World Day For Prevention of Child Abuse

Khawvel pum huapa naupangte chunga hleilenna lo thleng ṭhin venna leh dona ni bik World Day For Prevention of Child Abuse chu kan lo thleng leh ta reng mai. Naupangte himna, hlimna ngaihtuahna hian kan ram chhungah ngei pawh pawl hrang hrangin hma an la zel a, chu chuan rah duhawm tak a thlen mek a, a lawmawm takzet a ni.

Venhim ngai naupangte

Naupangte hi rukru tur te, tualthat tur te, khawtlang tana hnawksak turte hian an lo piang ngawt lo. An lo pianchhuahna chhungkua, zirna in leh khawtlang leh kohhran pawhin naupang ṭhang lian mekte venhim leh enkawlna kawngah mawh kan phur lian viau a ni. Bible chuan, naupang chu a kalna awm kawngah chuan zirtir ula, a upat hun pawhin a thlah lovang (Thuf. 22:6) a ti a. An thlah loh tur zirtirna tur tam taka awm karah hian puitling zawkte hian tihtur kan nei a, a pawimawh zual zingah chuan ngaihsakna, thliarhran lohna, an nun dan leh an ṭhian kawmte chikna te, an zirna in leh kalhmang hriatchian te, an dikna chanvo an hriat ruala chu chuan anmahni lamah tih ve tur leh mawhphurhna a keng tel tihte hi kan zirtir hmaih hauh loh a ngai tel bawk.

Naupang kum tling lote hian an naupan puite an tiduhdahin, pawi lian tak tak an khawih theih ve tho avangin chhungkua leh zirna in lam thleng pawhin heng nun dan thiamna kawng (life skills education) te hi a taka hmang thei tura zirtir an ngai.

Social networking

Tunlai hunah chuan mobile phone leh computer te a lar a, hengte hian ṭangkaina tam tak a neih rualin naupangte nunah nghawng pawi tak a thlen thei tho a ni. Facebook leh whatsapp aṭang te hian bumna an tawk thei a, midang pawi pawh an sawi thei. Chuvangin, social networking-ah hian an thlalak thawnah eng kim phawrh loh a him thu te, chutih rual chuan mi thlalak leh chanchin a chhe zawnga vawrh darh leh lo siam danglamte Dan-in a khap thu leh hrem theih a nih thu zirtir tel an ṭul.

Mihring hmanga sumdawnna

Tunlaia sumdawnna hlauhawm leh darh zau chu mihring hmanga sumdawnna (human trafficking) hi a ni a, a tuartu zingah naupangte hi khawvel pumah an tam hle. Chuvangin, kan tu leh fate pawh tuar theitu an nih avangin thlemna awm thei hrang hrangte laka invenna kan zirtir a ṭul a, ram pawn leh chhungah an zirna leh thawhna hmun eng pawh zirchiang hmasa lo chuan thawn loh leh tirh loh hram i tum ang u.

Khuaikhem laka venna

Naupangte khuaikhem laka an fihlim theihna turin hengte hi kan zirtir a ṭul-

a) An taksa: Miin an taksa nuam lo an tih leh an rinhlelh zawnga khawih an tum chuan duh lo ngam turin zirtir ang che.

b) Bik pengte (private parts): Doctor-ten an enkawlna a, a ṭul avang leh chhungten an enkawlna kawnga an khawih a ṭul a nih ngawt loh chuan heng bik pengte hi khawih phal lo tura zirtir tur a ni. Bik pengte tiha kan han dah chu hmeichhe nau-pangah chuan an kawr leh pawnfenin a khuh chin zawng, mipa naupangah chuan an kawr leh kekawrin a khuh chin zawngte hi a ni.

c) Thilpek dawnah fimkhur zirtir tur: Miin thil an pek dawnin, chhungte hrilh lova zui mai mai lo turin zirtir ang che. Thilpek an dawn pawhin fimkhurna tur hriattir tur an ni.

d) Thuruk neihpui: Mi tu pawhin an taksa nuam lo an tih zawng leh rinhlelhawma an khawiha tumah hrilh lo tura an tih chuan duh lo ngam tur leh chhungte hrilh ngam turin zirtir ang che.

e) An taksa hmun pawimawh pali- an awm, an hmui, an kap, an inthiarna lamte hi mi khawihtir mai mai lo turin zirtir tur a ni.

Sawi tur tam tak a awm. Naupangte an lo him zel theihna turin mitinin ṭan i la
ṭheuh ang u. A nihna takah chuan nitin hian World Day for Prevention of Child abuse hi kan hman a ngai zawk a ni.

- V. Vanlalruati