Venhim ngai Mizoram University (Save MZU, Save Mizoram)

Mizote hian ram leilung hausakna chhuan tham kan nei lo niin a lang a. Ram hausakna kan neih ve chhun chu a chhunga cheng mihringte hi kan ni a, hei hi ‘human resource’ tih a ni. Ram hmasawn nana pawimawh ber chu a chhunga cheng mihringte thiamna, finna, taihmakna, hriselna, leh themthiamna te a ni. Mihring chher nana Mizoramin hmanraw ṭha kan neih ve chhun chu kan ram zirnate hi an ni. Heng zingah hian India ram pum hriat hlawh, kan hnam tana rangkachak leh lunghlu ai pawha hlu zawk kan neih ve chhun chu Mizoram University (MZU) leh Pachhunga University College (PUC) te hi an ni.

MZU HI MIZOTE TA

Mizoram University din a nih theih nan hian kawng thui tak zawh a ni. May 3, 1988 khan Mizoram Chief Minister Pu Laldenga khan Union Minister (Human Resource Development) Pu P.V. Narasimha Rao (1985-1988) hnenah Mizorama University din a nih ve theih nan lehkha a ziak a. Chu lehkhaah chuan Pu Denga chuan, “Kan inremna thuthlung angin Mizoram chuan University a nei ve thei ngei mai a. Amaherawhchu, India rama zirna sangte kan zir chian hian Mizote mamawh phuhru zo tur kan neih sa aṭang hian kan hmu zo lo va. Zirna sang, Mizote ze mil leh hun inher mila insiamrem thei, khawvel zau zawk thlirpui thei ‘zirna tukverh’ tling, hmasawnna pe thei, university kalphung mumal tak leh subject tam tak zirna hmun, thuneihna sang tak nei kan duh,” tiin a ziak a.

Union Minister (HRD) thar P. Shiv Shankar (1988-1989) chuan August 25, 1988-ah rawn chhang letin, “Mipuite duh dan tihpuitlin a nih theih nan central university ruahmanna (project report) siam turin Educational Consultants (India) Ltd (EdCIL) kan ruat e. Anmahni enpui tur Expert Committee-a tel tur pahnih khat in ruat thei bawk,” tiin. Educational Consultants (India) Ltd pawhin university kalphung tur mumal takin a duang a. University Bill tur te, Statute te, sum sen ngai zat tur leh UG leh PG course kal hmang turte ruahmanna Detailed Project Report chu March 31, 1992 khan Mizoram Education Minister hnenah thehluh a ni.

Mizoram State Assembly vawi 10-na chuan March 23, 1992 khan “Inremna thuthlung ang ngeiin Mizoramah central university a awm thei nan Parliament-in dan siam ni rawh se” tih thu an titlu ta bawk.

MZU ZIN KAWNG BUMBOH CHU

Central university nei mai tura ngaih a nih laiin August 15, 1995-a India Independence Day lawmnaah Mizoram Chief Minister chuan state university pek kan nih thu leh a bul ṭan nan cheng vaibelchhe 4 pek nghal kan nih thu a puang a; hei hian mipui a barakhaih hle. A chhan chu, kum 1994 khan India hmarchhakah central university pathum -Tezpur University, Assam University, Silchar leh Nagaland University te hawn a lo ni tawh a. Central university ṭha bik tak kan beisei laia cheng vaibelchhe 4 emaw lek hmanga state university din tum chu thil beidawnthlak tak a ni. NEHU, Mizoram Campus-a thawk zirtirtu leh academic pawl hrang hrangte chu an lunghnur hle a ni.

Hetih lai hian Mizorama political party-te pawhin central university hlutna hi an hmu phak lo hle niin a lang. Party pakhat chuan, “Sawrkar laipui hian sum leh pai kan mamawh zawng zawng min pe a; state university atana kan mamawh pawh state kaltlangin min pek tur tho a ni a. Central leh state university hian danglamna tak tak a nei chuang lo vang,” a ti a. Tualṭo party lam pawhin, “Central university hnuaiah chuan state sawrkarin thuneihna a nei dawn lo va, Vice Chancellor pawh kan duh zawng mi kan ruat thei dawn lo bawk; chuvangin, state university hi Mizote tan a him zawk ang,” an ti.

Mizoramah central university ngei din a nih theih nan academic pawl intelkhawmte chuan thâ thlah hauh lovin hma an la chhunzawm zel a. Thawhhona huang lian tak ‘Joint Action Committee–Joint Academic Association’ din a ni a. NEHU Teacher Association (Mizoram Campus) te, Mizoram College Teacher Association (MCTA) te, Mizoram Economic Association (MEA) te, Science Teacher Association (STAM) te, MZP te, Post Graduate Students Union (PGSU) te, Mizo Students Union, Shillong etc te an tel a ni.

Central university ṭhat zawkzia puanzarna (print leh electronic) hmangin neih a nih bakah poster tar te, mipui ngaihdan (opinion poll) lak te, chaw ngheia nawrna ‘sit-in demonstration’ leh seminar te huaihawt a ni. He beihpui hian Mizoram chhung mai ni lovin, Shillong leh Delhi tlang a thleng a. India ram hmun hrang hranga college leh university zirlaite’n an ngaihven em em bawk. Prof. Lianzela sawi danin, “Hetiang taka ṭan an lakna hi a sawt hle, state sawrkar pawhin Shukla Commission hnenah central university ngei an lo dil ve ta hial a ni,” a ti. NEHU Teacher Association ten hma an hruai a, zirna pawl dangte’n an thlawp ṭha em em a ni.

