Hmasawnna lamtluang

Kan pi leh pute huna khan, buh kham khawp thar chhuakte leh sial nei ngahte kha khawkhat parâwn leh zah kaite an ni a, pasalṭhate mawina chu an in banga sa lu intar a ni. Zawlbuk kha an zirna rûn sang kaina a ni a, val upa nei ṭha leh nei ṭha lo inkarin tlangvalte nun a hril thui hle. An lalte lalna kha a na êm êm a, khawi kipa an kalin pasalṭha leh khâwnbawlten an zui ṭhin. An thu chu thu tâwp a ni tawp mai a ni; lal bar bar tak an ni (tute emaw inkhawmnaa biakin leh a chhehvela body guard an ding ang deuh a ni chu). Khua leh tui tâna mi huaisente khan chawmawina huai no, lal no an dawm (an hlan) ṭhin a nih kha.

Tuna zawng sa lu ruhro, maimawm rílina a zamte la thlain, kan in bangah eng eng emaw degree lakna mawi takin kan tar fer fur ta. A hmuhnawm a, a zahawm bawk a. Hmanlai pasalṭha ṭhenkhatte pawhin an kah loh, sa lu anlo tar ṭhin ang deuhin, degree chauh nei, thiamna belhchian dawl lote pawhin kan lo tar ve tho em le? Mahniin kan inhre chiang ber âwm e.

Kan tunlai inchawimawina hi a bikin, kan zirlai pass ṭhate chawimawina kan hlan, citation & certificate YMA leh kohhran, ṭhalaite thlengin kan hlân a, a ṭha e. Kan Minister leh MLA te thlengin a kang kai zel a, laptop pawh kan inhlan tam ta mawlh mawlh e. A lawmawmin, a phu pawh an phu e.

Mahse, tih hmaih kan neiin ka hria. Khaw khat, veng khat, district-ah taxi owners association, pickup, truck thlengin, driver rinawm leh felte hnênah chawimawina an hlan ṭhin hi a va han mawi tak em. Hei hian dik duhna, rinawm tum tlatna a keng tel a, a zirtirna hian kan ram kan hnam a la timawi dawn chauh a ni.

Tuna relin kan kawtchhuah a rawn dai thleng ta. Hnam dang zingah kan hnam, kan ram hmel timawitu turte chu driver fel leh mi rinawm, mi dikte hi an ni ang. Central YMA pawh hian chawimawina hi hlan ve tawh se la. Chutiang zelin, khaw khat, veng khat nula fel, tlangval fel te, kut hnathawka ei zawng, mi rinawm leh hlawhtlingte dap chhuakin, tlangval ruihhlo laka inhnamhnawih lo, taima leh chhungkaw tâna innghahna tlak te, nula fel, chhungkaw khai dingtu, kohhran leh khawtlanga inhmang ṭhinte thleng hian chawimawi an phu lo maw? Ropui taka kan chawimawi, laptop hial kan hlante zingah hian e, ram leh khawtlang, kohhran pawhin kan chhawr ṭangkai loh hi an tam tawh em asin. Central YMA hian zau zawkin chawmawi phute lamah hian mit lên ve tawh se la, chu chuan intihhmuh hnam kan nih angin, a ṭha zawngin ṭhangtharte hi a hruai zawkin ka ring.

Tuna lehkha zir tawh lo, zir zo tawh, hna thawh nachang hre si lote pawh hian rualelnate an lo nei ve tawh ang a, chhungkaw tin intodelh duhna a hring chhuak ngei ang. Chutih hunah chuan kan ram leh hnam hian hmasawnna lamtluang a lo zawh tawh ang a, rel station-ah pawh Mizo nula tlangval an phu suau suau tawh ang. Social media-a mahni sex video zuara iak iak hote pawh hian hna thawh nachang an lo hre tawh ang a, hma kan va sawn dawn tak em.

Ka han peng lawk teh ang. In fanute’n an room-ah eng nge an tih in hria em? Heti êm êma mahni zahawmna pho lang, video siama sum zawng hi an va tam ta em. Kristian chhungkua din tih thupui hmanga kan inkhawmpui buatsaih zozaite hi a hlawhchhamzia hi kan hria em? Khawthlang lam mite tih dan ṭha lo kan copy a, party apui lah kan ngah narawh. Tunlai dan alawm, tiin in fanute in thlah zalen a, a rah chu maw, India ram state-ah HIV positive tamna ber kan nih tak hi.

Inthlah pun kan tih kan tih lai hian positive inthlah pun hian awmzia a nei lo. Mahni chhungkua pawh rel fel thei si lo hian mi fate khawlai nun siamṭhat kan tum a, a mawi kan zawng a, kan mawi chuang si lo. Chhung inkhawmnaa an ṭhut ve ziah avang khan heng lakah hian an fihlim tihna a ni lo a nia.

Aw le, lehkhathiam tamna rama chuan intodelh lo ber ram kan ni ang. Taima hnam kan ni, kan ti maw? Japan leh China, Thailand, ka hmuh leh hriat ve phak tawkah chuan Mizote hi taima hnama inchhâl tlak kan ni hlawl lo. Hawh u, taima phawt ila, chutichuan hmasawnna lamtluang kan zawh dawn nia.

- Zothansanga, Chhiahtlang Kawnveng, 9612333536.