Tute maw contract chu hralh a?
Kan pu ber hi a ṭawngvai zauh zauh a, tun hnaia “Contract hna hralh ching hi hnam hmelma” a ti chiah mai kha chu, an political party-ah hnam hmelma a kawl hnem hle tih a inhre em ang chu maw? Contract hralh tih hian keimaha thu mu hnu a kaitho.
MNF sorkar lai daih tawh khan, ruling party mi leh sa pakhat chu a lian thur thur mai a, hna a thawh kan hre si lo. Keini
ṭhianho thu bulbal hre mang lo chuan, “Ani hi khawilaiah emaw pawisa kua hi a hre bik a niang. Party mi dangte angin contract a thawk ve si lo, in hmun a lei a, motor a lei a, in a sa a....,” kan ti a. Kan ṭhian pakhat chuan, “Pu X-a hian contract lian tak tak vawi thum a hmu tawh a, a hralh vek an ti,” a rawn ti ta a, chiang lo zawng zawng a chiang ta a tih theih.
Congress an sorkar a, contract hralh hi a la tawp lo. Ruling party hian Mizoram sorkar hnuaia contract hna awm 95% vel hi chu an party mi emaw, an chhung hnai emaw, inthlan dawna anmahni puitu contractor-te emaw, nakina hlawkna an la hmuh let theihna tur contractor-te hnenah an pe ang.
Tunah hian con-tract hralh ching an awm a nih chuan, MNF chuan hralh tur an nei lova, ZNP leh MPC pawhin an nei lova, Congress deuh vek an ni dawn a, Chief Minister-in contract hralh ching hnam hmelma a tih chuan ama mi leh sate a sawina a nih ka ring.
Tin, Chief Minister thusawi hi ngun deuha ngaihtuah chuan contract hralh ṭhin hi a hria a ni hrim hrim ang. A hriat chuan hnam hmelma chu man mai se. Hnam hmelmaah a ngai tak tak a nih chuan ama
ṭawngkam anga misual hremtu an nih loh chuan misual hremtu nia a sawi Court thleng turin nawr chep mai se a ṭha ang chu. Contract hralh ching an awm thu sawitu hian, a hralh ṭhin hi a hre dawn chiang si a, kan ram hotupa ber hian a thusawi hi bawhzui se a ṭha a ni.
AMC-ah lehzel pawh contract hralh a la awm. AMC hi chu pawisa tihek zawnga term khat tawp kal tawh, hnathawh lian tham awm lova tlem te tea inti lawm tawna hna inpe tel tel an ni a, an in sorkar chhawk den den bawk nen hna hi a chhe tawk lekin an sem sawm a, chutah an la hralh chhawng ve zui a, hei pawh Chief Minister-in hnem hmelmaa a puh zinga mi tho a ni.
Hmelma chu i do ang u hmiang.
- Zothanmawia