Zoram kohhrante’n kan hmêlma do tur kan hai e!

Zoram ang taka rawngbawltu tamna hi khawvelah, a ram chhûnga cheng zat ngaihtuahin ram dang an awm a rinawm loh. Chuti chung si chuan Lal Isua ngeiin, "Damlote tidam ula, ramhuaite hnawt chhuak rawh u..." tia ringtute chu thilmak (miracles) leh tisa damna (healing)-in ringtute a zui zel tur thu kan hmuh erawh rawngbawltu tam berte rawngbawlnaah hmuh tur a awm hauh si lo!

Zoram chhûngkaw tin sualin min luhchilh vek emaw tih mai tur a ni zo ta. Chutih lain, Zoram kohhrante pawhin nasa takin ṭan an la ve reng tho si. Zoram kohhrante hian sual an do lo a ni lo, an do a, an ngam hlawl lo a ni zawk. Ei rûk, hlep rûkna, duhamna leh hurherhna sual, ruihhlo avanga buaina leh natna tinrenga damlohna vei kan phu suau suau a ni ber! NGO leh sawrkar pawhin theihtawp chhuah reng mah se, kan ram hian sual kan ngam thei reng reng lo a nih hi!

Daniela bu kan en chuan, Setana hian Pathian nihna pakhat – hmun tina awm theihna a nei lo a. Setana hian a hnuaia thawktu thlarau sual hrang hrangte chu ram tin awptu nihna a neihtir thliah thliah a. Chung ram tin awptu thlarau sual hnuaiah chuan sual tirhkoh hrang hrangte awm zelin, ram tin, khaw tin, veng tin, chhûng tin leh mimal tinte awptu thlarau sual an awm thu kan hmu a nih kha. Daniela pawh a chenna Persia ram awptu thlarau sual dodalna avangin ni 21 zet a ṭawngṭai chhannain a hnen a lo thleng thei lo tih kan hmu.

Thuthlung Hlui hun kha tisa indona hunbi a ni a. Hriamhrei nen Israel fate khân an hmêlmate an do ṭhin. Thuthlung Hlui hunah tu mahin ramhuai an hnawt chhuak thei lo. Mitdel an tidam thei bawk hek lo. Thlarau Thianghlim pawh tu mihring chhûngah mah cheng lovin, an chungah a awm ṭhin tih thu kan hmu a nih kha. Mahse, Thuthlung Tharah ve thung chuan tisa indona hunbi liamin thlarau indona hunbi chhûngah kan lut ta a. Thlarau Thianghlim pawh mihring chhûngah awmin min chen chilh ta a nih hi.

Federick Lalrindika hian a sermon pakhatah chuan, Burma ram awptu thlarau sual hi ka hre tawh a. Tripura awptu, Siaha awptu, Lawngtlai leh Champhai awptu thlarau sual pawh ka hre tawh bawk. Lunglei awptu erawh ka la hre mai thei lo. Mahse, Lungleiah hian ka hrisel lovin ka bawrhsâwm ru riau reng mai a. A mak ka ti hle, tia kan thusawi a nemnghehna thu ka ngaithla tawh a. Hei taka hi a ni Mizoram buaina chu lo ni ta reng ni. Mizoram awptu thlarau sual hi Persia ram awptu thlarau sual nen kha chuan an inang hauh lo ang.

"Kan buante hi tisa leh thisen an ni si lo, lalnate leh, thuneihnate leh, he thim chunga khawvel rorêltute leh, van hmunahte thlarau sualho awmte an ni zawk e," tiin Paula chuan Ephesi lehkhathawn kal tlangin min hrilh ta chiah reng a. Mizoram awptu thlarau sual nihna lian bera ka rin chu hurna a nih ka ring. Chu mai bakah khawvel nawmsak thlakhlelhna thlarau sual, ei rûkna leh hlep rûkna thlarau sual, natna tinreng kawltu thlarau sual, duhamna leh mahni hmasialna thlarau sual leh, ruihhlo thlarau sual nihna a nei ngei tih hi ka chiang êm êm bawk.

Federick-a vek hian Siaha awptu thlarau sual vangin naute piang chhuak (nau chhiatna) thihna a thlen nasat thu a sawi laiin, Burma ramah erawh ramhuai dawi hman uarna a tam thu a sawi a. A dang pawh a sawi nual nangin, kan thu sawi tum kan hre thiam tawh mai awm e. He Mizoram awptu thlarau sual leh a hote, khaw tin leh veng tin bakah mimal tinte chunga inzar pharh a, tha thla hauh lova englai pawha min bei rengtu hi Zoram kohhrante'n kan do tura chu a ni ta a ni.

