FCAA 2023 hmangin kan ram hi Central hnuaiah a awm dawn a va ang ve
FCAA 2023 Mizoram Legislative Assembly-in a pass (adopt) khan Zoram mipui, VC te, NGO te, kohhrante hnenah he dan hi puanzar a ni lo va, kan ram a nghawng theih dan turte zir hona neih a ni lo. Kan ram environment-in a nghawng theih dan turte zir chian hmasakna neih a awm lo niin a lang. He FCAA 2023 dan hian kan Fundamental Rights Article 21, 14 leh 300A a kalh bawk. Chu bakah Assembly-in an pass hi ultra vires resolution, mahni customary law ngei him lo leh kalh zawnga ngaihtuah chiang lova thutlukna siam ve ngawt nia a lan bakah, mahni intihborallna thutlukna (suicidal) a ni a, India danpuiin (Constitution of India) kan invenhimna dan Atricle 371G a hlip hmak bawk.
Hei hi ‘Unconstitution’ leh Article 371G thai bova company lian (corporate) ten kan rama harsa lo taka an rawn zuan luh theihna tura kawngka lo hawnsakna a ni. Jharkhand, Chhattisgarh leh Odisha- a cheng tribal ram zau tak tak lungalhthei khur atan te, tuikhuah atan te, power siamna atante laksaka tribal sang tam tak sawnchhuah (displaced) an nih angin Mizote pawh hian kan hlat lo a ni. He dan hnuaiah hian ‘compensation’ hmuh loh theih a ni a, hmuh a nih pawhin beitham tak a ni ang. He FCAA 2023 central-in min rawn awrhtir ngawt hian India ram inṭhuikhawmna (federalism)a rawn tiderthawng buaih a, kan ram boruak leh leilung himna (ecological security) pawh a tichhe bawk a ni. Mizoram ramngaw hi ‘Global Climate Asset’ tia ngaih a ni a; ‘International Climate Commitments’ ah hian India sawrkar pawh a tel a, a intiamkam bawk. Mahse he FCAA 2023 hian a kalh thung.
FCAA 2023 hi kan Legislative Assembly-in a lo pawm ve ngawt hi democratic kal hmang a ni lo; kan Fundamental rights (right to environment, right to equality, right to property) a kalh bakah free, prior, informed consent ( FPIC), ‘UN Declaration of Right of Indigenous (UNDRIP)’ palzutin a kalh a ni. FCAA 2023 central dan hian inthliar hranna a tilang a; India ram state dangte nena inkhaikhin pawhin rual lo taka Mizoram kovah phur phurh rihtir bik a ni (Article 14). FCAA 2023 hian International border aṭanga teha 100km chhung (Mizoram pum thaw) central thu hnuaia dah a nih hi, state dangte nen state kan nihna anga intluk (equality) kan nihna a thai bo a; inthliarna leh inenhranna (discrimination) a siam. FCAA 2023 dan hmanga Central sawrkarin kan ram 100km huam chhunga hmun a duh duha khawih theiha a thuneihna hian kan VC te ADC te ram chanpual thuneihna a titawp a, ram chu sawrkar ta (state property) a nih tawh avangin awlsam takin company lian tak tak te hnenah hawhtir thei a ni. Kan pi leh pu hun aṭang tawha tlang ram lo kan neih dan pawh nasa takin a khawih pawi dawn a ni. Atricle 371G, kan invenhimna pawh a nawt reh a ni. Central sawrkarin non -tribal company te hnenah pawh kan ram hi a hawhtir thei ta bawk. Non tribal company ten daltu awm lovin awlsam takin kan ram hi an rawn hmang thei a ni. He dan hmang hian kan ram zim te hi a pumin FCAA 2023 thuneihnain a khuh vek a; kan ram min chhuh a ni ta ber mai. Heng kan Fundamental Rights Article 21 (life &environment), Article 14 (equality) leh Article 300A (property) te kalh hian Central Dan kan Legislative Assembly -in a lo pawm ve mai hi a vanduaithlak ngawih ngawih hle a ni. Kum rei vak lovah phei chuan tuna Jharkhand leh Chhattisgarh state tribal (Adivasi) te ang maia Mizote sawnchhuah (displaced) kan nih lek phei chuan tuar a harin a va manganthlak dawn em.
- JM Vanlalhriata