Zoram mi tamtakte tih sual leh kawng bona chu piangthar lova awm ngam tawh lohna, chhandamna nei lova nun ngam lohna nei pha lovin thil tha tak pakhat anga neih tumin an pan thin a. Fapa tlan bovin let leh chu thihna a ni tih hria a, a pa pan lo thei a ni lo tih a hria ang kha an rilru a ni lo. ‘Conviction of Sin’ sual inhriatna tak tak inchhira simna thinlung tak tak an put loh avangin thil ho te te avangin an nun hluiah an let leh mai thin. Hetiang hote hi chu piangthara sawi tlak pawh an ni lo. Kan ram evangelism pawh hi a pianthar a ngai, Lal Isua Lalna pawm thei khawpa simna an neih theih hi kan ‘target’ hmasa ber a ni.

- F. Lal Thanzuala. 9436141242