Mahse, Zoram kohhrante leh NGO chuan do tur dik hre lovin, nasa takin mi sual nia kan hriatte leh sual hmanrua, a bik takin ruihhlo kan do ta a. Tisa indona ruamah zu do rem tumin kan khap a. Ruihhlo man tumin hmun tinah tha kan thawh mek reng bawk. Mahse, vawi khat mah hnehtu kan la ni ngai lo! Baibul-ah hian thu inkalh hmel deuh deuh hi a tam mai a. Pakhat chu, Lal Isua'n Matthaia kal tlangin, "Mi sual dodal suh u" tiin thu min pe a. Hebrai ziaktu erawh chuan, "Sual doin thisen chhuak khawpin in la ṭang lo" a ti leh lawi bawk si!

Lal Isua sual sawi hi evil a nih laiin, Hebrai ziaktu sual sawi erawh sin a ni thung. Sin hian ṭhuihhruai Spiritual Forces of Evil a nei tih hi hriat thiam ngei ngei tur a ni ta a ni. Lal Isua hian mi sual, ruihhlo ngai, hur hmang, hlepru ṭhin mihringte hi dodala haw turin min zirtir lo. Ruihhlo châkna min neihtirtu, hurna leh hlep rûk duhna min neihtirtu thlarau sualte (spiritual forces of evil) erawh thisen chhuak khawpa dodal turin min ti a ni zawk a. Chu indona chu tisa indona ni lovin, thlarau indona a ni ta a ni.

Setana leh a ṭhuihhruaite hian nasa takin, englai pawhin min dodal reng tih lan chian êm êmna chu, "Tin, puithiam lalber Josua, LALPA vântirhkoh hmaa ding leh a dodaltu tûr Setana ama ding lampanga ding chu mi entir a," tih thu Zakaria bua kan hmuh hian a ni. Tin, Setana leh a hote hian anmahni mai ni lo hian, kan mihringpuite ngei hmangin ṭhat kan tum laiin min dodal reng tih, "Nimahsela, Eluma, (Barisua hming dang awmzia hi Dawithiam a ni a,) chu mi chuan lal aiawhtu chu rin lohtir tumin anni chu a lo dodal a," tih thu aṭangin kan hmu bawk.

Tichuan, Zoram kohhrante hian tun huna kan rama hurna inluling nasa lutuk, hmun tina hlep rûkna awm reng mai leh ruih theih thil kan hmachhawn mek kan dodal dan koki kan thlak a ngai ta a lo ni. Hei hi a va pawimawh êm aw! Tisa takin sual kan do a, kan hah êm êm a, camping leh crusade kan huaihawt chamchi a. Tlawmngai pâwlte lahin zankhaw tlaivarin sual an vehin an dodal a, a sâwt hlawl si lo. Kan vai mai hian kan hah thlawn mai a nih hi.

Hurna bâwiha tâng mek mihring thununtu thlarau sual, ei rûkna leh hlep rûk duhna thinlung min neihtirtu thlarau sual, ruihhlo tih châkna leh a ngawl min veitirtu thlarau bawlhhlawh, kan taksa peng hrang hranga natna tinreng thlentirtu thlarau sualte zawka hi Zoram kohhran leh Pathian mite chuan an lakah thlarau indona kan puana kan beih let a ngai ta a lo ni zawk e. Kan natna tam takte hi thlarau sualte min pêk tih Lal Isua sawi bakah, Derek Prince-a ten Thlarau Thianghlim hriattirna kal tlanga an lo hmuh fiah tawhziate hi kan hriat a va hun ta êm!

Nasa taka ṭawngṭaina, tisa chaw nghei chunga indona ruam kan pan a, râlthuam atân a tam thei ang ber Pathian thu kan chhiara kan vawn a, "In hmêlma zawng zawngin an dodala an hnial theih lohna tur kâ leh finna ka pe dâwn si che u a," tia Lal Isua thutiam kan chang a nih ngat chuan, Zoram kohhrante hian sual hi kan do hneh ngei tawh ang. Sawrkar leh tlawmngai pâwl lam hmalakna pawhin sâwtna a lo nei tawh bawk ang.

Nimahsela, thil buaithlak ta êm êm mai chu hei hi a ni. Hetiang taka sual do tur hian kan peih lo, kan taima tâwk lo a, Pathian lamṭang ni tlak khawpin kan thlarau nun kan sawizawi peih tlat si lo a nih hi! Kan pian thar loh vang lam a ni lo. Kum 1740 chhova John Wesley-a'n a pindan chhuat khuar vek khawpa ṭhingṭhia Pathian a buana America rama harhna a thlentir ang ti peih mi mal, pâwl, kohhran kan ramah hian kan awm tlat lo a nih hi!

Tisa thila kohhran leh pâwla kan inpêkna thûkzia, kan hah peihzia leh tlawmngaih theihzia, kan taihmakzia hi pui tak a ni. Mahse, thlarau lam indonaah erawh chuan naute hnute hne lai tluk chauh kan ni reng kumhlun si a nih hi. Kan ram hmabak hi a thim tulh tulh dâwn a. Sual do dan ki kan thlak loh chuan a thim zual zel zawk dâwn a lo ni e.

- Lalremliana Pachuau