UNITED FRONT SAWRKAR HNUAIAH

Kum 1996 inthlanpuiah United Front sawrkar H.D. Deve Gowda (June 1, 1996–April 21, 1997) kaihhruai a piang a. United Front sawrkar hian hun rei lo te chhungin India hmarchhak tan ruahmanna thar tam tak a siam a. Hetiang boruak karah hian academic body hrang hrengte’n beiseina thar lian tak an nei a. Central university din tura ngenna hi India President hnenah te, PM Deve Gowda hnenah leh Union Minister (HRD) hnenah te an thawn leh a. PM hian a ngaihven hle a, party hruaitu Aizawla zinte pawh a ngaihven zuitir hial a ni. Prime Minister thar I.K. Gujral (April 21, 1997–March 19, 1998) chuan May 22, 1997 khan Mizoram a rawn tlawh a; Vanapa Hall-a vantlang inkhawmah Mizoramah central university din a nih tur thu a puang ta. Mizo mipuite an lawm hle a ni.

Hemi ṭuma PM I.K. Gujral thusawi hi a chhinchhiah tlak hle; tawi tê han la chhuak ta ila: “Central university din turin ka tifel ta. Duhsakna thil ni lovin, hmasawnna kawng in zawh mekah ram pumin a rawn thawhpui ve dawn che u a ni; helna tudai tur rihngawtin hmarchhakah kan lokal tur a ni lo. Hmasawnna leh ṭhanna in neih theih nan thapui kan thawh ve tur a ni. University thar kan din turah hian zirna sang chungchanga ngaihtuahna hmang ṭhinte’n hmel thar siam belh turin ka beisei. Hmun danga awm tawh sa ni lovin, he lai hmun nena inmil subject kan zawng tur a ni,” a ti. Vawiin thlengin he thu hi chona lian tak a la tling.

HNATHAWKTUTE AN PAWIMAWH

MZU Act leh Statute hi April 25, 2000 khan Parliament-in a pass a, MZU kalhmang tur chiang takin tarlan a ni. Zirna lam enkawlna ‘Ordinance’ leh ‘Regulation’ siam theihna a nei bawk. Recruitment rule hi Ministry of Education leh UGC ten an siam thung. Sawrkar laipui rule/regulation hrang hrangte hi MoE/UGC thu angin hman a ni a; sum enkawl nan General Financial Rules, 2017 hman a ni bawk. Heng dante hmanna kawngah University hnathawktu te, a bikin non-teaching staff-te an pawimawh hle. Statutory officer-te finchhuah tura beisei an ni.

Zirtirtute’n mawhphurhna lian tak an nei bawk; University rorelna sangah MZU Statutes/Ordinance/Regulation anga huaisen taka rorel tura beisei an ni. Zirtirtute leh non-teaching staff-te an huaisen a, dan an hriat phawt chuan university hian humsual a dai thei lo tura ngaih a ni. India rama university ranking sang nei turin zirtirtute an ṭan a ngai hle. Research project te, publication leh patent tam zawk nei tura an ṭan reng a ngai a ni. Mizo zirtirtute hian hnam dang zirtirtute aiin project leh publication nei tam zawk turin tan an lak a ngai a; MZU neitu tak takte chu a thawktu, ram leilung fate ngei hi an ni. MZU dan bawhchhiatna awmte dodal hmasa ber tura ngaih an ni.

MIPUITE MAWHPHURHNA

Kan sawi tak angin MZU din a nih theih nan academic pawl hrang hrangte’n thâ an thawh nasa hle. Tunah hian India ram university leh college ṭha 100 zingah kan tel phak a; state university hnuaiah hetiang dinhmun hi kan thleng pha hauh lo vang. NEHU chhuak vice chancellor pathumin hma an hruai a; kum sawmpanga emaw lek chhungin university ropui takah min hlang kai a ni. UGC Chairman pawhin, “State kilkhawr bera awm MZU pawhin sanctioned post zaa 80 chuang an hnawhkhat thei a, engati nge India khawpui liana awmte hian zaa 50 pawh inhnawhkhah theih loh,” tiin university dang fuih nan a hmang hial a ni. Ministry of Educationa official-te pawhin MZU hi min ring hle, India hmarchhakah chuan ‘MZU leh Tezpur University hi central university mumal taka kal awm chhun an ni’ te pawh an ti ve hial a ni.

Hun inher danglam mekah vice chancellor atan central university kalhmang leh Mizo ningkhawng hre phak lo leh party rim nam kan nei fo dawn niin a lang a. President Abdul Kalama (2002-2007) leh Pranab Mukherji (2012-2017) te hun lai khan VC zawngtu (Search Committee) te khan VC tur an duhtui hle; President mit tlung lo, file kir leh ngai VC atan an rawt palh ang tih an hlauh hle a ni. Tunah hian vice chancellor ni turin mi thiam nih a ngai ta lo em ni, tih mai turin academic profile ropui nei lem lote pawh VC atan ruat an ni ta fo mai. Hei bakah Search Committee file hian Ministry of Education bakah PMO office a kaltlang a ngai nia sawi a ni bawk.

Hetiang karah hian Mizoram University pawh a awm ve ta. Mizo hnamin rohlu kan neih ve chhun Mizoram University hi a chhiat kan phal ngai tur a ni lo vang. Hnam bil thilah ni lovin, MZU Act, Statute, Ordinance, Regulation etc bawhchhiatna thilah chuan kan thîkthu a chhe tur a ni; huaisen takin kan dodal ngam tur a ni ang. A bik takin academic body hrang hrangte hi a nawr chhuaktu, a neitu tak tak, MZU ralvengtu sipai ṭha an nih reng a ngai dawn niin a lang. 

- Prof. Vanlalchhawna