THE BIBLE SAYS SO!

Rinna thu te, Lal Isua lalram thu te, chhandamna thu te, simna thu te, A lalna pawm hi sual simna a nih thute kan sawi ta nual a. Chang dang kai ve tawh ila, a ṭha ang tiin subject dang – Mi Thianghlim Lawr – thu lo sawi ve ta ila. He ‘subject’ hi mi tinin kan sawi rik, mahse kan chhut ngun vak si loh thu a ni a. Mi ṭhenkhat chuan mahni rin rinin ring mai ila a ṭha, sawi fiah tak tak theih pawh a ni si lo an ti a. A ṭhenin mi thianghlim lawr hi Sakawlh lo lan hmain a ni ang an ti a, mi dangin Sakawlh hi piangtharte pawhin an tawk ang a, a tihduhdahna pawh an tuar ang a, mi chhiar sen lohte an martar dawn alawm an ti a. Mi ṭhenkhatte phei chuan chu Sakawlh rapthlak tak chu chhinchhiahnain a mite a chhinchhiah dawn tiin chhinchhiah an nih loh nan Sarkar leh pawl hrang hranga hming ziahte an duh lo va. Kan khawvel insarkarna ata inlak hran vek an tum a nih hi.

Mi thianghlim lawr hi khawi lai Bible bung leh changahte nge a inziah le? Lal Isua'n A sawi em? Paula'n a sawi em? Hun hnuhnung chungchang thu-ah hian ngaihdan leh pawm dan hrang hrang chu awm ngei mah se kan Lal Isua awka te, A apostol pui ber Paula te awkate kan en ang a. Fiah takin dinhmun kan siam thei ang.

Lal Isua awka kan la chhuak hmasa ber ang. Chu thu chu hei hi a ni, “Ka Pa inah… in tan hmun siamin ka kal dawn hi. Tin, in tan hmun ka han siam chuan ka lo kir leh ang a, ka hnenah ka la ang che u: ka awmnaah nangni pawh in awm theih nan,” (Johana 14:23). Hetah hian Lal Isua chu A Pa hnenah A kal chho dawn a, ringtute tan hmun A han siam ang a; A lo kir leh ang a, A hnena awm turin Amah ringtute chu A hruai chho dawn a nih tih fiah takin kan chhiar a nih hi.

Kan Lal Isua ka ngeia chhuak apostol Johana'n a ziak chu – Ka Pa hnenah Ka kal dawn a, in tan hmun Ka han siam ang a, Ka lo kir leh ang a, Ka hnenah awm turin Ka rawn la chho ang che u – tih hi a ni.

He thu hian kan khawvel hi kumhlun tur a ni lo va, van aṭangin Lal Isua A lo kal ang a, A hnenah vanah Amah ringtu, piangtharte chu min la chho dawn a lo nih chu. He hun ropui tak atan hian i inpeih tawh em? I piangthar tak zet tawh em? Piangthar (mi thianghlimte) chu vana lak chhoh an ni ang. Hei hi “Mi Thianghlim Lawr” tih ṭhin chu a ni. Mi thianghlim lawr leh Lal Isua ‘Second Coming’ hi thil thuhmuna sawi an awm ṭhin a. Mi thianghlim lawr hi chu A nupui tur Kohhran te vana hruai chhoh tura a lo kalna a ni a. ‘Second Coming’ hi chu kum sang rorel tura a lo kalna a ni. Uluk takin lo chhiar ṭhin ang che.

- F. Lal Thanzuala, Ph : 9436141242