LPR – 5

October 9, 2025 khan Vanapa Hall, Aizawlah Mizo Writers Association (MWA) huaihawtin Lehkhabu Pho Runpui thawh ngana (LPR – 5) chu Pu K. Sapdanga, Home Minister-in a hawng a, lehkhabute 15 a tlangzarh nghal.

Lehkhabu ziaktute zingah hian mi chhuanawm deuh pahnih an awm. Pakhat chu R. Rothangpuii a ni a, pakhat leh chu Ngotekherh tih a ni. ‘Hmanlai an chang ta maw’ tih ziaktu R. Rothangpuii hi kum 83 ni tawhin, N. Vanlaiphai khua a ni a, lehkhabu 13 emaw lai a ziak tawh. July 23, MWA Foundation Day-ah khan a lehkhabu ‘Hmangaihna Tluantling’ tih chu tlangzarh a lo ni tawh bawk.

‘Vau vullai’ ziaktu Ngotekherh hi a hming pangngai chu Lalzarliana a ni a, Tahan Literature Circle member niin, thu leh hlaa tui tak, kohhran rawngbawltu pawimawh a ni. Tin, hmeichhe kutchhuak thar bu hnih chhiar tur a awm thei hi a lawmawm a, ziaktu senior C. Chhuanvawra leh B. Lalthangliana te pawhin kutchhuak an la nei thei hi a lawmawm bawk.

LPR-5 ah hian lehkhabu chi hrang hrang 500 vel pho chhuah niin, ziaktu mi 120 velin an ziak a ni. A ni khatna aṭang hian tlawhtu an ṭhahnem hle a, a bikin ṭhalai lamin an bawh zual. Ni khatna lehkhabu hralh kal zingah–C. Lalawmpuia Vanchiau kutchhuak ‘Tapchhak Theory’ pakhatna a ni a, Lalhruaitluanga Ralte lehkhabu ‘Zoram Varṭian’ pahnihna niin, pathumna chu ‘Anita’, C. Laizawna ziak a ni. Lehkhabu dangte pawh hralh a kal hlawm hle. Lehkhabu leitute’n lehkhabu ngaihnawm leh ṭha an thlir tih a hriat a, a lawmawm.

MWA chuan hetianga lehkhabu pho chhuah an buatsaihna hi a ṭum ngana a ni a, tluang takin hun an la hmang thei zel a, a lawmawm. Man tlawm zawka pho chhuah a nih mai bakah, lehkhabu chi hrang hrang kimna ber tih theih hial tur a nih bawk avangin pan manhla tak a ni. Tun ṭum phei hi chu a hun chhung tlemin a rei deuh hlek thei dawn lehnghal.

Smart phone vangin lehkhabu chhiartu kan tlem kan han ti tak nâin, LPR a lo thlen hi chuan lehkha chhiar mi kan lo la tam hle tih a hriat a, ṭum khata cheng sang chuang man tak tak lei hi chhiar tur an awm nuk zel thei. Chutih rual chuan, lehkhabu lam hawi nachang hre lo tak tak erawh kan la tam hle a, social media lamah lah lehkhabu lamin hmun a chang thei reng reng ta lo a, a pawi hle. Kan ṭhalai zinga ruihhlo ti ve duh miah lo a, lehkhabu chhiar hram hramte vang hian he hnam hi chhanhimin a la awm ngei a rinawm a, sorkar hna sang leh zahawm tak takte hi vawiina lehkha chhiar lui tlatte hi an la nih zawk ngei pawh a rinawm.

Man tlawm leh kimchang taka lehkhabu pho chhuahna buatsaih hi thil awlai a ni lo a, lehkhabu ziaktute tan senso awm lo tura buatsaih a nih avang hian a nazawnga tih theih a ni lo. Aizawl pawn lama awm tan pawh pan vang vang tham a ni a, Aizawla awm tan phei chuan hmaih chi rual loh tur a ni. Hetianga MWA lamin min rawn chhawp chhuahsak hi kum dangah a ni leh ang em tih sawi lâwk a theih hauh loh. I dam a nih ngat chuan kal hrâm la, i kal a nih chuan lehkhabu lei loa chhuah leh tum hauh bawk suh ang che.

- Mahmuaka Chhakchhuak