SALVATION ARMY YOUTH CONGRESS, DARLAWN

Salvation Army IET Youth congress Darlawnah a awm dawn tih a nih atang khan ka lo phur ve hle ringawt mai a. 1988 March ni 11-13 a Aizawl Temple Corps neihah khan ka tel hmasak ber a ni a. A bakah pah ka tel ve ta nual a, tum tum ka kal ve chu ka inchhirlo khawp mai. 2014 kuma Vaivakawn fielda kan neih tum khan TYS ka nih lai a ni a. SAY Diamond Jubilee lawmna nen kan kawp a, IHQ atangin Commissioner Lalzamlova, IS te nupa khan min rawn hmanpui a ni. Aizawl a ni bawk a, inkhawm pawh kha a tawp zan phei kha chuan pandalah kan leng lo nasain sing chuang daih kan inkhawm. Dinthar nu pakhatin pandal chungah vantirhkoh lam kual a lo hmu ani awm a, amah kha SACNET interview neihpui kan kawm nghe nghe.

Youth Congress hi a changkang chho zel a, hmanrua alo changkang tulh tulh bawk a, thalaite pawhin an hlut tual tual niin ka hria. Thalai hruaitu mi inpe leh thahnemngai fel tak tak kan nei thin hi a lawmawm khawp mai. Kan thalai hruaitute congress atana an tha leh sum leh pai, ngaihtuahna an sen nasatzia hi ka ngaihtuahin Sipai pawl tan hian an hlu mange aw ka ti thin. Chu lovah kohhran bik pawh sawi lova pawl leh mimal lo luanghhuk thinte avang hian kan mawi ve thei thin. Sorkar lam hruaitute an fakawmin an inpekna a hlu thei khawp mai.

Kumin Youth Congress chu kal tum angreng tum lo angrengin ka inkhap ve viau mai a. Mahse, TSAYC atangin sawmna duhawm tak ka dawng ve bawk nen phur angreng, peih lo deuh chungin ka thawk chhuak ve a. Ram hla taka luipui dai ka i ngai chunga lokal te, chirhdiaka tâng leh innawr chhuaka harsa taka thleng hram te, Tripura te, cachar lam atangte a pickup hnunga thutthleng dah chawpa kawng thui tak rawn zawhte ka hmuh khan ka kal ve ta chu ka inchhir lo khawp mai.

Darlawn kawng metal tha em em mai, an siam atang khan kum 20 chuang a liam tawh ang tih mai tur ni si, ti em em a grade thaa an lo siam khi a siamtu company an fakawm ka ti ngawt mai. Zawh nuam lo lai a la awm lo va, a la tha em em mai khi khawmpui kalna tur ni awm takin ka ngai hial. Kan sorkar hotuten national highway kawng bung tawp mai kha an lo siamtha hman vek bawk a, a lawmawm tak zet a ni. Inrinniah kan kal ve a, darkar thum awrh kan tlan a, tluang takin kan thleng a, kalkawngaah pawh khawmpui kal tur motor te leh ke pahnih nei chi te, bus-te nen pawh kan la inpel zut zut tho. A boruak kha a nuam ve hrim hrim mai a, dam takin Darlawn kan thleng a, boruak a lo nuamin a lum leh vawh thuah a tawk chiah a ni mai.

Darlawn khuah pawh kawngpui leh inte a lo changkang tawhin mihring cheng pawh an lo thahnem hle ta mai. Kohhran bik pawh sawi lo va, mikhual min lo thleng vek te, pandal sak hnatlangah pawh a khaw chhungin tlawmngai taka an lo inpui tawn vek te kha a mawi ka tiin a ropui khawpin ka hria. An khawtlang inthurual ziate, an khawtlang hruaitute kohhran hruaitute an fakawm ka ti tak zet a ni. Pandal pawh a lian thain a changkang hle mai a, sound lah duhthusama tha a ni. LED screen lian tawk nen, sap ram lam pawh kan ngai bik lo. Engkim mai kha a rem vel thlup mai a, a nih tur ang tak tih mai tur vek a ni mai.

