MNF nge nge ram neitu an ni e

Mizoram mai pawh ni lo khawvelin a buaipui Covid-19 hripui leng karah Mizoram chuan harsatna tam a tawk ve a. Mahse ṭha takin hripui a do let thei a, hemi a thlen theihna tura Mizo thisena hming ziak MNF mi leh sa kherin Mizoramah ro an lo rel hi chung lam malsawmna leh ruahmanna dik leh fel a ni; MNF ni lo mikhual sorkarin ro lo rel ta hlauh zawk se chuan, hri pui laka kan buai pherh dan tur hi ngaihtuah thiam pawh a ni lo.

Health Minister chak tak Dr R Lal­thangliana kaih­hruaina hnuaiah MNF chuan chak takin hri pui dona an kal pui mup mup a, eptu MLA lamin a tirah thawh pui ṭha in a hnuah thawh pui duh tawh miah lo mahse MNF chuan Mizo mipui himna tur chiah ngaihtuahin ruahmanna fel tak nen hna an thawk chhunzawm zel tho a. Chuvangin, tunah hian Mizoram hi hripui dona lamah chuan a che ṭha ber pawl ang in kan sawi theih ta hial a ni.

Sorkarna siamtu nih hi chuan kawng hrang hranga chet sual chang oppo­sition hian an beihna tur a awm ve lo thei lova, mahse tun ṭum MNF sorkar zet zawng Covid-19 dona kawngah na na na chuan sawisel tur an awm lo chu a ni bik lovang a, mahse sawiselna tur hi zawng zawng pawh ni se a vang ve khawp ang le. 

Hemi a thlen theih­na tur hian Koh­hranho ṭawngṭai­na zozai leh Mizoram mipui thawhho­na ṭha chu a pawimawh ber pakhat a ni a, chumi lo hlawm khawmtu sorkar rintlak kan nei leh Health Minister viak ṭha kan nei hi Mizo mipuite tan malsawmna a ni. 

Thil hi a tluan dawn chuan hotute an pawimawh ṭhin tih chu mi pangngai chin chuan kan hre thei a. Health Minister chak tak hi chak taka a chet theih chhan chu Chief Minister a ngaihna hria kan neih vang a ni leh zel a. Pu Zoramthanga hian Chief Minister hmasa anga a thawh­pui Cabinet Minister-te awp beh tum mai lovin hnathawk thei tura zalenna a pe a, chumi hmang chuan Health Minister hian chak takin hna a thawk thei ta a ni. 

He thawhhona ṭha tak hi 'ram neitu sorkar' ze dik tak kan hmuh chu a ni ta a nih hi.

Hei vang hian tun lo ngaimawh lo ula, "MNF nge nge ram neitu dik tak an lo ni a, tunah hian hripui manganthlak karah pawh kan ram hi ṭha takin an kaihruai thei a ni," tiin kan sawi ngam a, chu chu ram hmangaihtu dik zia pawh a ni. 

- K Lalrindika