KUM THARAH RILRU THAR NEN AW

Mi thenkhatin kum thar thutiam an nei ṭhin. Min tihmasawntu atan chuan a ṭha ngang mai. Mahse tihhlawhtlin loh tur thu tiam ai chuan tiam loh law law a ṭha zawk. Miin a nun siam ṭhat phah nana a hman erawh chuan thutiam hi ho hle mah se a hlu hle thung. He kum tharah hian a ṭha zawnga nun kan hman theih nan thutiam awmze nei leh tihhlawhtlin tumna rilru nen kum thar hi i hmachhawn teh ang aw.

Kum 2020 kha han thlir let teh. I thiltih zawng zawng khan chatuan hmun thlen khalh tur chein an liam ta vung vung mai, siamṭhat duh mah la kohkir theih an ni tawh lo. Kan hlain 'nunhlui ngaih a sawt lo kan hma lam i thlir ang' a tih angin hma lam i thlir ang aw. He kum thar hi mimal nun ṭheuhah a ṭha zawng leh a sâwt zawnga kan hman theih nan kum thar thutiam i siam ve ang hmiang...thutiam hote aṭangin bul ṭan ila, chu chuan kan nunah awmzia a nei thei.

1. Kum 2021 aṭang chuan taksa ei chhetu, sum thuni nu ni bawk, taksa tana ṭhatna nei lo zuk leh hmuam lam chi reng reng ka kalsan tawh ang.

2. Kum 2021 aṭang chuan a rûka ka zu in ṭhin ka bansan tawh ang.

3. Kum 2021 aṭang chuan a dera lemchang nun ka tih ṭhin zawng zawng ka sim tawh ang.

4. Kum 2021 aṭang chuan ka hmelma pakhat tal rem ka tum ang.

5. Kum 2021 aṭang chuan ka ni tin hnaah rinawm leh dik takin ka thawk tawh ang. Sum rinawm lo lakah ka inveng tawh ang.

6. Kum 2021 aṭang chuan midang pakhat tal ṭanpuitu nih ka tum ang.

7. Kum 2021 aṭang chuan ka mize ṭha lo (thinchhiat, mi rêl, mi chunga rilru chhe deuh deuh put) pakhat tal sim ka tum ang.

8. Kum 2021 aṭang chuan thinlung takin Pathian ka ṭih tawh ang.

9. Kum 2021 aṭang chuan zingah hma taka thoin fianriala Pathian pawlna (personal devotion) ka nei ṭan ve tawh ang.

10. Kum 2021 aṭang chuan Bible hi kum khatah vawi khat tal ka chhiar chhuak ve tawh ang.

11. Kum 2021 aṭang chuan kan eirûk leh hlêprûk hi ka sim vang vang tawh ang.

12. Kum 2021 aṭang chuan Pathianin a kohhran kaltlanga rawngbawl hna mawhphurhna ka kova a nghah-ah reng reng keima nawmsakna leh duhna chauh thlirin CHHUANLAM fahrah te te siamin ka tlanchhe tawh lo vang.

13. Kum 2021 aṭang chuan rawngbawltu ni chungin mi ka rêlin ka sawi chhe zuah zuah tawh lo vang.

14. Kum 2021 aṭang chuan ka zirlaiah nasa lehzualin lehkha ka zir tawh ang. Lehkhabu 10 tal chhiar chhuah ka tum ang.

15. Kum 2021 aṭang chuan dawngtu ni lovin petu nih ka tum ve tawh ang.

16. Kum 2021 aṭang chuan harsatna hi min bawhbettu atan ni lovin chona leh zirlai atan ka hmang ve tawh ang.

17. Kum 2021 aṭang chuan ṭul lova pawisa sum hman ka sim ang a, pawisa hman tlem ka zir ang. Sum khawl ka zir tawh ang.

Siam dawn chuan siam tur a tam thei hle ang. Engpawhnise kan sawi tum ber chu kum hmasa aia nun ṭha zawk leh chhenfakawm zawk nei tura inbuatsaih a ni ber. Khai le, kum thar thutiam nen he kum thar hi hmachhawn ila, a ṭha zawnga khawvel sawi danglam turin mahniah bul i ṭan ang aw.

KUM THAR CHIBAI LE

- PC Nghaklianmawia