Mimal leh pawlho inpekna mai piah lamah, bialtu MLA a tangkai hle mai a, nu leh pa chan changing bialtu a nihna anga a mawhphurhna anga ngaia pawisa leh tul dangah a lo insengso hle mai a, a fakawm tak zet a ni. TSAY hruaitu hoten engkim an ruahman tha hlein ka hria a, sawisel ngai lai awm pawh ka hre lo, a fel thlup ni berin a lang. Khawmpui palai 5,500 chuang zet an inziak lut a, inziak lut lo pawh an awm nual ang. Chawlhni zan inkhawm phei kha chu 7,000 chuang kan ni. Kan hun lai 2014 khan nuaih 10 vel kan seng ralin kan hria a, tunah chuan nuaih 50 dawn a hawlh daih ta mai. Heng pawisa zawng zawng mi inpe tak takte kan sorkar hotu leh Pathian malsawmna vang liau liau a ni e. Thalai rual a khaw chhunga kan han zi mup mup mai te, Pathian duhtu thalai khati zat an han kal khawmte kha a ropui mang e; inkhawm lah kan tam thin bawk si a.

Item leh programme engkim a tha ka ti a, item neitute lah an thiam hlawmin a changkang tulh tulh bawk a. Kan Zoram pum huapa milar J. Lalrosanga leh Petera’n hun an hmangin a phusa pawl an ni te kha an hmuhnawm. Miss Grand India 1st runnerup Tluangtluangi a phusa pawla a han tangte kha ava fakawm em. 2018 Mizo Idol Grace Lalchhanhimi pawh a la zai tha khawp mai. Zaipawl, malzai –add. engkim mai kha a thain a ropui takzet hlawm. Thalai sang rual Pathian duh em em tuten fakhla an han saa tui tak maia an han zaia an lamkual mup mup maite kha a thlir ninawm loh. Kan ramah thalai awm tha duh lo an tamzia kan sawi thin a, nimahsela, awm tha duh hi an lo tam em mai. Kan Zoram thalaite hi a tam zawk hi Pathian hnaihtu leh fel tak tak an ni. Awm tha duh lo tlemte awm hi a langsar mai mai thin niin ka hria. Chawlhni chawhma inkhawmah Colonel Lalnunhlui TPWM-in zahngaihna dawhkan a hawng a, thalai sang tam tak mittui tla chunga Pathian ke bula an kun han hmuhte kha ava ropui tehlul em! Zan inkhawmah Major ST Dula’n thalai rualte Pathian ke bula kun tura sawmin thalai sang rual an lokal ruih ruih maite kha Pathian tan hi chuan a va lawmawm dawn tak em!

Kan ram thalai rualte hi kan fuih sauh sauh a, kaihhruaina tha kan pek tam deuh deuh hi a tul khawp mai. Nakin lawka kan ram hruaitu leh kohhran hruaitu turte an ni a, an pawimawhzia hi kan hriat thar a tul khawp mai. Inchhungkhur leh khawtlangahte inkaihruaina tha leh Pathian lam hnaih tura kan zirtir tam a tul a ni. Chutih lai erawh chuan, inkhawm a rei thin lutuk erawh chu upa lam tan chuan a hrehawm ve deuh tih mai a ni. Engkimah hian fakselna awm lo hi chu a awm lo ve tih tur a ni a, mipui khati zat kal khawm ta chu. Nimahse, khawmpui danga ka kal tawh zawng zawng aiin a felfaiin a changkang a, thusawitute lah an tha bawk.

Colonel Lalbulliana, Territorial Commander-in sawi awm tak tak thalaite tana fuihna tha a sawite kha a thiam ka tiin Pathianin a awmpui hlein ka hria. Zai a nuam a, kan hlim bawk. Thawhtannia kan haw ta kha chu thinlung a ngui deuh ruih mai. 1994-a Kolasib-a Youth Congress-a ka kal ve tum kha chuan thalai hote khan U Ben tiin min ko deuh ber a; tun tumah erawh, ka pu tih leh Pa Reuben tih kan ni ta vek mai, kan lo upa ve ta a ni e.

Kan Zoram kohhran thalai rualte lo thang lian deuh deuhin, Zoram tan chhenfakawm leh malsawmna lo ni zel se tih chu ka duhsakna a ni e.

- Reuben Lalnunthara Hnamte