THE BIBLE SAYS SO!
Kan Lal Isua'n Pathian Lalram luh theihna chu pianthar a ni a ti a, “Mi tu pawh an pianthar loh chuan Pathian Lalram (chhandamna) an hmu thei lo vang,” a tih kha (Johana 3:3). “Pathian Lalramah an lut thei lo vang,” a ti bawk (v5). Mi tam takte hriat loh leh hriat duh lem loh, thil pawimawh em em si chu, pianthar chu Lal Isua thuhnuaia awm tawh tura inbarh luhna a ni tih hi a ni.
Eden huanah khan mihring hmasa ber Adama te pahnih khan Pathian thu hnuaia awm duh lovin, Setana thu hnuaia awm kha an thlang ta a, tu m'a tihluih lohvin anmahni thu ngeiin, bum an nih tawh avangin Pathian thu awih loh kha an thlang ta a. Kha thinlung kha lo awma ral leh ta mai a ni lo va, Setana nungchang a ni a, mihring thinlung kha a luah ta vek a. Adama aṭang khan kan inthlah chhawng ta zel a. Kan Lal Isua'n, “Nangni zawng in pa Diabola aṭanga chhuak in ni a, in pa duhzawng tih in duh a ni,” min tih kha (Johana 8:44).
Mihring chuan Pathian thu hnuai ni lo, ama thu ngeia nun chu nuam a ti tawh a, Pathian chu a hlimna diptu niin a ngai ta a, Pathian aṭanga ‘independence’ chu a nunphung a lo ni ta. Fapa tlan bo pawh khan a ro chanai a pa thu hnuaia a awmtir reng kha a duh lo, ama'n ama duh dan dana hman theih ‘independence’ a duh. Amah hmangaihtu a pa kha a hlimna leh a zalenna dip daltu niin a ngaih tlat avangin a hun lovah a ro chanai chu a ‘demand’ ta a, mihring duhna (free will) hi Pathianin A dál lo a ni tih lantirin a pa chuan a fapa naupang zawk nawrna avang chuan a ro chanai chu a pe ta a nih kha. Fapa naupang zawk chu a ‘independent’ ta, ama thu thuin a awm thei ta.
Mahse Pathian thu thu ni lova mahni thu thua nun chu hlimna tawi te neih hnua lungngaihna thuk taka tlak luhna a lo ni si a. Ama thu thua a nun avang chuan rilṭama thih a hmabak ta der mai (Luka 15:17). Mahni thua nun hi Setana nun kan dawn a nih avangin (Johana 8:40) Pathianin A ngaithei miah lo. Hei tak hi a ni, simna thu kan Lal Isua'n A puan kha (Marka 1:15).
Piantharna pawh hi mahni thua nun bansana Pathian lalrama Ama thu thua nung tawh tura in-‘surrender’-na a ni. Chu chu sual simna dik leh rinna nun kan ṭanna (Rom 12:1) a ni. Kan Lal Isuan ‘he should deny himself’ A tih khan mahni thu thua kan nung ringawt mai hi bansana Pathian lalrama Ama thu thua nung tawh zawk tura inpekna A phutna thu a ni. Pathian lalna hnuaia nung i ni tawh em? A lalramah chuan i lut tawh em? Pianthar chu Pathian lalna rama luhna a ni a, chu chu sual simna a ni. Pathian lakah an tlawm a, ‘it’s my life’ ni lovin ‘it’s His Life’ a lo ni ta! Hei hi alawm Paula'n “Krista kan nunna” a lo tih chu (Kor. 3:4)!
-F. Lal Thanzuala, 9436141242