Bawlhhlawh bawm

Vanglaini chanchinbu Dt 11 & 12, 2016 chhuakah khan India ram state fai thlan chhuah zingah Mizoram chu top 10-ah a lan thu leh a pumpui-ah pathumna niin point 95.8% a hmuh thu kan hmu a, a lawmawm hle.

He ni issue vek editorial-ah hian Aizawl Municipal Corporation (AMC) Counci-llor-ten Aizawl khawpuia bawlhhlawh paih leh sawng-bawl dan ṭha zawk a awm theih dan tur an ngaihtuah thu leh Aizawl bawlhhlawhte Tuiriala paihna kalphung tih ṭhat dan tur te, bawlhhlawh paihna mual hran siam a ṭul thu leh Aizawl khawpui bawlhhlawh leh a sawngbawlnaah theih-tawp an chhuah tur thu an sawi kan hmu bawk a, an hna thawh a puitlin hun hmuh a chakawm hle a ni.

Mizote hi kan zo sap Missionary pakhatin khawvela hnam bal ber min tih hunlai ngaihtuah chuan faina leh thiang-hlimna kawngah hma kan sawn hle a, kawng thui tak zawh tur kan la nei tho niin a lang. Faina leh thiang-hlimna kawnga hmalam pana hmasawn tur chuan 'bawllhhawlh bawm' (dustbin) kan ngaih pawimawh a ṭulin ka hria. Bawlhhlawh bawm hian kan thinlungah hian hmun a la chang lian tawk lo niin alang. Bawlhhlawh bawmah chauh bawlhhlawh paih tur tih hian kan thinlungah hmun a luah takzet em?

Aizawl khawpui chhungah hian motor aṭanga bawlhhlawh paih chhuak thin hi ka hmu ta fo mai a, chung mite chu tute nge an nih hriat tuma motor chhung ka en zui chang hian naupang ni lo, puitling an ni fo mai a, hei hian ngaihtuahna a ti thui hle. Puitlingten kan tu leh fate bawlhhlawh bawmah chauh bawlhhawlh paih tur tih kan zirtir tur a nih laiin, kawngpui fai laiah puitling zawkten bawlhhawlh kan la paih fo a nih chuan a zia lo hle. August 17, 2016-a hawn tak Bazar Bungkawna pedestrian flyover bridge kil khata bawlhhlawh dah khawm a nih thu Vanglaini Dt 16-09-2016 a chhuakah a lem nen an rawn tarlan te khan rilru a tina ngawih ngawih a ni.

Ram changkang a piangah bawlhhlawh bawm an hmang ṭangkai. Mizo rawngbawltu pakhat khawvel huap pawha mi langsar tak pakhat thusawi ka hre reng ṭhin- Switzerland rama an thlenin naupang pakhat a fiamnaah chuan motor aṭanga bawlhhlawh paih chhuah a tum der ṭhin a, chu naupangte kum sawmpakhat mi lek chuan thinrim taka chhang letin bawlhhlawh kawngpuiah paih kan phal lo, kan ram tih bawlhhlawh kan phai lo tiin a hrilh. He naupang rilru ang hi pu vek thei ila a va duhawm em.

Kan ram leh hnam a chang-kang chho zel a, dan leh hrai hriat ṭulna leh dan ṭangkainate pawh kan in zirtir ta viau a, dan pawh kan nei ngah ve ta. Ram changkang zawkten an tih dan angin bawlhhawlh a paih lohna tura paihte tan 'hremna dan' siam ni se hma kan sawn phah ang em? Kan tuihawk luan kawr te hi bawlhhlawh paihna hmunah kan hmang a, fur ruahtui baw hawkah a tuartu kan ni leh tho tih in hre reng mahila engahmah kan ngai chuang lo. Bawlhhawlh a paih lohna tura paih inhremna dan khauh tak awm ta se, min siam ṭha zo ang em le.

Khawvela ram fai leh thianghlim ber zinga mi Singapore-ah hian dan an lo nei chipchiar khawp mai. Cigarette bung leh sweet kawr a paih lohna tura paih hian Singapore dollar 300/- an chawi. Cold drinks in ruahna bur leh um ruak a paih lohna tura paih te rorelna Court hmaah an in lan a
ṭul ṭhin.

Chewing gum leh a kaihhnawih thil paih mai mai phei chu an la thu tak hle a, dollar 1000/- an chawi ṭhin. Heng lo pawh hi dan tam tak an nei a, sawi vek sen a ni lo. Kan ram rorel khawlte pawh hian ngaihtuahna hmang se he lam kawnga dan siam tur hian, (khawvel ram changkang zawkten bawlhhlawh a paih lohna tura paih te an hrem dan chi hrang hrangte zir chiang se. Dan siam ila ṭha takin lekkawh bawk ila (dan neih ve si kenkawh ṭhat si loh chu zu chungchangah pawh kan buai em hi. Eng pawh nise bawlhhlawh bawmah chauh bawlhhlawh i paih tawh ang u.

- Lalduhsaka Pachuau